Èské bann Témoin Jéova néna bann règ pou suiv, kan zot néna inn ti lamouré ?

Bann Témoin Jéova lé sur, ké bann loi é bann prinsip la Bib, i èd azot pran bann désizion k’i kontant Bondié é k’i aport azot bann bienfé (Izai 48:17, 18). La pa nou, la fé bann loi é bann prinsip-la, mé nou mèt sa an pratik dan nout vi. Désèrtin an parmi lo bann loi é lo bann prinsip, lé pou bann zamouré k’i frékant azota (i apèl sa osi frékantasion). Alon oir détroi légzanp.

• Lo mariaj, k’i uni in bonom èk in madam, i doi dur pou toultan (Matié 19:6). Pou bann Témoin Jéova, kan dé moun lé amouré é i frékant azot, sa lé in zafèr sèrié, parské zot i oi sa kom in promié ti bout chemin zot i fé ansanm, avan marié.

• Rienk bann moun ké néna laj marié, i dévré aoir inn ti zézèr é frékant inn é lot. Zot la « fine pas la flèr la jénès », sétadir in pèryod la vi ousa bann lanvi sèksuèl lé pli for (1 Korintien 7:36).

• Bann zamouré k’i frékant azot, i dévré èt lib pou marié. Mèm si désèrtin lé divorsé dovan la loi, mé dovan Bondié banna lé pa lib pou romarié ; parské pou Bondié, lo sèl rézon valab pou k’in moun i divors, sé kan néna péché sèksuèl (Matié 19:9).

• Si bann krétien i vé marié, la Bib i domand ké zot i choizi zot mari ou zot madam, rienk an parmi bann Témoin Jéova (1 Korintien 7:39). Koman bann Témoin Jéova i konpran komandman-la ? Banna i konpran ké lo moun zot i vé marié avèk, i doi pa sèlman rèspèk zot kroiyans, mé li doi èt in Témoin batizé, ké néna mèm kroiyans ké zot é k’i mèt sa an pratik dan son vi (2 Korintien 6:14). Bondié la toujour domand son bann sèrvitèr, ké zot i marié rienk èk sak néna mèm kroiyans ké zot (Jénèz 24:3 ; Malaki 2:11). Komandman-la, lé bien vré, é zordi sèrtin èspésialis lé dakor èk sab.

• Bann marmay i doi obéi zot papa, momon (Provèrb 1:8 ; Kolosien 3:20). Si banna i abit la kaz zot papa, momon, zot va rèspèk komandman-la, surtou si zot néna inn ti zézèr é ké zot i frékant. Par égzanp, bann papa, momon, i pé désid a konté kèl laj, zot marmay i pé komans frékanté é kèl zaktivité zot néna lo droi fé.

• Chak Témoin va baz ali su bann prinsip la Bib, pou désid pou li mèm, si li va komans ou non in frékantasion é kisa li vé frékanté. Sa lé an akor èk prinsip-la : « Parské chakèn va port son prop charj » (Galat 6:5). Parkont, an rapor èk bann frékantasion, in bonpé i mont azot saj, zot i rod konsèy ansanm bann krétien ké néna lèspèryans, é k’i vé zot bien (Provèrb 1:5).

• Kan zot i frékant, bann zamouré néna labitud aoir bann konportman anvèr inn é lot k’i amèn azot fé bann pratik ké lé bann péché grav. Par égzanp, la Bib i kondane tout kalité péché sèksuèl. Laddan néna bann rapor sèksuèl, mé osi dot pratik séksuèl ant dé moun ké lé pa marié, kom karès lo sèks inn é lot, kan i mèt lo sèks dan la bouch, ou kan i mèt lo sèks dan la fès (1 Korintien 6:9-11). Avan lo mariaj, si nout fason aji i fé lèv bann zanvi sèksuèl, mèm si i sar pa juska lo rapor sèksuèl, sa lé « in konduit malprop » pou Bondié é li èm pa sa ditou (Galat 5:19-21). Bann diskusion malprop, ousa i di « bann kozman insolan », sa osi sé bann zafèr ké la Bib i kondane (Kolosien 3:8).

• Lo « kèr », sétadir lo moun ké nou lé vréman anndan nout kèr, lé trèt (Jérémi 17:9). Li pé pous in moun pou fé bann zafèr, mèm si li koné ké sa lé mové. Pou évit ké zot kèr i aji an trèt, dé moun k’i frékant va pa rotrouv azot tousèl dan bann situasion ousa zot i pé èt tanté. Zot va fé vréman bien atansion pou rès an group ou rès avèk in chapron (Provèrb 28:26). Bann krétien sélibatèr k’i rod in moun pou marié, i koné ké lé riské alé su bann sit lintèrnèt pou fé bann rankont, surtou pou komans frékant in moun ké zot i koné ni an blan ni an noir (Psom 26:4).