Égzod
10 Alor Jéova la di Moiz : « Alé aou dovan Faraon, parské moin la lès son kèr é lo kèr son bann sèrvitèr andursi, komsa mi va gingn fé mon bann mirak jus dovan li 2 é osi ou va gingn rakont out bann garson é out bann ti zanfan koman moin la puni bann Zéjipsien é kèl mirak moin la fé an parmi zot ; é vréman, zot va konèt ké mi lé Jéova. » 3 Alor Moiz é Aaron lé vnu dovan Faraon é la di ali : « Ala sak Jéova, lo Bondié bann Zébré, la di : “Juska kan ou voudra pa soumèt aou dovan moin ? Lès mon pèp alé pou ké li sèrv amoin. 4 Si, ankor in foi, ou rofuz lès mon peup alé, domin mi anvoy bann chipèk dan out péi. 5 Bann chipèk-la va kouv tout lo péi, é pèrsone i gingnra pa oir atèr. Banna va anval sak la grèl la pa détrui, sak la grèl la lès pou zot, é banna va manj tout zot bann piédboi k’i pous dann plantasion. 6 Zot va ranpli out bann kaz, la kaz out bann sèrvitèr é bann kaz dan tout Léjip : zot bann papa é zot bann granpèr nora jamé vu in zafèr komsala dépi ké banna lé dann péi la juska jordi.” » Aprésa li la vir son do é li la sort dovan Faraon. 7 Bann sèrvitèr Faraon la di ali : « Juska kan bonom la i sa kontinié ménas anou ? Lès bann domoun la alé, pou sèrv Jéova zot Bondié. Ou oi pa mèm ké péi Léjip lé ravajé ? » 8 Alor, la fé artourn Moiz é Aaron ché Faraon, é li la di azot : « Alé sèrv Jéova zot Bondié. Mé kisa va alé alor ? » 9 Moiz la répond : « Nou va alé avèk nout bann jèn marmay é nout bann gramoun, avèk nout bann garson é nout bann fi, avèk nout bann mouton é nout bann bèf, parské nou sa fé in fèt pou Jéova. » 10 Alor li la di azot : « Si jamé mi lès azot alé, azot é zot bann zanfan, sé ké vréman Jéova lé avèk zot ! Lé klèr ké zot i vé fé in zafèr mové. 11 Non ! Rienk bann bonom i poura alé sèrv Jéova, parské sé sak zot la domandé. » Aprésa la poursuiv azot an déor ché Faraon. 12 Alor Jéova la di Moiz : « Tann out min su Léjip pou amèn bann chipèk su tout lo péi, komsa banna i anval tout kalité plant la grèl la pa détrui. » 13 Toutsuit, Moiz la tann son baton su Léjip. É Jéova la fé lèv in van i sort koté lès su lo péi, tout la journé é tout la nuit. Lo matin, lo van i sort koté lès la amèn bann chipèk. 14 Bann chipèk la ariv su tout Léjip é la poz su tout lo téritoir. Lété vréman grav ; avansa, jamé lavé in kantité chipèk komsala é aprésa, noré jamé in kantité komsa. 15 Banna la kouv tout lo péi partou, é akoz sa, dann péi té i fénoir. Banna la anval tout kalité plant é tout bann frui bann piédboi la grèl lavé pa détrui. Lavé pu fèy vèr su bann piédboi, ni okin plant dann plantasion dan tout Léjip.