Èske ou prépar aou pou le Mémoryal ?

Le dèrnié Pak ke Jézu la fété, té i sar èt plu inportan ke tout lé zot. Kom leur son mor té ariv, Jézu lavé pans manj la Pak avèk son bann zapot é aprésa li noré mèt an plas in nouvo sérémoni, ke i fé chak lané : le Repa le Sénieur. Donk, li la anvoiy Pièr é Jan prépar la sal ousa i devré fé se sérémoni la (Luk 22:7-13 ; Regard le zimaj su le kouvèrtur devan). Sa i rapèl anou ke nou doi prépar anou pou Mémoryal, ke va fé le 27 mars. Bann zasanblé la déja mèt an plas bann dispozision (lorateur, le pin èk le vin, é dot choz ankor). Mé pou chakèn d’ant nou, kosa nou pe fé pou èt pré le jour le Mémoryal ?

Prépar out keur. Lir é réfléchi èk sèryeu, su bann zistoir biblik ki tourn otour le Mémoryal. Ou pe ansèrv aou le program ke lé doné dan Examinons les Écritures chaque jour. Dan lapindis B12 dan La Bible. Traduction du monde nouveau néna in program avèk plus détay. (Gard osi le Kayé Nout vi krétien èk prédikasion pou avril 2020.) An plus dan l’Index des publications des Témoins de Jéhovah oubien le Guide de recherche pour les Témoins de Jéhovah, bann fami i pe trouv bann zartik su linportans la ranson, ke zot i pe étudié dan létud an fami.

Invit domoun. Fé tout out posib pou partisip le kanpagn linvitasion. Réfléchi bann domoun ke ou pouré invité : out bann vizit, bann domoun ke la étudié la Bib dann tan lontan, bann domoun ke ou koné é sak i fé parti out fami. Bann zansien va pans invit bann frèr é seur ke la arèt préché. Oubli pa ke si in moun i abit pa koté out kaz, ou pe trouv leur é landroi ousa i fé Mémoryal pré d’ché li kan ou klik an o su la paj lakeuy jw.org, su KISA NOU LÉ aprésa su « Mémoryal ».

Kosa nou pe fé ankor pou prépar anou ?