Trouv la pé mèm si néna la gèr èk bann zafrontman violan
Gary ké lété dan larmé avan, i di : « Avan étudié la Bib, mi té koné pa poukosa navé tèlman la méchansté, linjustis èk bann problèm dan lo monn. Mé jordi, mon lèspri lé an pé. Mi koné ké Jéova va fé ansort ké nou viv an sékurité dési la tèr ».
La pa ariv sa rienk Gary, agard koman la Bib la èd dot moun ankor.
SAK LA BIB I DI : « A Jéova ! Parské aou, ou lé bon é paré pou pardoné » (Psom 86:5).
KOMAN SA I ÈD POU TROUV LA PÉ : « Vèrsé-la, i promèt amoin ké Jéova lé paré pou pardoné. Mi koné ké li lé paré pou pardone tout sak moin la fé dann pasé kan moin té fé la gèr » (Wilmar, Kolonbi).
SAK LA BIB I DI : « Mi fé in nouvo sièl é in nouvo tèr ; nou va pu rapèl anou bann zafèr dann pasé, é sa va pu déchir nout kèr » (Izai 65:17).
KOMAN SA I ÈD POU TROUV LA PÉ : « Jordi mi viv dan la déprésion, é mi souf d’in gro strès akoz sak ma la viv kan mi té dan larmé. Mé vèrsé-la, i rapèl amoin ké Jéova va tir dan mon tèt bann mové pansé é li va chas mon bann kochmar. Bann zafèr-la, va arèt tourmant mon kèr èk mon lèspri. I sra vréman gayar ! » (Zafirah, Zéta zuni).
SAK LA BIB I DI : « Kan li sra roi, bann jus va pèt an flèr é nora in bonpé la pé partou juska tank la lune va disparèt » (Psom 72:7).
KOMAN SA I ÈD POU TROUV LA PÉ : « Toultan mi majine bann ti parol-la. Tard pa, loraj la gèr va pu fé fèr anou kochmar, é nou nora pu jamé pèr pou la vi domoun ké nou èm » (Oleksandra, Lukrèn).
SAK LA BIB I DI : « Out bann mor va roviv. […] Lèv azot é kri for èk la joi, azot ké lé dan la pousièr ! » (Izai 26:19).
KOMAN SA I ÈD POU TROUV LA PÉ : « Dann tan, la rod pou tué tout lo pèp tutsi, prèské tout mon famiy la fé tué azot. Vèrsé-la, lé in promès pou moin gingn artrouv mon famiy. Vréman, moin lé présé antand zot joli ti voi kan zot sra résusité ! » (Marie, Rouanda).
SAK LA BIB I DI : « Ankor in pé d’tan, é domoun mové va disparèt […] Mé sak i pran pa zot su la otèr va gingn la tèr kom léritaj é zot va aprésié in gran kantité la pé » (Psom 37:10, 11).
KOMAN SA I ÈD POU TROUV LA PÉ : « Mèm si la gèr lé fini, bann zinjustis èk la méchansté lé toujour la mèm. Bann vèrsé-la i rasur amoin vréman. Jéova i oi tout é li konpran sak mi viv. Li promèt anou ké tard pa li va fé disparèt bann soufrans é sa i va pu fatig nou » (Daler, Tadjikistan).
Bann domoun ké néna dann rovu-la, i fé parti bann milion Témoin Jéova ké la trouv la pé gras la Bib, parské la Bib la amont azot koman fé pou sobat kont la èn pou in ras, in pèp, in tribu é anvèr in moun (Éfézien 4:31, 32). Bann Témoin Jéova i may pa dan la politik é zot i rofuz d’in manièr ou in not fé la violans (Jan 18:36).
Bann Témoin Jéova i trouv in soutien ansanm zot gran famiy frèr é sèr dan la foi dési tout la tèr, ké lé uni dan lamour (Jan 13:35). Par égzanp Oleksandra, ké nou la koz dési in pé avan, té oblijé kour loin son péi ansanm son sèr akoz la gèr. Èl i rakont : « Kan nou la pas la frontièr, toutsuit nou la vu bann Témoin té la pou akèy anou. Zot soutien la èd anou in bonpé pou gingn amèn nout vi antank réfujié ».
Lé èk gran kèr, ké nou invit azot nout bann rénion, ousa zot va dékouv lo mésaj la pé ké néna dan la Bib, é osi koman zot i pé mèt sa an pratik. Alé dési jw.org, pou trouv in ladrès koté out kaz ou sinon pou domand in létud la Bib gratuit ké lé vivan dann lo liv Viv ereu pou toultan ! ansanm in Témoin Jéova.