Jénèz
3 An parmi tout bann zanimo sovaj Bondié Jéova la fé, lo sèrpan té lo pli malin. Li la domand èk la fanm : « Èské Bondié la vréman di ké zot i doi pa manj bann frui su tout bann piédboi dann jardin ? » 2 La fanm la répond lo sèrpan : « Nou pé manj bann frui su bann piédboi dann jardin. 3 Mé konsèrnan bann fri lo piédboi dann milié lo jardin, Bondié la di : “Zot i doi pa manj sa, non, zot i doi pa touch sa, sinonsa zot va mor.” » 4 Mé, lo sèrpan la di èk la fanm : « Lé sur ké zot i sa pa mor dutou. 5 Parské Bondié i koné ké lo jour mèm ousa zot va manj sa, zot zié va rouvèr é zot i sra kom Bondié : zot va konèt sak lé bien é sak lé mové. » 6 Alor la fanm la vu ké bann frui lo piédboi lété bon é joli, ké lo piédboi lété plézab pou rogardé. Donk, èl la pran in frui é la manj ali. Aprésa, kan èl lété èk son mari, èl la done ali, é li la manjé. 15 Mi va mèt la èn ant ou é lo madam, ant out désandans é son désandans. Li va kraz out tèt, é ou va blès ali su talon. » 19 Juskatank ou va rotourn dan la tèr, landroi ousa la tir aou, ou va transpiré pou gingn out pin pou manjé. Ou lé fé èk la pousièr é ou va rotourn an pousièr. » 20 Aprésa, Adan la apèl son madam Èv, parské li té sa vnir lo momon tout sak lé vivan. 23 Alor Bondié Jéova la poursuiv ali an déor lo jardin Lédèn pou travay la tèr landroi ousa li té sort. 24 Donk, li la chas lom é, dann koté lès lo jardin Lédèn, li la mèt an plas bann chérubin é in lépé an fé ké té i tourn san arété pou survèy lo chemin k’i amèn juska lo piédboi k’i done la vi.