LESON 11

Koman profit a fon out léktur la Bib ?

Vèrsion inprimé

Èske ou la déja trouv aou devan in gro projé ? Petèt ou té san pa ou kapab fé sa… Pou rann sa plu sinp, petèt ou la partaj ali an pluzieur ti travay. Lé parèy kan i ve lir la Bib. Riskab ou demann aou koman ou sa komansé. Dann leson la, nou va voir bann zidé sinp ke va èd aou èm lir é étudié la Bib.

1. Poukosa nou doi lir la Bib tou lé jour ?

In moun ki lir la Bib, oubien la « loi Jéova » tou lé jour, i sra ereu é li va réusi sak li fé (lir Psom 1:1-3). Pou komansé, ésèy lir la Bib detroi minut tou lé jour. Plus ou va dékouv sak la Bib i di, plus ou va èm lir ali.

2. Kosa i fo fé pou bien profit out léktur la Bib ?

Pou profit a fon la léktur la Bib, i fo pran le tan pou réfléchi èk sèryeu su sak nou lir, sa i ve dir « médité » (Jozué 1:8, ti not). Kan ou lir, demann aou : « Kosa pasaj la i aprann amoin su Jéova ? Koman mi pe mèt sa an pratik dan mon vi ? Koman mi pe utiliz sa pou èd lé zot ? »

3. Koman trouv in tan pou lir la Bib ?

Èske lé difisil pou ou trouv in tan pou lir la Bib ? Ou lé pa le seul komsa. Fé zéfor pou « utiliz out tan le méyeur fason posib » (Éfézien 5:16). Par égzanp ou pe choizi in moman éspré pou lir la Bib tou lé jour. Detroi i lir ali gran matin, dot dan la poz midi, dot ankor le soir avan alé dormi. É ou, kèl moman i aranj aou ?

ALON APRANN PLUS

Alon voir koman ou pe rann out léktur la Bib vréman plu gayar. Alon voir osi koman prépar aou pou profit a fon out létud la Bib.

Montaj : Furmezur li grandi, in garson i aprann èm manj in nafèr. 1. Le garson lé ant 2 keur pou manj sak li èm pa. 2. Le garson la grandi. Li manj sak li té ièm pa. 3. Le garson lé ankor plu gran, é asteur li ièm manj sak li té ièm pa. — Nou pe aprann èm manj detroi zafèr. Lé parèy, nou pe aprann èm lir la Bib.

4. Aprann èm out léktur la Bib

Dann premié débu, lé pa tro fasil lir la Bib, mé ou pe ‘aprann gingn vréman lanvi’ lir ali, kom in moun ki aprann èm manj in nouvo zafèr. Lir 1 Pièr 2:2 é koz su késtion la :

Èske ou kroi ke si ou lir la Bib tou lé jour, ou va fini par èm sa é ke ou sra présé fé sa ?

Gard le VIDÉO pou voir koman bann jeun la aprann èm zot léktur la Bib. Aprésa, koz su bann késtion an d’sou la.

VIDÉO : Bann jeun ki aprann èm la Parol Bondieu (5:33)

Kèl problèm bann jeun la gingn surmonté ?
Kosa la èd azot niabout lir la Bib tou lé jour ?
Kosa la pèrmèt azot rann zot léktur la Bib vréman plu gayar ?

Detroi zidé pou komansé :

Choizi in traduksion sur é ke lé modèrn. Ésèy la Traduction du monde nouveau si néna dan out lang.
Komans par in parti ke ou trouv intérésan. Ou va trouv bann zidé dan le tablo « Pran plézir pou komans lir la Bib. »
Ékri sak ou la lir. Pousa, utilizle tablo « Mon léktur la Bib ».
Utiliz laplikasion JW Library^®. Gras laplikasion la, ou pe lir oubien ékout la Bib partou ousa ou lé, avèk in téléfonn oubien in not laparèy.
Gard tout bann dokuman ke néna an plus dan la Traduction du monde nouveau. Dan bann dokuman la, ou va trouv bann kart, bann tablo é in léksik ke va rann out léktur la Bib plu gayar.

5. Prépar out létud la Bib

Lir Psom 119:34 é koz su késtion la :

Poukosa lé inportan priyé avan lir la Bib oubien avan prépar out létud la Bib ?

Koman profit a fon chak létud ? Kan ou prépar in leson dann liv la, ésèy le fason an d’sou la :

Lir bann premié paragraf dan le leson.
Rod bann vèrsé é lir azot, é ésèy konprann kèl rapor néna avèk le lidé ke néna dan le paragraf.
Soulign bann mo inportan oubien bann group de mo ki réponn bann késtion ; sa va èd aou kan ou va koz su le leson èk out lansénian.

Montaj : In madam i prépar son létud la Bib. A. Èl i lir bann premié paragraf dann leson la. B. Èl i lir dan la Bib bann vèrsé ke lé dan le leson. C. Èl i soulign bann mo é bann group de mo inportan dan le leson.

Ou té koné sa ou ?

Bann Témoin Jéova la utiliz diféran traduksion la Bib, mé nou préfèr La Bible. Traduction du monde nouveau parske li lé égzak é fasil pou konprann, é ke li utiliz le non Bondieu (gard lartik « Èske bann Témoin Jéova néna zot prop Bib azot ? » su jw.org).

NADFOI DOMOUN I DI : « Lé tro difisil étudié la Bib. Ma la poin le tan é ma la poin asé la fors pou fé sa. »