Kisa i lé Jézu Kris ?

1. Kèl koté Jézu té i sort ?

Jézu lété pa kom tout bann domoun : parske avan son nésans su la tèr, li té i viv dann sièl é li lété in léspri (Jan 8:23). Sé li ke Bondieu la kré an premié, aprésa, li la èd Bondieu pou kré tout lé zot zafèr. Rienk li touseul la été kréé dirèkteman par Jéova. Sé pousa ke la Bib i apèl a li son « seul » Garson (Jan 1:14). I apèl a li osi « la Parol », parske li la été le Port Parol Bondieu : Jéova la utiliz a li pou raport son bann mésaj (Lir Provèrb 8:22, 23, 30 ; Kolosien 1:15, 16).

2. Pou kosa Jézu lé vnu su la tèr ?

Bondieu la anvoiy son Garson su la tèr : li la tir la vi Jézu dann sièl é li la mèt dan le vant in jeun madam juif ke lété vièrj é ke té i apèl Mari. Sa i ve dir ke le papa Jézu lété pa in moun (Luk 1:30-35). Jézu lé vnu su la tèr 1) pou ansègn la vérité su Bondieu, 2) pou mont a nou koman fé la volonté Bondieu, kom li la fé, é sa, mèm kan nou néna bann problèm, é 3) pou donn son vi parfé « an ranson » (Lir Matieu 20:28).

3. Pou kosa nou la bezoin in ranson ?

Souvandéfoi, i pèy in ranson pou libèr in moun ke lé an danjé d’mor (Égzod 21:29, 30). Ojourdui, nou viéyi é nou mor. Mé sé pa sa ke Bondieu lavé prévu pou bann domoun. Koman nou koné sa ? Bondieu la bien di èk Adan, le premié om, ke si li té dézobéi, li noré mor. Donk, si Adan lavé pa dézobéi, sétadir si li lavé pa péché, jamé li noré konèt la mor (Jenèz 2:16, 17 ; 5:5). Dapré la Bib, si la mor « lé rantré » dan le monn, sé akoz Adan. Li la transmèt tout son bann désandan le péché, é la punision ke li la ganié pou le péché : la mor. Donk, pou libèr a nou la kondanasion a mor ke Adan la lès a nou, nou la bezoin in ranson (Lir Romin 5:12 ; 6:23).

Kisa té i pe pèy se ranson la é sov a nou d’la mor ? Kan nou mor, nou pèy rienk pou nout bann péché a nou. Donk, parmi bann zumin inparfé, la poin pèrsonn i pe pèy pou bann péché lé zot (Lir Psom 49:7-9).

4. Pou kosa Jézu lé mor ?

Jézu lété pa kom nou : li lété parfé. Li la jamé komèt in péché. Donk, li lavé pa bezoin donn son vi pou son bann péché. Si li lé mor, sé pou rachèt bann péché lé zot. Bondieu la montré ke li té ièm si tèlman bann domoun : li la anvoiy son Garson su la tèr donn son vi pou nou. Jézu la montré ke li té ièm a nou osi : li la obéi son Papa é li la donn son vi pou nout bann péché (Lir Jan 3:16 ; Romin 5:18, 19).

Regard le vidéo Poukosa Jézu lé mor ?

5. Kosa Jézu i fé ojourdui ?

Kan Jézu lété su la tèr, li la géri bann malad, li la fé reviv bann mor é li la èd bann domoun ke lavé bann problèm. Kan li la fé tousa, li la montré sak li sar fé dan lavnir pou bann domoun ki obéi Bondieu (Matieu 15:30, 31 ; Jan 5:28). Apré ke li lé mor, Bondieu la redonn a li la vi, li la reviv kom in léspri (1 Pièr 3:18). Aprésa, li la atann « a la droit Bondieu » juska tank Bondieu i donn a li pouvoir pou dirij tout la tèr (Ébreu 10:12, 13). Ojourdui, Jézu lé Roi dann sièl. Son bann disip i anons se gayar nouvèl la, su tout la tèr (Lir Danièl 7:13, 14 ; Matieu 24:14).

I tard pa, an tan ke Roi, Jézu va utiliz son pouvoir pou anlèv tout bann soufrans é sak lé dèryèr bann soufrans la. Tout sak i mèt zot foi an li, é ki obéi a li, va viv dan in paradi su la tèr (Lir Psom 37:9-11).