2 Kronik

16 Dan lo 36ièm lané kan Aza té roi, Baasa lo roi Israèl la atak Juda. É li la komans rokonstrui la vil Rama pou anpèch domoun rantré sorti dann téritoir Aza lo roi Juda. 2 Alor Aza la trap larjan èk lor dan bann sal trézor lo tanp Jéova é dann palé lo roi, é li la anvoy tout pou Bènadad lo roi la Siri, ké té abit Damas, é navé mésaj-la avèk : 3 « Néna in lakor ant ou é moin, é ant mon papa é out papa. Mi anvoy pou ou larjan èk lor. Siouplé, kas lakor ké ou néna ansanm Baasa lo roi Israèl, pou ké li sort dési mon téritoir. » 7 Dann tan-la, lo voyan Anani la vni oir Aza lo roi Juda é la di ali : « Parské ou la fé konfians lo roi la Siri olèrk fé konfians Jéova out Bondié, ou poura pu kont dési larmé lo roi la Siri. 8 Bann Zétiopien é bann Libien lété in gran larmé èk in bonpé char èk kavalié, pa vré ? Pourtan, kom ou la fé konfians Jéova, li la done aou la viktoir dési banna. 9 Oui, lo zié Jéova i fé lo tour tout la tèr, parské li vé mont son fors anvèr sak néna in kèr antié pou li. Ou la aji in fason bèt dann situasion-la ; astèr, nora bann gèr kont ou.»