Out fami i pe èt ereu

1, 2. Kosa Jéova i ve pou bann fami ?

SÉ JÉOVA ke la maryé le premié mesieu èk le premié madam. La Bib i di ke li la kré le premié madam é ke li la « amèn a èl vèr lom ». Adan lété tèlman kontan, alor li la di : « Ala anfin le zo ke lé fé èk mon bann zo é la chèr ke lé fé èk mon chèr » (Jenèz 2:22, 23). Tousa i aprann a nou ke Jéova i ve ke bann domoun maryé lé ereu.

² Lé bien malereu ke in bonpe domoun la jamé konèt kosa i ve dir viv ereu dan zot prop fami. Pourtan, dan la Bib néna in kantité lansègnman ki pe èd chak moun dan la fami viv ereu ansanm inn é lot (Luk 11:28).

SAK BONDIEU I VE KE BANN MARI I FÉ

3, 4. a) Koman in mari i doi trèt son madam ? b) Pou kosa in mari é son madam i doi pardonn inn é lot ?

³ La Bib i di ke in mari i doi èm son madam é réspèk a èl. Lir Éfézien 5:25 juska 29. In mari i doi toultan montré ke li ièm son madam. Li doi osi protèj é prann soin son madam. Li doi jamé fé kékchoz pou fé souf a èl.

⁴ Koman in mari i doi konport a li kan son madam i fé bann zéreur ? La Bib i di èk bann mari : « Kontinué èm zot madam é i fo pa ke zot lé dur avèk banna » (Kolosien 3:19). Si ou lé in mari, oubli pa ke a ou osi, ou fé bann zéreur. Si ou ve ke Bondieu i pardonn a ou, alor ou doi pardonn out madam osi (Matieu 6:12, 14, 15). Pou ke zot lé ereu dan zot maryaj, in mari é son madam i doi pardonn inn é lot san rod le bout.

5. Pou kosa in mari i doi réspèk son madam ?

⁵ Jéova i ve ke bann mari i réspèk zot madam. In mari i doi prann in tan pou bien kalkulé tout sak son madam la bezoin, koté laféksion mé osi sak i fo a èl pou viv. Sa lé vréman inportan. Si in mari i trèt pa son madam kom ki fo, Jéova i pe refuz ékout son bann priyèr (1 Pièr 3:7). Jéova i ièm bann madam é bann mesieu osi. Le moun ke néna in bonpe la valeur pou Jéova, sé le moun ki mont son lamour pou Bondieu.

6. In mari é son madam lé « in seul chèr ». Kosa sa i ve dir ?

⁶ Jézu la montré ke in mari é son madam « i form pa seulman deu, mé in seul chèr » (Matieu 19:6). Zot i doi èt fidèl inn anvèr lot (Provèrb 5:15-21 ; Ébreu 13:4). In mari i doi kontant son madam par rapor son bann bezoin séksuèl, é in madam i doi fé parèy èk son mari (1 Korintien 7:3-5). I fo pa in mari i oubli ke « Okin bonom la jamé détès son prop kor ; mé li donn manjé é li pran soin son kor ». Donk, in mari i doi montré ke li ièm é ke li pran soin son madam. Sak in madam i ve surtou, sé ke son mari lé janti èk èl é ke li ièm a èl (Éfézien 5:29).

SAK BONDIEU I VE KE BANN MADAM I FÉ

7. Pou kosa i fo néna in chèf dan la fami ?

⁷ Dann chak fami i fo ke néna in chèf. Sé li i gid lé zot pou ke chak moun dan la fami i travay min dan la min ansanm. Dann 1 Korintien 11:3, nou lir : « Le chèf tout bonom, sé le Kris ; é le chèf le madam, sé lom ; é le chèf le Kris, sé Bondieu. »

8. Koman in madam i pe montré kèl néna in bonpe réspé pou son mari ?

⁸ Tout bann mari i fé zéreur. Mé kan in madam i soutien bann désizion son mari, é kan èl i èd a li èk gran keur, alor sa i aport bann bienfé pou tout la fami (1 Pièr 3:1-6). La Bib i di : « Lo madam i doi avoir in gran réspé pou son mari » (Éfézien 5:33). É si in mari lé pa dan le mèm relijion son madam ? Èl i doi kan mèm montré kèl néna in bonpe réspé pou li. La Bib i di : « A zot bann madam, mont zot soumision anvèr zot mari, pou ke, si désèrtin i obéi pa la parol, zot keur lé touché mèm si zot madam i rouv pa la bouch, gras le konportman zot madam, parske zot nora vu la preuv zot konportman pur é plin d’réspé » (1 Pièr 3:1, 2). Kan in madam néna in bon fason konport a li anvèr son mari, sa i pe èd son mesieu mieu konprann son bann kroiyans é réspèk son relijion.

9. a) Kan in madam lé pa dakor èk son mari, kosa èl i pe fé ? b) Dann Tit 2:4 é 5, nou trouv bann konsèy pou bann madam. Kosa i lé ?

⁹ Kan in madam lé pa dakor èk son mari, kosa èl i pe fé ? Èl i devré di èk son mari sak èl néna su son keur avèk réspé. Alon pran légzanp Sara. Lavé in jour, èl la di èk son mari, Abraam, in nafèr ke li la pa émé dutou. Mé Jéova la di èk Abraam : « Ékout son kozman » (Jenèz 21:9-12). Lé bien rar ke in mari va prann in désizion ke lé kontrèr sak la Bib i ansègn. Sé pousa ke in madam i devré soutien son mari (Akt 5:29 ; Éfézien 5:24). An plus, in madam ke na la sajès i pran soin son fami (lir Tit 2:4, 5). Kan son mari é son bann zanfan i voi ke èl i travay dur pou zot, alor, banna i ièm é i réspèk a èl ankor plus (Provèrb 31:10, 28).

10. Kosa la Bib i di sur la séparasion é le divors ?

¹⁰ Défoi, bann domoun maryé i pran vitfé la désizion sépar a zot ou mèm divorsé. Mé la Bib i di : « Ke in madam i sépar pa èk son mari. » Li di osi ke in « mari i doi pa kit son madam » (1 Korintien 7:10, 11). Kan désèrtin situasion lé tro grav, deu moun maryé i pe sépar a zot. Mé avan désid fé sa, zot i doi bien kalkulé avan. Asteur, kosa la Bib i di su le divors ? Li aprann a nou ke in moun i pe divorsé rienk pou in seul rézon : deu moun maryé i pe divorsé rienk si le mari ou le madam lavé bann rapor séksuèl avèk in moun ke lé pa son konjoin. (Matieu 19:9).

SAK BONDIEU I VE KE BANN PARAN I FÉ

11. Kosa bann zanfan la surtou bezoin ?

¹¹ Si ou néna zanfan, fé out posib pou pas in paké d’tan èk banna. Out zanfan la bezoin de ou. É surtou, marmay la bezoin ke ou aprann a zot konèt Jéova (Detéronom 6:4-9).

12. Kosa bann paran i doi fé pou protèj zot zanfan ?

¹² Le monn ke lé dirijé par Satan i devien mové ankor plus. Petèt ke désèrtin i voudré fé souf out zanfan, ou mèm komèt zagrésion séksuèl su zot. Désèrtin paran i suport pa koz la d’su. Mé zot i doi mèt an gard zot marmay é ésplik banna koman évit rant an kontak èk bann domoun komsa. Si ou néna zanfan, ou doi protèj bannaa (1 Pièr 5:8).

13. Koman bann paran i doi ansègn zot zanfan ?

¹³ Bann paran néna le résponsabilité aprann zot marmay bien konport a zot. Koman ou pe ansègn out bann zanfan ? Out zanfan la bezoin èt éduké, mé kan ou donn banna in koréksion, ou doi jamé èt dur ou brutal èk zot (Jérémi 30:11). Alé jamé korij banna kan ou lé an kolèr (regard la not n^o 30). Alé pa fé mal le keur out marmay avèk mové kozman « parèy i donn bann kou d’lépé » (Provèrb 12:18). Ésplik a zot pou kosa i fo èt obéisan (Éfézien 6:4 ; Ébreu 12:9-11).

SAK BONDIEU I VE KE BANN ZANFAN I FÉ

14, 15. Pou kosa bann zanfan i doi obéi zot bann paran ?

¹⁴ Jézu la obéi son Papa toultan, mèm kan lété difisil (Luk 22:42 ; Jan 8:28, 29). Lé parèy, bann zanfan i doi obéi zot paran, parske sé sak Jéova i ve (Éfézien 6:1-3).

¹⁵ Si ou lé ankor in marmay, ou trouv petèt ke lé difisil obéi out bann paran. Mé oubli pa sa : kan ou obéi, Jéova é out bann paran lé kontan de oub (Provèrb 1:8 ; 6:20 ; 23:22-25).

16. a) Koman Satan i ésèy pous bann jeun fé bann mové zafèr ? b) Pou kosa lé inportan ke out bann kamarad i ièm Jéova ?

¹⁶ Satan i pe ansèrv out bann kamarad oubien dot jeun, pou pous a ou fé bann mové zafèr. Li koné ke défoi lé vréman difisil luté kont bann lantrènman lé zot. Alon pran légzanp Dina, la fiy Jakob. Èl lavé bann kamarad ke té i ièm pa Jéova. Akoz sa mèm, èl é son fami, zot la gingn in paké d’problèm (Jenèz 34:1, 2). Si out bann kamarad i ièm pa Jéova, petèt ke banna va pous a ou fé kékchoz ke Jéova i détès. Si ou fé in mové zafèr, ou va fé mal le keur out fami é sak Bondieu, é ou osi, ou va soufèr de sa (Provèrb 17:21, 25). Sé pousa ke lé vréman inportan ke out bann kamarad i ièm Jéova (1 Korintien 15:33).

OUT FAMI I PE ÈT EREU

17. Kosa Bondieu i ve ke tout domoun dan la fami i fé ?

¹⁷ Kan tout domoun dan in fami i fé sak Bondieu i demann a zot, sa i évit a zot in bonpe problèm. Si ou lé in mari, èm out madam é mont ke ou na laféksion pou èl. Si ou lé in madam, réspèk out mari é mont out soumision anvèr li. I fo ke ou imit légzanp le madam ke néna dann Provèrb 31:10 juska 31. Si ou lé in papa oubien in momon, aprann out zanfan èm Bondieu (Provèrb 22:6). Si ou lé in papa, gid out fami in « bon fason » (1 Timoté 3:4, 5 ; 5:8). Si ou lé in marmay, obéi out bann paran (Kolosien 3:20). É oubli pa : nout tout, nou fé zéreur. Donk, nou doi pa mèt a nou su la oteur é nou doi demann pardon inn é lot. Tout domoun dan la fami i pe trouv dan la Bib bann konsèy ke Jéova i donn a li.