Matié

6 « Tansion pangar zot i fé lo bien rienk pou fé romark azot par domoun, sinonsa zot papa dann sièl i rékonpans arpa zot. 2 Donk kan ou done in nafèr bann pov, alé pa fane sa partou. Sé bann lipokrit i fé sa pou k’i mèt azot an lèr, kan zot i sava ador Bondié ou kan zot lé dann chemin. Mé mi pé asur azot, sé pa plis ké sa ké zot va gingné. 3 Mé aou-la, kan ou done in nafèr bann pov, alé pa di sa pèrsone. 4 Fé plito an sort ké pèrsone i koné, alor lèr-la, out Papa ké li, li oi aou, va rékonpans aou. 5 « An plis ké sa kan zot i pri, fé pa kom bann domoun i fé sanblan. Zot i èm mèt azot dobout kan zot i sa la priyèr, oubien zot i pri dann chemin dovan toulmoun pou k’i romark azot. Mé mi pé asur azot, sé pa plis ké sa ké zot va gingné. 6 Mé aou astèr, kan ou sa fé out priyèr, rod inn ti plas ousa pèrsone i oi pa ou, é la, pri out Papa. Mèm si pèrsone i oi pa li-la, ali li oi aou li, é li va rékonpans aou. 7 Kan zot i fé zot priyèr, répèt pa toultan lo mèm zafèr, sé domoun i koné pa koman ador Bondié i fé sa. Banna i kroi ké Bondié va ékout azot parské zot i koz in ta. 8 Mé azot-la fé pa kom banna, parské mèm si zot la pokor domand ali in nafèr, zot papa i koné déja kosa zot la bézoin. 9 « Ala koman i fo zot i pri : « “Nout Papa dann sièl, ké out non i rès sin. 10 Nou pri aou pou ké out gouvèrnman i dirij la tèr, pou ké su la tèr tout zafèr i èspas kom ou ou vé, parèy kom dann sièl. 11 Pou jordi siouplé, done anou lo ti bouché manjé nou la bézoin, 12 é pardone anou pou bann mové zafèr nou fé, kom nou mèm nou pardone sak la fé anou lo mal. 13 É èd anou kan nou lé tanté pou fé in mové zafèr é protèj anou kont lo Diab.” 14 « Zot Papa dann sièl va pardone azot bann mové zafèr zot i fé, si azot osi zot i pardone sak la fé azot lo mal. 15 Mé si zot i pardone pa lézot kan banna i fé azot lo mal, zot Papa dann sièl non pli i pardone arpa zot bann mové zafèr zot i fé. 16 « Kan zot i fé karèm, fé pa zot pitié pou fé oir toulmoun ké zot i manj pa. Sa sé bann lipokrit i èm fé sa. Zot i fé oir su zot figur ké zot i fé pitié, komsa toulmoun i koné zot lé an karèm. Mé mi pé asur azot, sé pa plis ké sa ké zot va gingné. 17 Mé ou, kan ou fé karèm, pas luil dann out tèt é lav out figur, 18 komsa lé zot i oir arpa ou lé an karèm. Na rienk out Papa tousèl va konèt sak ou lé antrinn fé. É mèm si pèrsone i oi pa li-la, ali, li oi aou li, é li va rékonpans aou. 19 « Arèt travay dur rienk pou ramas bonpé lo bien su la tèr, ousa lo mit èk la rouy i pé gat tousala, é bann volèr i gingn kasé é rantré pou volé. 20 Fé plito tout sak zot i pé pou fé bann zafèr ké na la valèr pou Bondié dann sièl. Parské lo mit èk la rouy i pé pa gat bann zafèr-la, é bann volèr non pli i gingn pa kasé é rantré pou volé. 21 Parské sak i kont lo plis pou ou, sé sa mèm toultan ou va majiné dan out tèt. 22 « Out dé zié lé kom in lanp i done aou la lumièr ou la bézoin. Si out zié lé kalé su lo bon zafèr, alor li va éklèr aou bien kom i fo. 23 Mé si out zié i amèn aou ral lo kèr su sak ou oi, alor ou sra pri dann fénoir. I sré vréman maléré pou ou ké out zié, ké soidizan i doi éklèr aou, i mèt aou dann fénoir. 24 « Pèrsone i gingn pa travay kom zèsklav pou dé mèt. Si li èm inn, li va détès lot. É si li lé fidèl èk inn, li rèspèk arpa lot. Donk si pou zot sé larjan lo zafèr lo pli inportan dan zot vi, zot i gingn arpa sèrv Bondié. 25 « Sé akoz sa mi di azot : Arèt trakas azot pou zot mèm, pou sak zot va manjé ou sak zot va boir. É arèt trakas azot osi pou linj zot i mèt su zot. Zot vi lé pli inportan ké lo manjé é zot kor lé pli inportan ké lo linj zot i mèt su zot. 26 Agard bann zoizo, banna i sèm pa lo grin é banna i ramas pa sa dann magazin. Pourtan zot Papa dann sièl i done banna manjé. Èské zot i vo pa plis ké banna ? 27 Kisa an parmi zot, kan li trakas ali, lé kapab ralonj, mèm inn ti gine, la longèr son vi ? 28 É poukosa trakas azot pou linj zot i mèt su zot ? Rogard kosa bann lis dann chan i aprann azot : bann flèr-la i fé pa zéfor pou pousé é zot i koud pa zot linj non pli. 29 Mé mi di azot ké mèm lo roi Salomon, rich kom li lété, èk tout la gloir li lavé, li la jamé été abiyé osi joli ké bann flèr-la. 30 Bann flèr-la i dur in journé, aprésa i sèk, é domin i bril ali. Mé èské la pa Bondié i rand so bann flèr-la vréman joli ? Alor lé sur, li va mèm fé ankor plis pou zot, é sa, mèm si zot na poin bonpé la foi. 31 Pa bézoin trakas azot dutou pou konèt : “Kosa nou sa manjé ?” “Kosa nou sa boir ?” Oubien : “Kosa nou sa mèt su nou ?” 32 Sa sé bann domoun i koné pa Bondié i trakas pou sa. Mé zot Papa dann sièl i koné li, ké zot la bézoin bann zafèr-la. 33 « Donk, kontinié fé an sort ké zot lobéisans pou Bondié é pou son gouvèrnman i rès lo zafèr lo pli inportan dan zot vi, é la, Bondié va done azot tout bann zafèr zot la bézoin. 34 Alor, trakas pa zot dutou pou domin, parské domin nora son prop traka li. Zot néna déja asé problèm komsa pou jordi.