Jénèz
49 Jakob la kri son bann garson é la di azot : « Zot tout vien azot : mi va di azot sak va arivé dan bann dèrnié jour. 8 « Aou, Juda, ou va gingn bann louanj out bann frèr. Out min sra su lo kou out bann zènmi. Bann garson out papa va pli jénou dovan ou. 9 Juda lé inn ti lion. Ou va romonté apré k’ou sra fine manj sak ou la trapé, mon garson. Li la alonj ali, li la étal ali kom in lion. É kisa i oz fé lèv in lion ? 10 Lo baton lo Roi va pa kit Juda é lo baton komandman va rès ant son bann pié juskatank Chilo i vien. I fodra ké tout bann pèp i obéi ali. 11 Li amar son lane avèk in pié rézin é son ti lane avèk in bon kalité pié rézin. Li va lav sak li port su li dann vin é son linj dann ju bann rézin. 12 Dovin i rand son zié rouj fonsé é dolé i rand son bann dan blan . 13 « Zabulon va abit koté bordmèr, koté la kot ousa bann bato lé amaré. Son frontièr va alé juska koté Sidon. 14 « Isakar lé in lane avèk bann zo solid. Li alonj ali ant lé dé sak li la pou porté. 15 Li va oir ké landroi pou ropozé lé bon, é lo péi lé bien gayar. Li va bès son zépol pou port son balo é li sra dakor pou travay kom lèsklav. 16 « Dane, kom inn an parmi bann famiy Israèl, va juj son pèp. 17 Dane sra kom in sèrpan su bor la rout, in vipèr èk bann korn su bor chemin, k’i mord bann talon cheval komsa sak lé dési son do i tonb an arièr. 18 A Jéova, nou va atand ké ou sov anou ! 19 « Gad, ali, sra ataké par in bann volèr, mé li va atak azot par dèrièr. 20 « Azèr nora dopin an kantité, é li va produi in bon kalité manjé, kom si té pou in roi. 21 « Nèftali lé in joli fémèl sèrf. Li koz in joli fason. 22 « Jozèf lé in bourjon su in piédboi k’i done lo frui, in piédboi lé akoté in sours dolo, èk son bann branch k’i pas pardsi lo mur. 23 Mé sak i tir bann flèch té jigil ali, zot té tir dési li, zot té gard la èn kont li. 24 Malgré sa, li té tienbo for son lark, é son bann min té rès for é vif. Sa té i sort dan bann min lo puisan Jakob, lo gardien mouton, lo roch Israèl. 25 Li sort koté lo Bondié out papa, é Bondié va èd aou. Li lé ansanm lo Toupuisan, é Bondié va béni aou, é pousa, li va done aou bann bénédiksion k’i sort dann sièl é sak i sort andsou la tèr, é osi bann bénédiksion k’i sort dan bann tété é lo vant. 26 Bann bénédiksion out papa sra pli gran bann bénédiksion bann montagn k’i dur pou toultan, é bann zafèr atiran su bann ti montagn, ké lé la pou toultan. Banna va rès su la tèt Jozèf, su lo koko d’tèt sak la été séparé avèk son bann frèr.