Jak

2 Kan zot i pas dann tout kalité traka, mon bann frèr, pran sa kom in gran joi, 3 parské zot i koné ké, kan zot foi lé tésté komsala, sa va done lokazion suport èk pasians. 4 Mé kontinié tienbo èk pasians, pou ké lo travay li fé, i rand azot antié èk okin défo dan tout domèn, san mank azot rien. 5 Donk, si inn an parmi zot i mank la sajès, ké li domand sa toultan Bondié, parské li done tout domoun èk gran kèr é san fé roproch, é va done ali sa. 6 Mé ké li kontinié gard la foi kan li domand sa, san la doutans, parské sak néna la doutans lé kom bann lam la mèr ké lo van i pous dan tout dirèksion. 7 In moun komsa i doi pa atann gingn in zafèr ansanm Jéova ; 13 Kan in moun lé dann malizé, i fo pa li di : « Bondié lé antrinn tès amoin. » Pèrsone i pé tès Bondié avèk bann mové zafèr, é li mèm i tès pa pèrsone komsala. » 14 Mé chakèn lé tésté kan li lès ali antréné é piéjé par son prop lanvi. 15 Aprésa, kan lanvi la finn jèrmé, i fé nèt le péché ; é kan le péché lé fé, i amèn la mor. 17 Tout kado ké lé joli èk tout kado ké lé parfé i sort lao ; tousa-la i sort koté lo Papa bann lumièr dann sièl, ali k’i rès an plas, pa kom lonbraj k’i chanj toultan. 19 Mon bann frèr ké mi èm bien, i fo zot i koné : chakèn i doi èt toultan paré pou ékouté, pran zot tan avan kozé é pa pran la kolèr vitman, 20 kan in moun lé an kolèr li fé pa sak lé jus dovan lo zié Bondié. 22 Mé, i fo zot i mèt an pratik la parol Bondié, olèrk kontant azot jus ékouté, parské zot va tronp azot zot mèm par bann mové fason pansé. 26 Si in moun i pans li ador Bondié, mé ké li kontrol pa son lang, li tronp son prop kèr, é son ladorasion na poin la valèr. 27 Ala ladorasion ké nout Bondié é Papa i konsidèr kom pur é prop : okip bien sak na pu papa momon èk bann vèv dan zot malizé, é kontinié fé atansion lo monn i tach azot.