Jan

2 É lo troizièm jour, lavé in gran fèstin mariaj dan la vil Kana, dann Galilé, é lo momon Jézu osi lé té la. 2 Jézu é son bann disip lété invité osi pou fèstin mariaj-la. 3 In moman doné navé pu dovin, lo momon Jézu la di ali : « Banna na pu dovin. » 4 Mé Jézu la di aèl : « Fanm, èské sa i konsèrn nout dé ou sa ? Mon lèr la pokor arivé la. » 5 Son momon la di èk sak té i sèrv : « Fé tout sak li va di azot. » 6 Koté la mèm lavé sis jar an pièr ké bann Juif té ansèrv pou lav azot dapré zot koutum. Dann chakèn té pé rant ant 40 é 70 lit dolo. 7 Jézu la di azot : « Ranpli bann jar la èk dolo. » Banna la ranpli lo bann jar jusko bor. 8 Aprésa li la di azot : « Astèr pran inn ti pé ddan é amèn sa pou sak la organiz la fèt-la. » Alor banna la aport in pé pou lo moun. 9 Lo moun la organiz la fèt, la gout lo ti pé dolo ké té viend transform an vin. Li té koné pa ousa dovin-la té i sort, alork lo bann sèrvitèr ké lavé trap lo ti pé dolo té koné zot. Aprésa sak la organiz fèt la parti koz èk lo marié 10 é la di ali : « La plipar domoun i sèrv dovin ké lé pli méyèr an promié, é aprésa kan domoun fine sou, la zot i done dovin mové kalité. Aou, ou la ramas lo pli méyèr vin juska lèr. » 11 Jézu la fé sa dann vil Kana dann Galilé laba : lété lo promié mirak li la fé, lèr la li la fé mont son pouvoir, é son bann disip la mèt zot foi an li. 12 Aprésa, ali, son momon, son bann frèr é son ban disip la désand Kafarnaom, mé zot la pa rès lontan laba. 13 Té i tard pa, bann Juif té sa fèt la Pak, alor Jézu la mont Jéruzalèm. 14 Kan li la ariv dan lo tanp, li la trouv bann vandèr té pou vand bèf, vand mouton é vand kolonm, navé osi sak té asiz su zot ti ban pou chanj larjan. 15 Alor li la fabrik in chabouk èk la kord, é li la chas tout banna an déor lo tanp èk zot bann mouton èk zot bèf, é li la jèt atèr tout bann piès la moné d’sak té chanj larjan é li la chavir zot tab. 16 É li la di èk sak té vand bann kolonm : « Tir amoin bann zafèr-la tèrla ! Arèt fé èk la kaz mon Papa in plas i fé komèrs ! » 17 Son bann disip la rapèl azot ké lé ékri : « Lo gran lamour moin néna pou out kaz va bouy an ddan moin. » 18 Alor bann Juif la di ali : « Té kèl mirak ou lé kapab fé k’i done aou lo droi fé sa ? » 19 Jézu la répond azot : « Grèn lo tanp-la, é moin an troi jour mi va armèt ali dobout. » 20 Alor bann Juif la di ali : « La pran 46 zan pou fé lo tanp-la, é aou, ou gingn armont ali an 3 jour ? » 21 Mé lo tanp li té pou koz dési té son kor. 22 Sé pou sa ké kan la résusit ali, son bann disip la rapèl azot ké souvan li té di sa, é zot la kroir sak bann Zékritur é sak Jézu li mèm lavé di. 23 Malgré sa, lèr la kan li té Jéruzalèm pou la fèt la Pak, bonpé la komans kroir an li kan zot la vu lo bann mirak li té i fé. 24 Mé Jézu té fé pa zot konfians, parské li té koné toulmoun 25 é li lavé pa bézoin k’in moun i èsplik ali in nafèr su domoun, parské li té koné kosa in moun néna dan son kèr.