Matié

5 Kan Jézu la vu lo gran kantité domoun navé, li la mont su in montagn é li la trouv inn ti plas ousa li la asiz. É son bann disip la ni koté li. 2 É la, li la komans aprann azot bonpé zafèr é li la di azot : 3 « Sak i rokoné zot la bézoin Bondié i gid azot dan zot vi, lé éré, parské lo gouvèrnman Bondié dann sièl, lé pou zot. 4 « Sak i plèr lé éré, parské zot sra konsolé. 5 « Sak néna la dousèr dan zot tanpéraman lé éré, parské zot nora la tèr pou zot. 6 « Sak i vé vréman konèt la justis lé éré, parské Bondié va done azot sa an kantité. 7 « Sak i pardone lé zot lé éré, parské zot sra pardoné. 8 « Sak zot kèr lé sinsèr lé éré, parské zot va oir Bondié. 9 « Sak i travay pou la pé lé éré, parské va apèl azot zanfan Bondié. 10 « Sak i souf parské zot i fé lo bien lé éré, parské lo gouvèrnman Bondié dann sièl lé pou zot. 11 « Kan domoun i jur azot, i maltrèt azot é i di tout kalité zafèr mantèr su zot parské zot i suiv amoin, zot lé éré. 12 Parské sé komsa mèm ké té maltrèt bann profèt Bondié dann tan lontan. Mé ké zot kèr lé ranpli èk la joi, parské Bondié va done azot in gran rékonpans. 13 « Zot lé kom dosèl dan so monn-la. Mé si dosèl la pu lo gou d’sèl, koman arfé ni ali salé ? Li sèrv pu rien, li lé jus bon pou jèt déor komsa domoun i march dési. 14 « Zot lé kom in lumièr dan so monn-la. I gingn pa kachièt in vil kan li lé anlèr in montagn. 15 Kan i alum in lanp, i mèt pa li sou in panié. I mèt ali su la tab, komsa li éklèr tout sak lé dan la kaz. 16 Bin lé parèy pou zot, fé briy zot lumièr, omoin lé zot i oi ali. Komsa banna va oir bann bon zafèr zot i fé é va done la gloir zot Papa dann sièl. 17 « Kroi pa moin la ni di azot ké sak lé ékri dan la loi Moiz é sak bann profèt la di i sèrv pu rien. Non sé pa pou sa moin la ni. Moin la ni plito pou ké sak lé ékri dan la loi Moiz é sak bann profèt la di i èspas vréman. 18 Franch vérité mi di azot, lé pli fasil fé disparèt lo sièl èk la tèr, ké fé disparèt inn ti lèt oubien inn ti poin su in “i” dan la loi Moiz. Parské tout sak lé ékri dan la loi Moiz va èspasé vréman. 19 Donk si in moun i obéi pa, mèm inn ti gigine an parmi bann komandman-la, é li aprann lé zot fé kom li, li mérit pa rant dan lo gouvèrnman Bondié. Parkont sak i obéi bann loi-la é i aprann lé zot fé kom li, ali li mérit rant dan lo gouvèrnman Bondié. 20 Oui mi di azot, si zot foi lé pa pli gran ké sak bann farizien é sak i amont la loi, zot i rant arpa dutou dan lo gouvèrnman Bondié. 21 « Zot i koné ké la di zot bann zansèt : “Ou doi pa tué, sak i tué va pas dovan tribunal.” 22 Mé amoin mi di azot ké sé sak i rès an kolèr kont son frèr va pas dovan tribunal é sak i jur son frèr va pas dovan in pli gran tribunal ankor é sak i di son frèr : “Spès fou va !”, ali parkont li sra détrui. 23 « Si ou sava aport in nafèr pou Bondié, é ké ou souvien aou ké out frèr lé faché ansanm ou, 24 lès sak ou la aporté tèr la mèm dovan lotèl sakrifis, alé dabor fé la pé èk out frèr. Aprésa arvien, é la ou va gingn done sak ou lavé prévu pou Bondié. 25 « Si in moun i ral aou dovan tribunal, trouv vitman in lantant èk li avan zot i ariv dovan tribunal. Sinonsa lo juj i riskab kondane aou é di lo gardien trap aou é mèt aou la jol. 26 É mi pé asur aou, i larg arpa ou tank ou nora pa fini ranbours tout sak ou doi. 27 « La toultan amont azot : “I fo pa ou tronp lo moun èk ki ou lé marié.” 28 Mé amoin mi di azot ké sak i rogard in not madam juska tank li néna in mové lanvi pou èl, la fine tronp son madam dan son kèr. 29 Si out koté d’zié droit i pous aou fé in péché, rach ali é jèt ali loin. Parské i vo mié pou ou pèrd rienk in morso out kor ké pèrd tout, si i détrui aou. 30 Astèr si sé out min droit i pous aou fé in péché, koup ali é jèt ali loin. Parské i vo mié pou ou pèrd rienk in morso out kor ké pèrd tout, si i détrui aou. 31 « La di azot osi : “Sak i divors èk son madam i doi done aèl in papié divors.” 32 Mé amoin mi di azot ké si in madam la pa fé in péché sèksuèl, son bonom i doi pa divors èk èl. Parské si li divors èk èl, li riskab pous aèl foté, é si in not bonom i marié èk madam divorsé-la, ali osi li la pou foté. 33 « Zot i koné ké la di zot bann zansèt : “Ou doi pa done out parol é aprésa pa rèspèk ali. Mé ou doi fé tout sak ou la promèt Jéova.” 34 Mé amoin mi di azot : Jur pa par rien dutou. Jur pa par lo sièl, parské sé dann sièl ké Bondié lé asiz su son trone, 35 jur pa par la tèr, parské la tèr lé kom inn ti ban ousa Bondié i poz son pié. Jur pa par Jéruzalèm non pli, parské sé la vil Bondié. 36 Jur pa su out tèt non pli, parské ou gingn pa fé an sort k’in sèl chévé out tèt i vien blan oubien noir. 37 Si zot i di “oui” zot i sar fé in nafèr, fé ali. Si zot i di “non” zot i sar pa fé in nafèr, fé pa li. Parské si zot i di in nafèr mé ké an ddan zot mèm zot i pans in not nafèr, zot la pou fé kom lo Diab. 38 « La toultan amont azot : “Si in moun i tap aou dan out zié, artap ali dan son zié parèy. Si in moun i kas out dan, arkas son dan parèy.” 39 Mé amoin mi di azot : Si in moun lé mové èk zot, fé pa parèy èk li. Si in moun i pas aou in kalot, ardone ali lot koté figur. 40 Si in moun i vé ral aou dovan tribunal pou pran out chomiz, done ali out palto osi. 41 Si in moun i komand, i domand aou fé in kilomèt èk li, fé pa rienk inn mé fé dé kilomèt èk li. 42 Si in moun i domand aou in nafèr, done ali. Si in moun i domand aou prèt ali in nafèr, di pa li non. 43 « La toultan amont azot : “Ou doi èm out prochin é détès out bann zènmi.” 44 Mé amoin mi di azot : Èm zot bann zènmi é pri pou sak i maltrèt azot. 45 Komsa zot va rosanm zot Papa dann sièl. Parské li fé lèv solèy su toulmoun, sak lé mové kom sak lé bon. É li fé tonb la pli su toulmoun, sak lé bon kom sak lé mové. 46 Si zot i èm rienk domoun i èm azot, zot i kroi zot i mérit in nafèr pou sa ? Mèm domoun i ramas zinpo osi i fé sa. 47 É si zot lé janti rienk èk zot kamarad, zot i kroi zot i fé in nafèr èspésial zot-la ? Mèm domoun i koné pa koman ador Bondié zot osi i fé sa. 48 Zot i doi fé mont in lamour parfé, kom zot Papa dann sièl i fé.