Matié

7 « Azot-la, kritik pa pèrsone, komsa pèrsone i kritik arpa zot. 2 Parské kom zot i kritik lé zot, va kritik azot osi parèy. É kom zot i trèt lé zot, va trèt azot osi parèy. 3 Donk poukosa ou rogard lo ti grin la pousièr dann zié out frèr, mé ou fé pa in kont avèk lo gro morso d’boi lé dan out zié aou ? 4 Koman ou pé oz di out frèr : “Lès amoin tir lo ti grin la pousièr dan out zié”, alor ké aou ou néna in gro morso d’boi dan la vot. 5 Spès lipokrit va ! Tir avan lo gro morso d’boi dan out zié, aprésa ou va oir bien klèr pou tir lo ti grin la pousièr dann zié out frèr. 6 « Alé pa done lo chien bann zafèr lé pou Bondié, é done pa zot pèrl bann kochon non pli, parské sinonsa banna va pil dési é va artourn kont zot pou atak azot. 7 « Kontinié domandé, é va done azot. Kontinié rodé, é zot va trouvé. Kontinié kongn su la port, é va rouv pou zot. 8 Parské sak i domand i gingn, sak i rod i trouv, é sak i kongn su la port i lès ali rantré. 9 Sé pa sa mèm zot i fé ? Kan zot marmay i domand azot in morso d’pin pou manjé, zot sar pa done ali in galé, pa vré ? 10 Oubien si li domand azot in poison pou manjé, zot i sar pa done ali in sèrpan ? 11 Pourtan azot, mèm si souvan zot i fé mové zafèr, zot i gingn done bann bon zafèr zot marmay. Donk zot i pé èt sur ké zot Papa dann sièl va done bann bon zafèr sak i domand ali ! 12 « Alala lo mésaj inportan ké nou trouv dan la loi Moiz èk sak bann profèt la di : Trèt toultan lé zot lo fason zot i vé ké lé zot i trèt azot. 13 « Rant par lo ti port séré, parské lo chemin i amèn juska la mor lé larj é son port lé gran rouvèr é néna in tralé domoun i pran chemin-la. 14 Alor ké lo ti port é lo ti santié i amèn juska la vi, sa lé séré sa, é na rienk inn ti pé domoun i trouv ali. 15 « Tansion pangar bann domoun mantèr i vien oir azot soidizan kom roprézantan Bondié. Banna i fé kroir ké zot lé janti kom mouton, mé an ddan zot mèm, sé bann zanimo sovaj k’i rod pou mord azot. 16 Kom nou rokoné in piédboi par son bann fri, sé par sak banna i fé ké zot va rokonèt bann domoun-la. I ramas pa rézin su pié zépine pa vré ? É i ramas pa bann fri su pié pikan non pli ? 17 Lé parèy, tout bann bon piédboi i done bann bon fri, mé in piédboi pouri va done bann fri pouri. 18 Lé pa posib in bon piédboi i done bann fri pouri é lé parèy pou in piédboi pouri, jamé li va pa done bann bon fri. 19 Si in piédboi i done pa bann bon fri, i koup ali é i bril ali, pa vré ? 20 La lé parèy, sé par sak banna i fé ké zot va rokonèt bann moun mantèr-la. 21 « Lé pa tout sak i di zot i sèrv amoin ké va fé parti lo gouvèrnman dann sièl. Sé rienk sak i obéi mon Papa dann sièl ké nora zot plas dann gouvèrnman-la. 22 Lèr-la bonpé va di amoin : “Ségnèr Ségnèr, ou rapèl pa, nou la aprann dot moun konèt aou, nou la ansèrv out non pou tir bann mové lèspri su zot ! É gras out fors nou la fé bonpé mirak !” 23 Mé moin mi va di azot : “Moin la jamé konu azot moin ! Sort dovan moin, mové moun va !” 24 « Sak i ékout amoin é i fé sak mi di lé kom in moun, ké èk sajès, la konstrui son kaz su lo roch. 25 Kan tangaj siklone èk la pli la sokouy ali, la kaz-la la ténir dobout, parské li té konstrui su lo roch. 26 Mé si in moun i antand amoin kozé mé ké li fé pa sak mi di, li sra kom in moun bèt ké la konstrui son kaz su la sab. 27 Mé kan tangaj siklone èk la pli la sokouy ali, la kaz-la la chaviré é la kas nèt. » 28 Kan Jézu té fine koz èk zot, bann domoun té an rovien pa par son manièr kozé, 29 parské li té done son lamontraj, pa kom sak té amont azot la loi, mé kom in moun ké Bondié la done lo pouvoir.