Révélasion

14 Aprésa moin la vu, é agard ! Lagno dobout su la montagn Sion, é avèk li 144 000 ké néna son non é lo non son Papa ékri su zot fron. 2 Moin la antand in brui té sort dann sièl, kom lo brui in rivièr an kru, kom lo brui in gro loraj ; é lo brui ma la antand té kom domoun i chant èk la arp. 3 Banna i chant in chanté andiré lé nouvo dovan lo trone é dovan bann kat « kréatur » vivan é bann zansien ; é na poin pèrsone i gingn konpran lo chanté-la a fon, apark bann 144 000, ké té achté dépi la tèr. 4 Sé sak la pa souy azot avèk bann fanm ; zot lé vièrj. Sé sak i kontinié suiv Lagno ninport kèl landroi ousa li sa va. La achèt azot an parmi bann domoun kom promié frui pou Bondié é pou Lagno, 6 É moin la vu in not lanj té i vol dann milié lo sièl, é li lavé in gayar nouvèl k’i dur pou toultan pou anons tout sak i abit su la tèr, pou tout nasion, é tribu, é lang, é pèp. 7 Li té di avèk in voi for : « Mont la krintiv pou Bondié é rand ali gloir, parské lèr ousa li va jujé lé arivé. Oui, ador sak la fé lo sièl, é la tèr, é la mèr, é bann sours dolo. »