Koman donn lédukasion zot zanfan

Kan Jéova la kré la fami, li la konfié bann paran la résponsabilité pou élèv zot zanfan (Kolosien 3:20). An tan ke paran, zot i doi aprann zot zanfan èm Jéova é èd a li pou devnir in adult résponsab (2 Timoté 1:5 ; 3:15). Zot i doi osi konèt sak zot garson ou zot fiy néna dan le keur. Lé sur, zot prop légzanp lé tré zinportan. Zot va ansègn zot zanfan in fason plu éfikas bann zansègnman Jéova, si zot mèm la déja fé rant tousa dan zot keur (Psom 40:8).

1 DONN ZOT ZANFAN LANVI KOZ ANSANM ZOT

SÈK LA BIB I ANSÈGN : « Tout om i doi èt pré pou ékouté, lan pou parlé » (Jak 1:19). Surman, zot la anvi ke zot zanfan i san a li a lèz pou koz avèk zot kan li ve. Li doi konèt ke zot lé pré pou ékout a li chak foi ke li la bezoin rouv son keur avèk zot. I fo ke zot i choizi in moman ke lé trankil pou ke li gingn kozé plu fasilman (Jak 3:18). Si li kroi ke zot i sra an kolèr oubien tro sèk ansanm li, li sar pa rouv vréman son keur avèk zot. I fo ke zot na la pasians avèk li, é di a li toultan ke zot i ièm a li (Matieu 3:17 ; 1 Korintien 8:1).

KOSA OU PE FÈR :

• Kan zot marmay la bezoin koz ansanm zot, i fo ke zot i rann a zot disponib.

• Koz souvan ansanm li, é pa seulman kan néna bann problèm.

2 ÉSÈY KONPRANN SAK LI NÉNA VRÉMAN SU LE KEUR

SÈK LA BIB I ANSÈGN : « Sèk i mont ke li néna in bon jujman dann in nafèr va trouv le bien [ou : va réusir] » (Provèrb 16:20). Défoi, pou konèt sak zot zanfan i resan vréman, i fodra konprann kosa i kachièt dèryèr bann mo ke li di. Bann jeun na labitud grosi lé choz oubien di bann zafèr ke zot i pans pa vréman. Mé « kan kèlkin i réponn su in nafèr avan ékouté, li lé bien bèt » (Provèrb 18:13). Alor mèt pa zot vitman an kolèr (Provèrb 19:11).

KOSA OU PE FÈR :

• Kèlke soi le zafèr ke zot zanfan va dir a zot, i fo ke zot lé bien désidé pou pa koup a li la parol é pa èt an kolèr kont li.

• Ésèy rapèl a zot kosa zot mèm té resan kan zot lavé son laj é kosa lété inportan pou zot a lépok la.

3 MONT KE ZOT I PANS PARÈY

SÈK LA BIB I ANSÈGN : « Ékout, mon garson, la disiplinn out papa, é mèt pa de koté linstruksion out momon » (Provèrb 1:8). Jéova la donn le papa é le momon lotorité su zot zanfan. Zot i doi aprann zot zanfan kosa i fo fé pou réspèk é obéi a zot (Éfézien 6:1-3). In zanfan i resan kan son bann paran lé pa « bien uni dan le mèm pansé » (1 Korintien 1:10). Donk, si zot lé pa dakor ansanm, la pa bezoin fé mont sa devan zot zanfan, parske zot i pouré pèrd le réspé ke li néna pou zot.

KOSA OU PE FÈR :

• I fo ke zot i tonm dakor su la fason korij zot zanfan.

• Si zot i pans pa parèy su la fason donn lédukasion zot zanfan, ésèy konprann a zot inn é lot.

4 PANS IN PLAN DE FORMASION

SÈK LA BIB I ANSÈGN : « Éduk le garson selon le chemin ke li devré suiv » (Provèrb 22:6). Donn in bon lédukasion in marmay i ariv pa touseul. Prépar a zot in « plan de formasion », ousa nora in plas pou la disiplinn (Psom 127:4 ; Provèrb 29:17). Disipliné, i ve dir petèt donn in punision, mé i ve dir surtou fé konprann bann zanfan pou kosa lé paran i mèt an plas bann règleman (Provèrb 28:7). Aprann a li èm la Parol Jéova é konprann bann prinsip biblik (Psom 1:2). Sa va èd a li dévlop in konsians droit (Ébreu 5:14).

KOSA OU PE FÈR :

• Èd zot zanfan a voir Bondieu kom Kèlkin ke lé réèl an ki li pe mèt son konfians.

• Aprann a li koman rekonèt é évit bann danjé dann in bonpe domèn, kom par égzanp sak i pe trouvé su Lintèrnèt é su bann rézo sosio. Aprann a li kosa i fo fé pou pa tonm dann pièj bann pèrvèr séksuèl.