Jan

3 Navé in bonom an parmi bann farizien, té apèl Nikodèm ; li té in chèf bann juif. 2 Li la ni oir Jézu kan fénoir té fine rantré pou di ali : « Lamontrèr, nou koné, ké sé Bondié la anvoy aou kom lamontrèr, parské pèrsone i gingn pa fé bann mirak ou fé la, si Bondié lé pa èk li. » 3 Jézu la di ali : « Sak mi sa di aou lé vré sa : si in moun i nèt pa ankor in foi, li gingn arpa oir lo gouvèrnman Bondié. » 4 Nikodèm la domand ali : « Koman in moun i fé pou nèt, alor ké li lé fini vié ? Li sar, kan mèm pa arrant dan lo vant son momon, é arnèt in dézièm foi ? » 5 Jézu la répond ali : « Lé vré sak mi sa di aou la : si in moun i nèt pa èk dolo, é lèspri sin, li gingn arpa rant dan lo gouvèrnman Bondié. 6 Sak lé né èk la chèr lé an chèr, é sak lé né èk lèspri, lé in lèspri. 7 Pa bézoin kas out tèt parské moin la di aou : “I fo zot i nèt ankor in foi.” 8 Lo van i souf ousa li vé li, ou antan lo dézord li fé, mé ou koné pa ousa li sort ni ousa li sava. Sé lo mèm zafèr pou sak i nèt èk lèspri. » 9 Lèr la Nikodèm la domand ali : « Par koman sa i pé èt posib ? » 10 Jézu la répond ali : « Aou, in lamontrèr dann péi Israèl, ou koné pa sa ? 11 Oui, mi di aou la vérité : nou, nou koz su sak nou koné, é nou fé konèt sak nou la vu, mé zot i vé pa ékout sak nou di. 12 Pourtan moin la èsplik azot bann zafèr i konsèrn la tèr mé zot i kroi pa mèm. Koman zot va gingn kroir si mi èsplik azot bann zafèr dann sièl ? 13 An plis ké sa, pèrsone la pokor mont dann sièl apark sak la sort dann sièl la désand, lo Garson d’moun. 14 É kom dann dézèr Moiz la pran lo sèrpan la mèt anlèr, va mèt anlèr osi lo Garson d’moun. 15 Komsa la, tout sak i kroi an li, va gingn viv pou toultan. 16 « Parské Bondié la èm lo monn si tèlman, ké li la done son sèl Garson, komsa tout domoun i fé mont la foi an li, i sra pa détrui, mé va gingn viv pou toultan. 17 Parské Bondié la pa anvoy son Garson dan lo monn pou ké li juj lo monn, mé ké lo monn lé sové gras ali. 18 Sak i fé mont la foi an li, i sra pa jujé. Mé sak i fé mont pa la foi an li la fine èt déja jujé li, parské li la pa fé mont la foi, dan lo non lo sèl Garson Bondié. 19 Ala su kosa li baz lo jujman : la lumièr la ni dan lo monn, mé domoun té i èm plis fénoir ké la lumièr, parské zot té fé sak lé mové. 20 Parské sak i fé bann zafèr ké Bondié i détès li suport pa la lumièr li, é li vien pa dan la lumièr non pli, komsa i kondane pa lo bann mové zafèr li fé. 21 Mé sak i fé sak lé bon li vien dan la lumièr li, komsa i oi bien mèm ké sak li fé, lé fé an akor èk sak Bondié i vé. » 22 Aprésa, Jézu èk son bann disip la parti an déor bann vil la Judé, é la li la pas in pé lo tan èk banna, é li té batiz domoun osi. 23 Mé Jan osi té batiz tèr laba Énone, koté Salim, parské laba lavé bonpé d’lo, é domoun té arèt pa ni pou fé batiz azot ; 24 parské té pokor atrap Jan é anvoy ali an prizon. 25 Lèr-la, la èspas in ralé pousé ant in Juif é bann disip Jan su sak in moun i doi fé pou èt prop dovan Bondié. 26 Alor zot la ni oir Jan é zot la di ali : « Lamontrèr, ou oi lo bonom té èk ou lot koté lo jourdin la, sak ou la fé konèt anou la, bin, ali osi li batiz domoun, é tout domoun i sava èk li. » 27 Jan la répond azot : « Si li la pa gingn pouvoir-la dépi dann sièl, in moun i gingn pa fé rien li. 28 Zot i rapèl ké moin la di azot : “Moin lé pa lo Kris, mé ké la anvoy amoin plito, pou prépar lo chemin pou li.” 29 Sak néna la marié, sé li lo marié. Mé lo kamarad lo marié, ké lé la an parmi é k’i antan ali, li lé vréman kontan li, kan li antan la voi lo marié. Sé pou sa, moin lé vréman kontan. 30 Ali, sak li fé i doi kontinié grandi, mé sak mi fé moin i sa arèté. » 31 Sak i sort lao dann sièl, lé pli gran ké tout lé zot, sak lé su la tèr, lé fé èk la tèr, é li koz su bann zafèr i konsèrn la tèr. Sak i sort dann sièl, ali lé pli gran ké tout lé zot. 32 Li fé konèt tout sak li la vu é sak li la antandu, mé pèrsone i ékout pa sak li di. 33 Lo moun k’i aksèp sak li di, li fé mont bien ké sak Bondié i di lé vré. 34 Parské sak Bondié la anvoyé, i di bann parol Bondié, parské Bondié i done son lèspri èk gran kèr. 35 Lo Papa i èm lo Garson, é li la mèt tout dan la min son Garson. 36 Sak i fé mont la foi dan lo Garson va viv pou toultan ; sak i obéi pa lo Garson i gingn arpa la vi, é la kolèr Bondié va rès su li.