Jan

19 Alor Pilat la pran Jézu é la fé fouèt ali. 2 É bann solda la très in kourone zépine é la mèt su son tèt, é la mèt su li in gran linj koulèr gro rouj. 3 Banna té vien koté li é té di ali : « Bonjour, roi bann Juif ! » Banna té ral ali kout klak osi. 4 Ankor in kou, Pilat la sorti é la di èk lo pèp : « Ékout ! Mi amèn ali déor pou zot, pou ké zot i konpran ké moin na poin rien pou fé kondane ali. » 5 Aprésa, Jézu la ariv déor, avèk son kourone zépine é lo gran linj koulèr gro rouj. É Pilat i di azot : « Ala Lom-la ! » 6 Pourtan, kan bann chèf prèt é bann zofisié la vu ali, banna la kriyé : « Klout ali su poto ! Klout ali su poto ! » Pilat i di èk zot : « Azot mèm, pran ali é tué ali, parské moin, mi trouv pa rien pou fé kondane ali. » 7 Bann Juif la répond ali : « Nou néna in loi, é dapré loi-la, li doi mor, parské li la fé ali lo Garson Bondié. » 16 Alor li la romèt ali dan zot min pou fé klout ali su in poto. Donk la pran Jézu é la amèn ali. 17 Ali mèm té port lo poto soufrans, li té sava vèr in plas k’i apèl : landroi la Tèt, dann lang ébré i di Golgota. 18 Tèrla, la klout ali su lo poto akoté dé zom, inn sak koté, Jézu lété o milié ». 30 Kan li té finn pran le vin èg, Jézu la di : « Sa la réalizé ! » é, li la panch la tèt, li la rann son dèrnié souf.