Égzod

21 « Ala bann zinstruksion ke ou va donn azot : 2 « Si ou achté in lésklav ébreu, li sra ésklav sis zané, mé le sétièm lané, li sra libéré san pèy rien. 3 Si li ariv touseul, li va artourn touseul. Si li néna in madam, alor i fodra ke son madam i sa va avèk li. 4 Si son mèt i donn ali in madam é ke èl i fé bann garson ou bann fiy avèk li, le madam é son bann zanfan va apartien son mèt, é li, li va alé touseul. 5 Mé si lésklav i insis pou di : “Mi ièm mon mèt, mon madam é mon bann zanfan, mi ve pa èt libéré”, 6 i fodra son mèt i amèn ali devan le vré Bondieu. Aprésa son mèt va amèn ali koté la port oubien le montan la port, é va pèrs son zorèy avèk in poinson, é li sra son lésklav tout la vi. 7 « Si in bonom i vann son fiy kom lésklav, èl i sra pa libéré parèy bann zésklav garson. 8 Si èl i déplé son mèt é ke li pran pa èl kom madam, mé ke li fé achté aèl par kèlkin dot, li nora pa le droi vann aèl bann zétranjé, parske li la trayi aèl. 9 Si li la choizi aèl pou son garson, li va done aèl bann mèm droi k’in fi. 10 Si li pran in not madam pou li, li va pa diminué le manjé, le linj é relasion séksuèl avèk le premié madam. 11 Si li fé pa se bann troi zafèr la pou èl, alor i fodra èl sa va lib san pèy rien. 12 « Sak i donn in kou in bonom tèl fason li mor i doi èt tué. 13 Mé si li la pa fé sa éspré é ke le vré Bondieu i pèrmèt ke sa i ariv, mi va mont aou in landroi ousa li poura sové. 14 Si in bonom i mèt ali vréman an kolèr kont in moun é i fé éspré tué ali, i fodra li mor mèm si li la rod kachièt koté mon lotèl pou sakrifis. 15 Sak i donn in kou son papa ou son momon i doi èt tué. 16 « Si kèlkin i anlèv in bonom é i vann ali, oubien ke i trap ali alor ke li retien in bonom ke la été anlevé, li doi èt tué. 17 « Sak i modi son papa ou son momon, i doi èt tué. 18 « Ala kosa i fodra i éspas si bann bonom i batay é si inn i donn lot in koudgalé oubien in koudpoin é ke le moun i mor pa, mé ke li doi rès dann li : 19 Si sak la gingn le kou i ariv levé, marché avèk in baton é sort deor, sak la donn ali le kou i sra pa puni. Li va donn seulman in konpansasion pou le tan travay ke le blésé la pèrd juskatank li géri bien mèm. 20 « Si in bonom i donn in kou son lésklav (bonom oubien madam) avèk in baton é ke lésklav i mor akoz le bann kou, li doi èt vanjé. 21 Mé si li rès vivan inn ou deu jour, li sra pa vanjé, parske sé kèlkin ke lavé été achté avèk larjan son mèt. 22 Si bann bonom i batay, ké zot i bouskul in madam ansint é kèl i akouch avan lèr, mé ké pèrsone lé mor, i fodra lo koupab i pèy in konpansasion ké lo mari lo madam va oblij ali péyé ; li va pèy sa dapré lo désizion bann juj. 23 Mé si in moun i mor dan laksidan, i fodra ou done in vi pou in vi,