LESON 3
Koman règ bann problèm
« I fo ke zot néna [inn pou lot] in profon lamour, parske lamour i kouv in gran kantité bann péché » (1 Pièr 4:8).
Alor ke ou é out konjoin i komans zot vi a deu, zot va konèt bann problèm. Bann sousi i ariv petèt parske zot fason d’pansé, zot fason resantir lé choz é zot fason voir la vi lé pa parèy. Bann problèm i pe èt lié osi avèk bann zafèr an deor zot maryaj ki touch a zot oubien alor bann zévènman ke zot i atan pa.
I sré petèt plu fasil fèrm out zieu desu, mé la Bib i konsèy a nou afront nout bann difikulté (Matieu 5:23, 24). Sé kan i mèt an pratik bann prinsip biblik ke zot va trouv bann méyeur solusion pou zot problèm.
1 DISKUT LE PROBLÈM ANSANM
SÈK LA BIB I ANSÈGN : « Néna [...] in tan pou kozé » (Éklézias 3:1, 7). Pran le tan pou koz su le problèm avèk out konjoin. Ésplik a li klèrman sak ou resan é sak ou pans su le sujé. Di a li toujour la vérité (Éfézien 4:25). Mèm si la diskusion i fé gonf out keur, kontrol a ou pou pa kri su inn é lot. Réponn avèk bann parol ke lé dou i pe évit ke in sinp diskusion i transform an grav disput (Provèrb 15:4 ; 26:20).
Mèm si ou lé pa dakor avèk out konjoin, rès janti, é oubli pa mont a li out lamour é out réspé (Kolosien 4:6). Fé out posib pou trouv in solusion asé vit é kontinu koz ansanm inn é lot (Éfézien 4:26).
KOSA OU PE FÈR :
Choizi le bon moman pou diskut su le problèm.
Kan i ariv out tour pou ékouté, i fo métriz a ou pou pa intéronp out konjoin kan li koz. Aprésa ou poura kozé out tour.
2 ÉKOUT É KONPRAN
SÈK LA BIB I ANSÈGN : « I fo ke zot néna in laféksion profon chakèn pou inn é lot. Zot i doi èt toujour lé premié pou onor chakèn inn é lot » (Romin 12:10). Out fason ékouté lé tré zinportan. I fo ke ou néna in keur sansib, sinsèr é pa orgeyeu pou ésèy konprann le fason d’pansé out konjoin (1 Pièr 3:8 ; Jak 1:19). Fé pa sanblan ékouté. Si lé posib, mèt de koté sad ou lé antrèn fèr pou akord tout latansion out konjoin. Sinon, propoz a li koz in pe plu tar. Si ou konsidèr out konjoin kom in ami é pa kom in lènmi, ou va vèks a ou moin fasilman (Éklézias 7:9).
KOSA OU PE FÈR :
Mèm si sak ou antan i agas a ou, ékout é pran an kont bann zidé ke lé diféran lé vot.
Kan out konjoin i koz, ésèy santir kosa li ve fé konprann a ou par la. Regard bien son bann jès, lésprésion son figur é le ton son voi.
3 FÉ SAK ZOT LA DI
SÈK LA BIB I ANSÈGN : « Pou tout sort kalité travay difisil, néna in bienfé, mé in sinp parol i sort dan la bouch i aport la mizèr » (Provèrb 14:23). I sufi pa seulman tonm dakor su in solusion. Zot i doi mèt an pratik sad zot deu la désidé ansanm. Lé sur ke sa i demann bokou d’volonté, mé sa i vo le kou (Provèrb 10:4). Si zot i fé zéfor pou travay min dan la min, alor zot nora in « gayar rékonpans pou [zot] dur travay » (Éklézias 4:9).
KOSA OU PE FÈR :
Pou trouv solusion in problèm, lé bien ke zot i désid ansanm kosa inn é lot i doi fèr.
Diskut souvan ansanm pou fé in bilan de zot situasion.