Égzod

12 Alor Jéova la di Moiz èk Aaron, an Éjip : 2 « Moi la, i sra lo komansman lané pou zot. Li sra pou zot lo promié moi lané. 3 Di èk tout lo pèp Israèl : “Lo dizièm jour dann moi la, chakèn va pran in mouton pou son famiy, in mouton par kaz. 4 Mé si zot famiy lé tro pti pou manj mouton la an antié, zot va partaj ali avèk zot bann voizin dan zot kaz. Zot va fé zot bann kalkul dapré la kantité domoun é dapré la kantité mouton chakèn va manjé. 5 I fodra ké lo mouton lé in mal innan, ké na poin défo ; zot i poura pran osi in lagno oubien inn ti kabri. 6 Zot i doi okip ali juska lo 14^ièm jour lo moi, é chak famiy dan lo pèp Israèl i doi tué ali kan la nuit i sa tonbé. 7 I fodra pran in pé lo san é mèt ali su lé dé montan é an o la port lo bann kaz ousa va manj ali. 8 « “I fodra manj la viann la dan la nuit. Va fèr in roti èk li dann fé é va manj ali avèk dopin san lévur é bann fèy amèr. 9 Fo pa zot i manj in morso la viann mouton la, kru oubien bouyi ; fé rotir ali dann fé : la tèt avèk bann pat é sak lé anndan. 10 Zot i doi pa lès rien juska gran matin, mé tout sak noré rèsté juska gran matin, zot va brul ali. 11 É ala koman zot va manjé : zot sintur otour lo rin, zot sandal dann pié é zot baton dan la min ; é zot i doi manj ali vitman. Sé la Pak Jéova. 12 Mi va pas partou dann Léjip la nuit la, mi va tué tout bann promié zanfan dann péi, sak bann domoun kom sak bann zanimo, é mi va aplik mon jujman su tout bann bondié Léjip. Mi lé Jéova. 13 Lo san va sèrv kom in sign su bann kaz ousa zot i sra : mi va oir lo san é mi va pas pardsi zot, é lo malèr va pa touch azot é va pa tué azot kan mi va puni Léjip. 14 « “Zot i doi souvnir azot lo jour la é sélèb ali par in fèt pou Jéova. Zot va fèt ali jénérasion apré jénérasion : sé in loi pou toultan. 15 Pandan sèt jour, zot va manj dopin san lévur. Lo promié jour, zot va tir la lévur dan zot bann kaz, parské, lo moun va manj in zafèr néna lévur anndan, é sa dépi lo promié juska lo sètièm jour, i fodra mèt ali a mor an parmi lo pèp Israèl. 16 Nora in sin lasanblé lo promié jour é in not sin lasanblé lo sètièm jour. Okin travay sra fé bann jour la. I poura prépar sèlman sak chak moun la bézoin pou manjé. 17 « “Zot i doi sélèb la fèt bann Pin san lévur, parské sé dann journé la mi sa fé sort la kantité domoun dan zot pèp, dann péi Léjip. Zot i doi sélèb jour la jénérasion apré jénérasion : sé in loi pou toultan. 18 A partir lo soir lo 14^ièm jour lo 1^é moi juska lo soir lo 21^ièm jour, zot va manj dopin san lévur. 19 I fodra pa i trouv lévin dan zot kaz pandan sèt jour, parské si moun i manj in zafèr ké néna lévin anndan, kisoi in létranjé oubien in moun lé né Israélit, i fodra mèt ali a mor an parmi lo pèp Israèl. 20 Zot i doi pa manj okin manjé néna lévur anndan. Dann tout bann kaz, va manj dopin san lévur.” » 31 Toutsuit, an plin milié la nuit, li la apèl Moiz èk Aaron, é la di azot : « Alé, sort an parmi mon pèp, azot é lé zot Zisraélit. Alé sèrv Jéova, kom zot la di.