Kisa i lé le vré Bondieu ?

1, 2. Kèl késtion nou poz a nou souvan ?

BANN zanfan i poz in bonpe késtion. Kan i ésplik a zot in nafèr, zot i demann souvan : « Pou kosa ? » É kan i ésèy réponn a zot, banna i demann ankor : « Mé pou kosa ? »

² Nout tout, nou poz a nou bann késtion. Par égzanp : « Kosa mi sar manjé ? Kèl linj mi sar mèt ? Kosa mi sar achté ? » Nou poz a nou osi bann késtion su la vi é su lavnir. Mé kan nou trouv pa bann répons, souvan nou arèt rodé.

3. In paké d’moun i pans ke zot i pe pa trouv bann répons pou bann késtion ke zot i poz a zot. Akoz ?

³ Èske la Bib i réponn bann késtion inportan ke nou poz a nou ? Bann domoun i pans ke oui, mé ke li lé tro difisil pou konprann. Banna i pans ke sé seulman bann zansénian ou bann chèf relijieu i koné bann répons. Dot la ont parske zot i koné pa bann répons su detroi késtion. É ou, kosa ou pans ?

4, 5. a) Kèl késtion ou poz a ou ? b) Pou kosa ou doi kontinué rod bann répons ?

⁴ Lé sur ke ou ve konèt la répons su bann késtion la : « Èske la vi na in sans ? Kosa i éspas apré la mor ? Koman Bondieu i lé ? » Jézu, Lansénian ke in bonpe domoun i koné la di : « Kontinué demandé, é va donn a zot. Kontinué rodé, é zot va trouvé » (Matieu 7:7). Donk, kontinué rodé juskatank ou trouv bann vré répons.

⁵ Vréman, si ou « kontinué rodé », ou va trouv bann répons dan la Bib (Provèrb 2:1-5). Ou va voir ke sa lé pa difisil pou konprann. Sak ou va aprann va aport a ou in gran kontantman, é va donn a ou in gayar léspoir pou lavnir. Asteur, alon koz su in késtion ke in bonpe domoun i poz a zot.

ÈSKE BONDIEU I FÉ IN KONT AVÈK NOU ?

6. In bonpe d’moun i pans ke Bondieu i sousi pa li de zot. Akoz ?

⁶ In bonpe d’moun i pans ke Bondieu i fé pa in kont avèk zot. Banna i di ke, si Bondieu té sousi a li pou bann zumin, le monn i sré vréman diféran. Partou, néna la gèr, désèrtin i détès a zot é néna bann maleur. Bann zumin i tonm malad, zot i souf é zot i mor. Néna d’moun i demann a zot : « Si Bondieu i sousi a li de nou, akoz li arèt pa bann soufrans la ? »

7. a) Désèrtin i kroi ke Bondieu lé san keur. Akoz ? b) Kan in maleur i ariv, i fo pa akuz Bondieu. Pou kosa ?

⁷ Nadfoi, sak i ansègn la relijion i fé kroir bann domoun ke Bondieu lé san keur. Kan in maleur i ariv, zot i di sé Bondieu la voulu sa. An vré, kan zot i di sa, zot i akuz Bondieu. Mé la Bib i ansègn ke Bondieu lé jamé résponsab bann maleur. Jak 1:13 i ésplik ke li mèt pa a lépreuv ou ke li tèst pa pèrsonn par bann mové zafèr. Vèrsé la i di : « Kan in moun lé dann malizé, fo pa li di : “Bondieu lé antrèn tèst a moin.” Parske Bondieu i pe pa èt tésté par bann mové zafèr é li mèm li tèst pa pèrsonn komsa. » Sa i ve dir ke, mèm si Bondieu i anpèch pa bann maleur, sé jamé li i provok tousa (lir Job 34:10, 12).

8, 9. Kan nou néna bann problèm, pou kosa i sré pa jus ke i akuz Bondieu ? Donn in légzanp.

⁸ Alon pran in légzanp : In jeun ke lé majeur i viv ché son bann paran. Son papa i ièm a li bokou é la mont a li koman pran bann bon désizion. In jour, le marmay i désid pu ékout son papa é li kit la kaz. Li fé in ta mové zafèr é aprésa li gingn bann gro problèm. Selon ou, èske sé la fot le papa ? Si le garson néna bann problèm, èske ou diré sé parske le papa la lès a li alé ? Non ! (Luk 15:11-13). Désèrtin zumin la désid dézobéi Bondieu é fé bann mové zafèr. É kom le papa dan légzanp, Bondieu la lès a zot fèr. Donk, kan in maleur i ariv, i fo rapèl a nou ke Bondieu lé pa loteur. I sré pa jus rejèt la fot su li.

⁹ Pou kosa Bondieu la pa ankor fé arèt bann soufrans ? Li néna in bon rézon. Dann chapit 11, ou va aprann kosa la Bib i di la d’su. Mé ou pe èt sur ke Bondieu i ièm a nou, é ke, kan nou rankont bann problèm, lé pa son fot. Dan le fon, rienk li touseul néna le pouvoir règ tousa (Izai 33:2).

10. Pou kosa nou pe èt sur ke Bondieu va mèt fin la méchansté ?

¹⁰ Bondieu lé sin (Izai 6:3). Tout sak li fé lé pur é lé bon. Donk, nou pe fé a li konfians. Parkont, bann zumin lé pa kom Bondieu. Parfoi, banna i fé bann mové zafèr. É mèm le plu bon dirijan na poin le pouvoir pou fé disparèt tout bann déga ke bann mové moun la fé. La poin pèrsonn lé plu puisan ke Bondieu. Néna rienk Bondieu i gingn fé arèt la méchansté pou toultan é sé sa mèm ke li va fé. Lé sur, li va fé disparèt tout bann déga ke bann mové moun la fé (lir Psom 37:9-11).

KOSA BONDIEU I RESAN KAN BANN ZUMIN I SOUF ?

11. Kan Bondieu i voi a ou soufèr, kosa li resan ?

¹¹ Kosa Bondieu i resan kan li voi sak i éspas dan le monn? Oubien kosa li resan kan li voi a ou soufèr ? La Bib i ansègn ke li « ièm la justis » (Psom 37:28). Li sousi a li in bonpe pou sak lé bon é sak lé mové. Li détès voir bann zumin soufèr. Dan le pasé, kan li té voi la méchansté partou su la tèr, « té fé souf a li » (Jenèz 6:5, 6). É li la pa chanjé (Malaki 3:6). La Bib i ansègn ke Bondieu i fé vréman in kont avèk ou (lir 1 Pièr 5:7).

12, 13. a) Pou kosa nou ièm bann domoun ? É kosa nou resan kan nou voi bann soufrans ke néna dan le monn ? b) Pou kosa nou pe èt sur ke Bondieu va tir tout bann soufrans é linjustis ?

¹² La Bib i di osi ke Bondieu la kré a nou parèy ke li (Jenèz 1:26). Sa i ve dir ke li la fé a nou avèk mèm karaktèr ke li. Donk, si out keur i fé mal kan ou voi bann zinosan soufèr, lé sur ke le keur Bondieu i fé plus mal ankor ke sad ou ! Koman nou pe èt sur de sa ?

¹³ La Bib i ansègn ke « Bondieu lé amour » (1 Jan 4:8). Tout sak li fé, li fé sa par amour. É si nou gingn émé, sé parske Bondieu i ièm. Si ou lavé pouvoir pou tir bann soufrans é bann linjustis, èske ou noré fé ? Oui, parske ou ièm bann domoun. Bondieu néna pouvoir pou tir bann soufrans é linjustis. Li va fé sa, parske li ièm a nou ! Ou pe èt sur ke tout bann promès Bondieu ke lé éspliké o débu liv la, i sar réalizé ! Mé pou kroir bann promès la, ou la bezoin mieu konèt Bondieu.

BONDIEU I VE OU KONÉ A LI

14. a) Kosa i lé le non Bondieu ? b) Koman nou koné ke nou doi utiliz le non Bondieu ?

¹⁴ Si ou ve devnir kamarad avèk in moun, kosa ou va di a li an premié ? Out non. É Bondieu, èske li néna in non ? In bonpe relijion i di ke son non sé Bondieu ou Sénieur. Mé sa, lé pa bann non. Tousala lé bann mo pou ésplik se ke li lé, kom « roi » oubien « prézidan ». Bondieu i di son non sé Jéova. Nou lir dann Psom 83:18 : « Ou, ke i apèl Jéova, ou lé, a ou touseul le Tré O su tout la tèr ! » Bann zom ke la ékri la Bib, la utiliz le non Bondieu plus 7 000 foi. Jéova i ve ke ou koné son non é ke ou utiliz a li. Li di a ou son non, komsa ou devien son kamarad.

15. Kosa i ve dir le non « Jéova » ?

¹⁵ Le non Bondieu néna in sinifikasion vréman inportan. Son non i ve dir ke li lé kapab réaliz son projé é tout son bann promès. La poin rien i pe arèt a li. Rienk Jéova touseul i pe port le non laa.

16, 17. Pou kosa la Bib i di ke Bondieu lé a) « Toupuisan » ? b) « Roi pou toultan » ? c) « Kréateur » ?

¹⁶ Révélasion 15:3 i di : « Sak ou la fé lé gran é inkroiyab, Jéova Bondieu, le Toupuisan. Out bann zaksion lé droit é lé vré, a ou ke lé Roi pou toultan. » Kan i di ke Bondieu lé « Toupuisan » kosa i ve dir ? Sa i ve dir ke dan lunivèr, Jéova lé le plu puisan. É kosa i ve dir kan i di ke li lé « Roi pou toultan » ? Sa i ve dir ke li la toujour égzisté. Le Psom 90:2 i ésplik ke li égzis depui toultan é ke li va égzisté pou toultan. Èske sa lé pa inkroiyab ?

¹⁷ Néna rienk in seul Kréateur : Jéova. Révélasion 4:11 i di : « Ou mérit Jéova, nout Bondieu, de gingn la gloir, é loneur, é la puisans, parske ou la kré tout zafèr, é akoz out volonté, zot la égzisté é la été kréé. » Kosa i ve dir « Kréateur » ? I ve dir ke sé Jéova ke la kré tout zafèr : Bann zanj, bann zétoil, bann frui, bann zanimo é tout lé zot zafèr !

ÈSKE OU PE ÈT KAMARAD JÉOVA ?

18. Désèrtin i pans ke zot i poura jamé èt bann kamarad Bondieu. Akoz sa ? É kosa la Bib i di la d’su ?

¹⁸ Kan désèrtin i dékouv bann gayar kalité ke Jéova néna, zot i di : « Bondieu lé tèlman puisan, tèlman gran é tèlman loin. Pou kosa li va fé in kont avèk moin ? » Mé èske Jéova i ve ou pans komsa ? Non ! Li ve èt out Kamarad. Li ve kos koté ou. La Bib i di li lé « pa loin chakèn d’nou » (Akt 17:27). É li ve ou kos koté li. Li promèt ke si ou fé sa, « li va kos koté zot » (Jak 4:8).

19. a) Koman ou pe devnir kamarad Bondieu ? b) Anparmi bann gayar kalité ke Jéova néna, kèl ou ièm le plus ?

¹⁹ Koman ou pe devnir kamarad Bondieu ? Jézu la di : « Ala kosa i ve dir la vi pou toultan : ke zot i aprann konèt a ou, le seul vré Bondieu, é sèk ou la anvoiyé, Jézu Kris » (Jan 17:3). Kontinué aprann konèt Jéova é Jézu. Alor, ou poura gingn la vi étèrnèl, sétadir viv pou toultan. Par égzanp, ou la finn déja aprann ke « Bondieu lé amour » (1 Jan 4:16). Mé li néna dot gayar kalité. La Bib i di ke li « resan in bonpe la pitié, i pran pa la kolèr vitman é néna in gran lamour fidèl é lé gran an vérité » (Égzod 34:6). Li lé « bon é paré pou pardoné » (Psom 86:5). Li na la pasians é li lé fidèl osi (2 Pièr 3:9 ; Révélasion 15:4). Kan ou lir la Bib, ou va aprann ankor plus zafèr su Bondieu é su son bann tanpéraman.

20, 21. Koman ou pe èt kamarad Bondieu alor ke ou voi pa li ?

²⁰ Koman ou pe èt kamarad Bondieu alor ke ou voi pa li ? (Jan 1:18 ; 4:24 ; 1 Timoté 1:17). Kan ou lir la Bib, ou va aprann mieu konèt a li (Psom 27:4 ; Romin 1:20). É plus ou va konèt bann zafèr su li, plus ou va èm a li é plus ou va devnir gran kamarad avèk li.

²¹ Ou va konprann ke Jéova lé nout Papa : li la donn a nou la vi, é li ve ke nout vi lé le plugayar posib (Matieu 6:9). Sé sa ke tout bann papa i souèt pou zot zanfan, parske banna i ièm a zot (Psom 36:9). La Bib i ansègn ke ou pe devnir kamarad Bondieu (Jak 2:23). Jéova, le Kréateur lunivèr, i ve ou devien son kamarad !

22. Si désèrtin i ve ke ou arèt étudié la Bib, kosa ou doi fé ?

²² Petèt, désèrtin i voudré ke ou arèt étudié la Bib. Petèt zot la peur ou chanj relijion. Mé lès pa pèrsonn défann a ou devnir kamarad Bondieu. Jéova lé le pluméyeur Kamarad ou pe avoir.

23, 24. a) Pou kosa ou doi kontinué poz bann késtion ? b) Su kosa i sar kozé dann chapit 2 ?

²³ Nora detroi zafèr dan la Bib ke ou va pa konprann. Pa bezoin ou la ont poz bann késtion oubien demann lèd. Jézu la di ke nou doi èt kom bann ti marmay (Matieu 18:2-4). Bann marmay lé pa orgeyeu é zot i poz in bonpe késtion. Bondieu i ve ke ou trouv bann répons. Pou voir si sak ou aprann lé bien la vérité, étudié la Bib avèk sèryeu (lir Akt 17:11).

²⁴ Le méyeur moiyin pou aprann konèt Jéova sé étudié la Bib. Dann chapit 2, ou va aprann pou kosa la Bib lé pa parèy dot liv.