Jan

9 Kom li té pas par-la, li la vu in bonom ké té oi pa dépi li lé né. 2 É son bann disip la domand ali : « Lamontrèr, kom li oi pa dépi li lé né, kisa la péché ? Ali mèm oubien son papa momon ? 3 Jézu la répond : « Na poin pèrsone la péché ni li ni son papa momon, mé sé pou ké nou oi la puisans Bondié antrinn ajir dési li. 4 Tank i fé ankor jour i fo nou sa fé lo bann travay Sak la anvoy amoin ; la nuit i vien ousa okin moun i gingn travay. 5 Tank mi lé dési la tèr, mi lé lo fanal lo monn. » 6 Kan li té fine di tousa, li la krach atèr, li la pran son krach pou fé in pé la bou é li la mèt sa dési lo zié bonom-la, 7 é la di ali : « Alé lav aou dann basin Siloé » (in mo ké lé tradui par « anvoyé »). Li la parti é li la lav ali, é li té oi klèr kan li la artourné. 35 Jézu la aprann ké banna lavé jèt lo bonom déor é, kan li rotrouv ali, li la di ali : « Èské ou mèt out foi dan lo Garson d’lom ? » 36 Lo bonom la répond : « Ségnèr, di amoin kisa i lé pou ké mi mèt la foi an li ? » 37 Jézu la di ali : « Ou la vu ali. An vré, li lapou koz sanm ou. » 38 Li la di : « Oui, Ségnèr mi néna la foi an li. » É lo bonom la tonb a jonou dovan li.