2 Kronik

34 Jozias lavé 8 an kan li la ni roi, é li la rès 31 an kom roi Jéruzalèm. 2 Li la fé sak lé bien dovan Jéova ; li la suiv légzanp David son zansèt é li la pa dévir ni a droit ni a goch. 3 Kan té dan lo 8ièm lané ké li té roi, alork li té ankor in jèn marmay, li la komans rod lo Bondié David son zansèt ; é, kan li té dan son 12ièm lané kom roi, Jozias la komans fé in laproptaj dann Juda èk Jéruzalèm, li la détrui bann landroi ousa té pratik bann fo ladorasion, li la tir bann poto sakré, bann zidol èk bann lèstatu an font. 9 Banna la parti oir lo gran prèt Ilkia é la done ali larjan lavé gingné pou lo tanp Bondié, é ké lo bann Lévit té sèrv kom gardien la port, lavé ramasé èk bann zabitan Manasé, Éfraim é tout lo rès Israèl, Juda, Binjamin é Jéruzalèm. 10 Aprésa la done larjan sak lété nomé rèsponsab bann travo lo tanp Jéova. É bann travayèr la utiliz larjan-la, pou rofé é répar lo tanp Jéova. 11 La done larjan bann zartizan é bann travayèr batiman pou ké zot i achèt bann pièr tayé é bann boi pou ranfors la charpant é ké zot i ranplas bann gro piès doboi dan bann batiman ké bann roi Juda lavé lès gréné. 14 Kan zot la parti trap larjan ké banna lavé amèn dan lo Tanp, lo prèt Ilkia la trouv lo liv la Loi ké Jéova lavé done Moiz. 18 Chafane lo sékrétèr la ardi osi : « Lo prèt Ilkia la done amoin liv-la. » É Chafane la komans lir lo liv dovan lo roi. 19 Dèk lo roi la antand sak té ékri dan la Loi, li la déchir son linj. 20 Aprésa lo roi la done in lord Ilkia, Aikam garson Chafane, Abdone garson Miché, Chafane lo sékrétèr èk Asaya lasistan lo roi. Li la di : 21 « Alé poz kèstion ansanm Jéova, pou moin é pou sak lé ankor dann Israèl èk Juda, konsèrnan sak lé ékri dan lo liv ké nou la trouvé. La raj Jéova néna kont nou lé for, parské nout bann zansèt la pa rèspèk la parol Jéova. Banna la pa fé kom lé ékri dann liv-la. »