LESON 53

Bann divèrtisman ki fé plézir Jéova

Vèrsion inprimé

Jéova lé « le Bondieu ereu » (1 Timoté 1:11). Li ve ke nou lé ereu, nou osi, é ke nou profit la vi. Li lé kontan kan li voi anou pran le tan repoz anou é détann anou. Dann leson la, nou va voir koman nou pe utiliz nout bann moman détant, in fason ki fé anou du bien é ki fé plézir Jéova.

1. Kosa i fo nou tien kont kan nou choizi nout bann divèrtisman ?

Kosa ou ièm fé pou détann aou ? Detroi i ièm rès trankil zot kaz pou lir in liv, ékout la muzik, gard in fim oubien alé su Intèrnèt. Dot i préfèr fé spor avèk kamarad, kom randoné, alé najé oubien fé in spor an group. Kinport nout bann gou, nou doi fé atansion ke nout bann divèrtisman « i kontant le Sénieur » (Éfézien 5:10). Lé inportan parske bonpe divèrtisman néna dedan oubien i ankouraj bann zafèr ke Jéova i détès, kom la violans, bann mové konduit séksuèl oubien le spiritism (lir Psom 11:5). Kosa i pe èd anou bien choizi nout bann divèrtisman ?

Si nout bann kamarad i ièm Jéova, zot nora in bon linfluans su nou é zot va pous anou choizi bann bon divèrtisman. Kom nou la vu dan le leson 48, « sak i march èk lé saj va ni saj ». Parkont, sak i pas le tan avèk bann moun ki ièm pa bann rekomandasion Bondieu « va mal tourné » (Provèrb 13:20).

2. Poukosa i fo nou fé atansion le tan ke nou pas pou amuzé ?

Choizi in bon divèrtisman lé bien, mé i fo fé atansion le tan ke nou pas dann divèrtisman la. Sinon, nou nora pu le tan fé bann zafèr inportan. La Bib i ankouraj anou « utiliz [nout] tan le méyeur fason posib » (lir Éfézien 5:15, 16).

ALON APRANN PLUS

Alon voir koman bien choizi nout bann divèrtisman.

3. Rejèt bann mové divèrtisman

Poukosa nou doi bien choizi nout bann divèrtisman ? Gard le VIDÉO é koz su bann késtion ki vien apré.

VIDÉO : Koman bien choizi nout bann divèrtisman ? (4:39)

Kosa lé parèy ant bann konba gladiateur é detroi divèrtisman ke néna zordi ?
Kosa Danny la aprann su bann divèrtisman ?

Lir Romin 12:9 é koz su késtion la :

Koman vèrsé la, i pe èd aou pou choizi out bann divèrtisman ?

Kosa Jéova i détès ? Lir Provèrb 6:16, 17 é Galat 5:19-21. Aprésa koz su késtion la :

Anparmi bann zafèr ki di dan bann vèrsé la, lékèl i trouv souvan dan bann divèrtisman zordi ?

Avan choizi in divèrtisman...

demann aou :

Kosa ? Èske néna dedan bann zafèr ke Jéova i détès ?
Kansa ? Èske sa i anpèch amoin fé bann zafèr inportan ?
Kisa ? Èske i amèn amoin frékant de pré oubien souvan bann moun ki ièm pa Jéova ?

Pou èt an sékurité, i fo rès le plu loin posib le danjé. Donk nou doi rès loin tout bann divèrtisman ke lé mové.

Su in rout dan la montagn, in loto i roul dann bor ranpar. Li lé pré pou dérapé é chavir dann fon.

4. Utiliz bien out tan

Gard le VIDÉO é koz su le késtion ki vien apré.

VIDÉO : Èske ou kontrol out tan ? (2:45)

Le frèr té regard pa rien ke lété mové, mé kosa lété son problèm ?

Lir Filipien 1:10 é koz su késtion la :

Koman vèrsé la i pe èd anou, désid konbien d’tan nou sar pasé pou amuz anou ?

5. Choizi bann bon divèrtisman

Detroi divèrtisman i fé pa plézir Jéova, mé na bonpe ke lé bon. Lir Éklézias 8:15 é Filipien 4:8 é koz su késtion la :

Kèl bon divèrtisman ou ièm ?

Montaj : bann domoun tout laj i détann azot diféran fason. 1. In jeun fiy i ékout la muzik é i désinn. 2. 3 jeun marmay i joué baskèt. 3. 2 garson i fé vélo. 4. Inn ti garson i konstrui in ti loto an boi. 5. In mesieu i joué tanbour. 6. In garson i joué jeu vidéo loto èk son papa. 7. In madam i pran foto dan la natur. — I égzis in bonpe divèrtisman ke lé bon.

NADFOI DOMOUN I DI : « Lé pa grav avoir bann divèrtisman ke néna la violans, bann mové konduit séksuèl oubien le spiritism dedan. Le plus inportan, sé pa fé bann zafèr la. »