2 Kronik

9 In pé apré, Zéra létiopien la atak lo péi èk in larmé 1 000 000 boug é 300 char. Kan li la ariv Marécha, 10 Aza la parti rod ali pou batay. Zot la mèt zot soldat an ran pou batay laba dan la ravine Zefata, pa tro loin Marécha. 11 Alor Aza la pri for mèm Jéova son Bondié : Oté Jéova, lé pa inportan pou ou ké sak ou sov lé for oubien lé fèb. Siouplé Jéova, sov anou, parské nou fé aou konfians, é sé pou out non ké nou la vni kont kantité domoun-la. Oté Jéova, ou lé nout Bondié. Fé ansort lé pa domoun i gingn la viktoir kont ou. 12 Donk, Jéova la fé gingn Aza é Juda lo batay kont bann Zétiopien, é bann Zétiopien la kouri. 13 Aza é larmé té ansanm li, la kour dèrièr banna juska Gérar. Zot la tué bann Zétiopien juska navé pu inn té vivan, parské sé Jéova é son larmé la kraz bann Zétiopien. Aprésa bann solda Juda la parti ansanm in gran trézor.