Jénèz

39 Bann Zismaélit la amèn Jozèf dann péi Léjip. Banna la vand ali èk in Léjipsien k’i apèl Putifar, in fonksionèr Faraon, li té lo chèf la gard lo roi. 2 Mé Jéova té avèk Jozèf. Sé pousa Jozèf té ansort ali dann tout sak li té fé é la mèt ali rèsponsab dan la kaz son mèt, in Léjipsien. 3 É son mèt la konpri ké Jéova té ansanm li é té èd ali ansort ali dann tout sak li té fé. 4 Jozèf lavé la favèr son mèt, ké la gard ali pou travay pou li. 5 Kan Putifar la fé Jozéf chèf dan son kaz é la mèt ali pou gard tout sak lété ali, Jéova té béni toultan la kaz Léjipsien gras Jozèf. Jéova té béni tout sak li néna dan son kaz é dan son plantasion. 6 Avèk lo tan, Putifar la lès Jozèf jèr tout sak lété ali. Li té fé pu rien, tank li lavé pou manjé. Jozèf lé vnu in joli garson é an plis ké sa, kosto. 7 Lo madam Putifar la komans gèt Jozèf é la di ali : « Kouch èk moin ! » 8 Mé li té rofuz é li té di èk lo madam son mèt : « Akout, mon mèt la done amoin tout sak lé ali é li fé pu rien dan la kaz. 9 Na poin pèrsone lé odsi d’moin dann kaz la, é li la rien rofuz amoin, sof ou, parské ou lé son madam. Koman mi pouré fé in zafèr si tèlman mové é pèch kont Bondié ? » 10 Èl té koz èk Jozèf tou lé jour, mé jamé li la aksèpté pou kouch èk èl ni rès ansanm èl. 11 In jour, li la rant dan la kaz pou fé son travay, é okin sèrvitèr lété la. 12 Alor èl la trap ali par son linj, la di : « Kouch èk moin ! » Mé li la lès son linj dan son min é li la chap vit pou alé déor.