LESON 6
Kèl léspoir néna pou domoun ke lé mor ?
1. Kèl gayar nouvèl néna pou bann domoun ke lé mor ?
Jézu lavé in kamarad ke té i apèl Lazar é ke té i abit Bétani koté Jéruzalèm. Néna in jour, son kamarad Lazar lé mor. Sé seulman kat jour apré, ke Jézu la ariv Bétani. Li la parti su la tonm avèk Mart é Mari, bann seur Lazar. Vit fé, néna in paké d’moun la rasanm a zot. É la, Jézu la fé reviv Lazar. Majinn a zot, kontantman ke Mart é Mari la resanti ! (Lir Jan 11:21-24, 38-44).
Mart té i koné déja kèl gayar nouvèl néna pou sak lé mor. Èl té i koné ke Jéova té sar résusit bann mor, pou ke zot i reviv su la tèr (Lir Job 14:14, 15).
2. Kosa i éspas apré la mor ?
Bondieu la di èk Adan : « Ou lé fé èk la pousièr é ou va artourn an pousièr » (JENÈZ 3:19).
Bann zumin lé fé èk la pousièr (Jenèz 2:7 ; 3:19). Nou lé fé avèk la chèr é le san. Nou lé pa bann zéspri ke i viv dan bann kor umin. Donk, kan nou mor, la poin rien an nou i kontinu d’viv. Kan in moun i mor, son sèrvo i mor osi. Li pans pu rien é li resan pu rien. Bann mor i koné pa kosa i éspas otour d’zot. Dayeur, Lazar ke lé mor é ke la été résusité, la jamé rakonté ke lavé in vi apré la mor (Lir Éklézias 9:5, 6, 10).
Èske Bondieu i fé souf bann zumin dann fe apré zot mor ? La Bib i amont ke bann mor i koné pa kosa i éspas otour d’zot. Lansègnman su lanfèr, lé in nafèr manteur ki sali la réputasion Bondieu. Rienk lidé fé souf bann domoun dann fe, i dégout a li (Lir Detéronom 12:31).
Regard le vidéo Kosa i éspas kan in moun i mor ?
3. Èske bann mor i gingn koz èk nou ?
Bann mor i koz pa é i antan pa (Psom 115:17). Parkont, désèrtin zanj mové i koz èk bann zumin é i fé pas a zot pou bann domoun mor (2 Pièr 2:4). Jéova i défann a nou ésèy koz avèk bann mor (Lir Detéronom 18:10, 11).
4. Kisa va èt résusité ?
Néna domoun par milion ke lé mor, é banna, va reviv in jour su la tèr. Mèm bann domoun ke la pa aprann konèt Bondieu, é ke la fé bann mové zafèr, i sra résusité (Lir Luk 23:43 ; Akt 24:15).
Bann domoun ke va èt résusité nora lokazion aprann la vérité su Bondieu, é mont zot foi an Jézu par zot lobéisans (Révélasion 20:11-13). Tout sak va fé le bien i poura viv pou toultan su la tèr (Lir Jan 5:28, 29).
5. Kosa la rézuréksion i aprann a nou su Jéova ?
Bondieu la anvoiy son garson su la tèr pou ke li donn son vi pou nou. Donk, sé gras Bondieu ke néna in léspoir pou sak lé mor. La rézuréksion i prouv ke Jéova i ièm a nou, é i mont osi ke Bondieu lé bon avèk nou, mèm si nou mérit pa. Parmi bann domoun ke va èt résusité, kisa ou lé présé retrouvé ? (Lir Jan 3:16 ; Romin 6:23).