1 Pièr

5 Moin ké lé in zansien kom zot, moin té la kan lo Kris la soufèr é moin la vu ali osi dann son gloir, sé pousa mi ansupli bann zansien ké lé an parmi zot : 2 Okip bien lo troupo Bondié ké lé sou zot rèsponsabilité, vèy bien dési li, fé pa sa parské i fors azot, mé fé ali èk tout zot kèr dovan Bondié ; fé pa sa parské zot i èspèr gingn in zafèr an rotour mé parské zot la vréman anvi fé sa; 3 Fé pa lo komandèr dési léritaj Bondié, mé fé mont zot lé in légzanp pou lo troupo. 4 É kan lo chèf lo bann gardien troupo sra la, zot va gingn zot kourone la gloir, k’i fane pa. 5 Azot osi bann jèn, lé parèy pou zot, fé mont zot i soumèt azot anvèr bann bonom pli mur ké zot. Mèt zot sintur lumilité kan zot néna a fèr avèk lé zot, parské Bondié lé kont sak néna lorgèy, mé li done sak néna lumilité son favèr ké nou mérit pa. 6 Donk, abès azot par zot mèm sou la min puisan Bondieu, pou ke li relèv azot, kan le moman va arivé, 7 pandan ké zot i jèt tout zot traka su li, parské li fé in kont ansanm zot. 8 Tansion pangar ! Gard zot kapasité pou rézoné. Zot lènmi, lo Diab, i tourn i vir kom in lion anrajé, li rod pou manj in moun. 9 Mé drès azot kont li, for dan la foi, parské zot i koné ké tout zot bann frèr dan lo monn, i subi lo mèm kalité soufrans. 10 Mé apré ké zot sra fine soufèr in pé d’tan, lo Bondié k’i done èk gran kèr va li mèm achèv zot formasion, parské li la choizi azot pou rès dan son gloir k’i dur pou toultan, uni avèk Kris. Li va rand azot fèrm, li va rand azot for, li va rand azot solid.