LESON 14

Fé resort bann zidé inportan

Ébreu 8:1

POIN INPORTAN : Èd sak lapou ékout aou, bien suiv out diskour. Mont klèrman koman chak poin inportan lé an lien avèk le but ou la fiks aou é avèk le sujé prinsipal.

KOMAN I FO FÉ :

Fiks aou in but. Demann aou si out diskour lé fé pou informé, pou konvink su in nafèr oubien i ankouraj fé kékchoz. Tien kont de sa kan ou fé out diskour. Asur aou ke tout bann zidé inportan i akord bien avèk le but le sujé.

Demann aou mèm : « Kèl késtion ou kèl remark sak lapou ékout anou i pouré di su le sujé ? Dan kèl lord zot i pouré soulèv zot bann késtion é zot remark ? » Aprésa, ranj bann zidé dan lord la, pou ke domoun i gingn bien suiv, konprann é èt dakor avèk.
Fé resort lidé prinsipal out diskour. Depui premié débu out prézantasion juska la fin, rapèl lidé prinsipal out diskour. É pousa, répèt bann mo inportan ke nou retrouv dan le tit oubien utiliz dot mo ki ve dir mèm zafèr.
Prézant bann zidé inportan in fason klèr é sinp. Choizi rienk bann zidé inportan ke lé an lien avèk le tit le sujé. Aprésa, ou poura ansègn kom ki fo bann zidé inportan la, dan le tan ke la akord aou. Mèt pa in ta zidé inportan dedan. Prézant chak poin pou ke lé fasil pou konprann, fé inn ti poz ant chak lidé, é près pa ou, kan ou koz su in lidé apré lot.

Dan out bann premié parol, ou pe di kèl zidé inportan ou sar koz desu, pou èd domoun bien suiv sak ou di. Ou pe osi répèt bann zidé inportan la dan out bann dèrnié parol, pou èd domoun rapèl azot tousa.