Égzod
6 Alor Jéova la di Moiz : « Astèr ou va oir sak mi sa fé Faraon : mon min puisan va fors ali lès azot alé é mon min puisan va fors ali poursuiv azot an déor son péi. » 2 Aprésa Bondié la di Moiz : « Mi lé Jéova. 3 Kan moin té aparèt dovan Abraam, dovan Izaak é dovan Jakob, lété kom Bondié Toupuisan, mé pou mon non, Jéova, moin la pa fé mont azot tout sak li vé dir. 4 Moin la pas osi in kontra ansanm zot pou done azot péi Kanaan, péi ousa zot té i viv kom bann zétranjé. 5 Astèr, moin ma la antandu bann plint lo pèp Israèl, ké bann Zéjipsien i tienbo kom zèsklav, é mi souvien amoin mon kontra. 6 « Sé pousa, di bann Zisraélit : “Mi lé Jéova. Mi va tir azot dann lèsklavaj bann Zéjipsien ké i oblij azot fé bann travay dur. Mi va sov azot par mon bra puisan é par bann gran punision. 7 Mi va akèy azot kom mon pèp é mi sra zot Bondié, é vréman zot va konèt ké mi lé Jéova zot Bondié, k’i tir azot dann travay difisil i oblij azot fé an Éjip. 8 É mi va fé rant azot dann péi ma la fé sèrman pou done Abraam, done Izaak é done Jakob. Mi va done azot sa, é li sra pou zot. Mi lé Jéova.” » 9 Plitar, Moiz la done mésaj la bann Zisraélit. Mé banna la pa ékout Moiz, parské zot lavé pèrd kouraj é zot té suport in dur lèsklavaj. 10 Aprésa Jéova la di Moiz : 11 « Alé aou dovan Faraon, lo roi Léjip, é di ali li doi lès bann Zisraélit kit son péi. » 12 Sèlman, Moiz la répond Jéova : « Bann Zisraélit la pa ékout amoin ! Alor koman Faraon i sa ékout amoin li, moin, ké néna difikulté pou kozé ? » 13 Mé Jéova la di ankor avèk Moiz é avèk Aaron, bann zord ké zot té i doi done bann Zisraélit é Faraon, lo roi Léjip, pou fé sort bann Zisraélit an Éjip. 14 Ala kisa lété zot bann chèf la famiy. Bann garson Rubèn, lo promié garson Israèl : Anok, Palou, Hèzrone é Karmi. Ala bann désandan Rubèn. 15 Bann garson Siméon : Jémouèl, Jamine, Oad, Jakine, Zoar é Chaoul, lo garson in madam Kanaan. Ala bann désandan Siméon.