Égzod
19 Le troizièm moi apré ke bann Zisraélit té finn kit Léjip, le mèm jour, banna la ariv dann dézèr Sinayi. 2 Zot la kit Refidim é la ariv dann dézèr Sinayi, é zot la kanpé dann dézèr. Israèl té i kanp tèrla, an fas la montagn. 3 Alor Moiz la mont juska le vré Bondieu, é depui la montagn Jéova la kri ali é la di ali : « Ala kosa ou va di avèk bann désandan Jakob, sak ou va anonsé avèk bann Zisraélit : 4 “Zot la vu par zot mèm sak ma la fé bann Zéjipsien pou port azot su bann zèl bann lègl é amèn azot juska moin. 5 Astèr, si zot i obéi amoin totalman é si zot i réspèk le kontra ma la pasé, zot va devnir mon bien ke na la valeur anparmi tout bann peup, parske tout la tèr i apartien amoin. 6 Zot va devnir pou moin in roiyom bann prèt é in peup ke lé sin.” Sé sa bann parol ke ou va di bann Zisraélit. » 7 Donk Moiz la parti rasanm bann zansien anparmi le peup é la raport azot tout sak Jéova lavé ordonn ali. 8 Aprésa, tout le peup té dakor ansanm pou réponn : « Tout sak Jéova la di, nou lé paré pou fé. » Toutsuit Moiz la parti raport avèk Jéova le répons le peup. 9 É Jéova la di Moiz : « Mi sar ni juska ou dan in nuaj noir pou ke le peup i antan kan mi sar koz avèk ou é pou ke zot na ankor la foi an ou osi. » Aprésa Moiz la raport Jéova bann parol le peup. 10 Aprésa Jéova la di Moiz : « Alé vèr lo pèp é rand azot pur zordi é domin, é i fodra ké banna i lav zot linj. 11 I fodra ke zot lé paré pou le troizièm jour, parske le troizièm jour Jéova va désann su la montagn Sinayi, devan bann zieu tout le peup. 12 I fodra mèt bann born pou le peup tout otour la montagn é di ali : “Fé atansion pou pa mont dan la montagn ni touch le bor. Sak va touch la montagn i sra tué san manké. 13 I fodra pa okin min i touch sak la péché : li sra tué soi avèk koudgalé, soi par bann flèch. Ke lé in bonom ousoi in zanimo, li va pa rès vivan.” Mé kan le korn bélié va soné, banna poura monté dan la montagn. » 14 Alor Moiz la désann anba la montagn pou ni juska le peup ; li la komans rann pur le peup, é banna la lav zot linj. 15 Li la di èk le peup : « Prépar azot pou le troizièm jour. Fo pa zot néna bann rapor séksuèl. » 16 Le matin le troizièm jour, lavé loraj é bann zéklèr, in gro nuaj su la montagn, é le son in korn vréman for. É tout le peup dan le kanpman la gingn kap kap. 17 Alor Moiz la fé sort le peup an deor le kanpman pou ke zot i sa va juska le vré Bondieu ; é zot la mèt azot anba la montagn. 18 Su la montagn Sinayi lavé la fumé, parske Jéova lavé désann su la montagn dann fe ; é la fumé té i mont kom la fumé in four, é tout la montagn té i tranm for. 19 Alor ke le son le korn té devien plu for ankor, Moiz té i koz é la voi le vré Bondieu té réponn ali.