1 Tésalonisien

5 Donk frèr, zot la pa bézoin nou ékri azot pou okin zafèr, kisoi su bann tan oubien su bann lépok. 2 Parské zot mèm zot i koné tré bien lo jour Jéova i vien kom in volèr dan la nuit. 3 Kan banna va di : « Pé é sékurité ! », la mèm mèm in déstruksion va ariv su zot toudinkou, sra kom bann doulèr lakouchman su in fanm i sa gingn zanfan ; é lé sur zot i gingnra pa chap lo may. 4 Mé azot mon bann frèr, zot lé pa dann fénoir. Donk jour la i sézira pa zot toudinkou parèy kom féklèr gran matin i sézi toudinkou bann volèr, 5 parské zot tout lé bann garson la lumièr é bann garson lo jour. Nou may pa ni èk la nuit ni èk fénoir. 6 Sé pousa, alon pa dormi kom lé zot moun, mé alon kontinié véyé é alon gard nout kapasité pou bien rézoné. 7 An vré sak i dor, sé la nuit ké zot i dor, é sak i boir pou soulé, sé la nuit ké zot i boir pou soulé. 8 Mé anou ké lé dann féklèr, alon gard nout kapasité pou bien rézoné, alon mèt la kuiras la foi èk lamour dési nou, é alon mèt lo kas lèspoir nou néna pou èt sové, 9 parské Bondié la pa choizi anou pou gout son kolèr, mé pou èt sové gras Jézu kris nout Ségnèr. 11 Sé pou sa kontinié ankouraj azot é rand azot pli for inn é lot, kom dayèr zot i fé. 12 Frèr, nou domand azot fé mont zot rèspé pou sak i travay dur an parmi zot, k’i gid azot dan lo Ségnèr é k’i avèrti azot, 13 é fé mont in gran lèstim èk lamour osi pou zot, pou lo travay zot i fé. Viv an pé ant zot. 14 An plis ké sa, nou konsèy azot frèr : avèrti sak i ékout pa, koz in fason k’i konsol sak la pèrd kouraj, soutien bann fèb, mont la pasians èk tout domoun. 17 Pri toultan. 18 Di mèrsi pou tout zafèr. Sé sa Bondié i atand dé zot, ké lé uni avèk Jézu Kris. 21 Rogard par zot mèm tout bann zafèr ; tienbo larg pa sak lé bien bon.