Jan

3 Navé in bonom an parmi bann farizien, té apèl Nikodèm ; li té in chèf bann juif. 2 Li la ni oir Jézu kan fénoir té fine rantré pou di ali : « Lamontrèr, nou koné, ké sé Bondié la anvoy aou kom lamontrèr, parské sa bann mirak ou fé la, pèrson i gingn pa fé sa, si Bondié lé pa èk li. » 3 Jézu la di ali : « Sak mi sa di aou lé vré sa : « Si in moun i nèt pa ankor in foi, li gingn arpa oir lo gouvèrnman Bondié. 4 Nikodèm la domand ali : « Koman in moun i fé pou nèt, alor ké li lé fini vié ? Li sar, kan mèm pa arrant dan lo vant son momon, é arnèt in dézièm foi ? » 5 Jézu la répond ali : Lé vré sak mi sa di aou la : « Si in moun i nèt pa èk dolo, é léspri sin, li gingn arpa rant dan lo gouvèrnman Bondié. 6 Sak lé né èk la chèr lé an chèr, é sak lé né èk lèspri, lé in lèspri. 7 Pa bézoin kas out tèt parské moin la di aou : “I fo zot i nèt ankor in foi.” 8 Lo van i souf ousa li vé li, ou antan lo dézord li fé, mé ou koné pa ousa li sort ni ousa li sava. Sé lo mèm zafèr pou sak i nèt èk lèspri. » 9 Lèr la Nikodèm la domand ali : « Par koman sa i pé èt posib ? » 10 Jézu la répond ali : « Aou, in lamontrèr dann péi Israèl, ou koné pa sa ? 11 Oui, franch vérité mi di aou : Nou, nou koz dési sak nou koné, é nou fé konèt sak nou la vu, mé zot i vé pa ékout sak nou di azot. 12 Moin la èsplik azot bann zafèr i konsèrn la tèr mé zot i kroi pa mèm. Koman zot va gingn kroir si mi èsplik azot bann zafèr dann sièl ? 13 An plis ké sa, pèrsone la pokor mont dann sièl apark sak la sort dann sièl la désand, lo Garson d’moun. 14 É kom dann dézèr Moiz la pran lo sèrpan la mèt an lèr, va fé parèy èk lo moun Bondié la choizi, va mèt ali an lèr osi. 15 Komsa tout, sak i kroi an li, va gingn viv pou toultan. 16 « Parské Bondié la èm lo monn si tèlman, ké li la done son sèl Garson, komsa tout sak i fé mont la foi an li, i sra pa détrui, mé va gingn la vi pou toultan. 17 Parské Bondié la pa anvoy son Garson dan lo monn pou ké li juj lo monn, mé ké lo monn lé sové gras ali. 18 Sak i fé mont la foi an li, i sra pa jujé. Mé sak i fé mont pa la foi an li la fine èt déja jujé li, parské li la pa fé mont la foi, dan lo non lo sèl Garson Bondié. 19 Ala su kosa i baz lo jujman : La limièr la ni dan lo monn, mé domoun té i èm plis fénoir ké la limièr, parské zot té fé sak lé mové. 20 Parské sak i fé bann zafèr ké Bondié i détès i suport pa la limièr li, é li vien pa dan la limièr non pli, komsa li lé pa kondané akoz lo bann mové zafèr li fé. 21 Mé sak i fé sak lé bon i vien dan la limièr li, komsa i oi bien mèm ké sak li fé, lé fé an akor èk sak Bondié i vé. » 22 Aprésa, Jézu èk son bann disip la parti an déor bann vil la Judé, é la li la pas in pé lo tan èk banna, é li té batiz domoun osi. 23 Mé Jan osi té batiz tèr laba Énone, koté Salim, parské laba lavé bonpé d’lo, é domoun té arèt pa ni pou fé batiz azot ; 24 parské té pokor anvoy Jan an prizon. 25 Lèr-la, la èspas in ralé pousé ant in Juif é bann disip Jan su sak i fo fé pou èt prop dovan Bondié. 26 Alor zot la ni oir Jan é zot la di ali : « Lamontrèr, ou oi lo bonom té èk ou lot koté lo jourdin la, sak ou la fé konèt anou la, bin, ali osi li batiz domoun, é tout domoun i sava èk li. » 27 Jan la répond azot : « Si li la pa gingn pouvoir la dépi dann sièl, in moun i gingn pa fé rien li. 28 Zot i rapèl ké moin la di azot : “Moin lé pa lo Kris, mé plito ké la anvoy amoin, pou anons ké li té sa arivé.” 29 Sak néna la marié, sé li lo marié. Mé lo kamarad lo marié, ké lé la an parmi é k’i antan la voi lo marié, li lé vréman kontan li. Sé pou sa, moin lé vréman kontan. 30 Ali, firmézur li va kontinié fé plis, mé amoin ma fé moins. » 36 Sak i mèt la foi dan le Garson na la vi pou toultan ; sak i dézobéi le Garson nora poin la vi, é la kolèr Bondieu va rès su li.