Luk

15 Tout bann travayèr zinpo, bann péchèr, la rasanm azot otour Jézu pou ékout ali. 2 Bann farizien é bann èspésialis la loi, té i fé ladilafé : « Bonom-la i akèy sak i pratik bann zafèr mové é li manj ansanm zot. » 3 Alor li la done banna légzanp-la : 4 « Si inn an parmi zot néna 100 brébi é i pèrd inn, èské li lèsra pa lo bann 99 dann paturaj pou alé rod sak la pèrd, juska tank li trouv ali ? 5 É kan li rotrouv ali, li mèt brébi-la su son zépol é li lé kontan. 6 Aprésa, kan li ariv son kaz, li kri son bann bon kamarad é domoun son lantouraj, é li di azot : “Vien fé la fèt ansanm moin, parské ma la rotrouv mon ti brébi ké té pèrdu.” 7 Lé parèy, mi di azot ké, nora plis kontantman dann sièl pou in sèl moun péchèr k’i ropanti ali son péché, ké pou 99 moun jus ké la pa bézoin ropanti azot. 20 Alor li la pran son chemin pou artourn la kaz son papa. Alork li té ankor loin, son papa la vu ali é son kèr la fé mal. Dukou son papa la kouri pou pran ali dan son bra é anbras ali.