Majinn la fin se monn la èk konfians

I tard pa, la pasians ke Jéova néna pou se monn la, va ariv o bout. Le fo relijion i sar èt détrui, in groupman bann nasion va atak le peup Bondieu. É kan va ariv Armagédon, Jéova va détrui tout bann moun ke lé mové. Bann krétien lé présé viv se bann zévènman inportan la.

Lé sur, nou koné pa tout bann détay su le gran détrès. Par égzanp, nou koné pa trotro kansa li va komansé. Nou koné pa kèl rézon bann puisans politik va doné, kan zot va atak bann relijion. Kan bann nasion va atak le peup Bondieu, nou koné pa konbien d’tan i sar pran, ni koman zot va fé sa. Pou fini, kan nora Armagédon, nou koné pa an détay koman Jéova i sa détrui tout bann mové moun.

Seulman, la Bib i donn anou tout bann zinformasion nou la bezoin pou afront lavnir èk konfians é kouraj. Par égzanp, nou koné ke nou viv bann dèrnié dé « dèrnié jour » (2 Tim 3:1). Nou koné ke latak kont bann relijion sra ‘rakoursi’ pou ke le vré relijion i disparèt pa (Mat 24:22). Nou koné ke Jéova va sov son peup (2 Pièr 2:9). Anfin d’kont, nou koné ke Jéova la choizi in moun jus é puisan pou détrui sak lé mové é pou protèj le gran foul domoun dann Armagédon (Rév 19:11, 15, 16).

Nou dout pa ke bann zévènman la, va fé peur in bonpe d’moun. Parkont, kom nou sra finn lir é réfléchi su koman Jéova la sov son peup, é sak li di su lavnir, ‘nou va redrès anou é relèv la tèt’, parske nout délivrans i ariv (Luk 21:26, 28).