SUJÉ POU LÉTUD 47
TI CHANTÉ No 38 Jéova va rand aou for
« Ou lé in moun ké néna in bonpé la valèr » !
« Ou lé in moun ké néna in bonpé la valèr » (DAN. 9:23).
SAK NOU SA OIR
Sujé-la va èd sak i pans ké zot i vo pa rien, é va rasur azot ké Jéova i èm azot vréman.
1-2. Kosa i pé èd anou èt vréman sur ké nou na la valèr pou Jéova ?
BANN sèrvitèr Jéova na la valèr pou li. Mé désèrtin i oi pa zot komsa. Pétèt parsk’in moun la fé santi azot ké zot i vo pa rien. Èské sé out ka ? Si oui, kosa i pé èd aou èt sur ké ou kont pou Jéova ?
2 In nafèr k’i pé èd aou, sé lir bann zistoir dan la Bib k’i amont koman Jéova i vé ké domoun lé trèté. Jézu té rèspèk lé zot é li té janti èk zot. É sa té fé mont, ké tout domoun na la valèr pou li èk son Papa, mèm si désèrtin i san azot inutil (Jan 5:19 ; Ébré 1:3). Dann sujé-la nou sa oir : 1) koman Jézu la èd domoun konpran ké zot na la valèr é 2) koman nou pé èt vréman sur ké nou na in bonpé la valèr pou Bondié (Ajé 2:7).
KOMAN JÉZU LA ÈD DOMOUN KONPRAN KÉ ZOT NA LA VALÈR
3. Kan bann domoun Galilé la vni rod lèd sanm li, koman Jézu la trèt azot ?
3 Kan Jézu la prèch an Galilé, domoun té ariv an pagay pou ékout ali é pou èt géri. Jézu la vu « zot lété maltrèté é largé kom bann ti brébi san gardien » (Mat. 9:36 ; agard bann not létud an fransé). Pou bann chèf la rolijion, zot té pa asé inportan pou k’i fé in ka èk zot, é an plis ké sa bann chèf-la té apèl azot « bann modi » (Jan 7:47-49 ; lo ti not létud an fransé). Mé Jézu li, li la fé mont ké bann domoun-la navé la valèr, li la pran lo tan géri azot é done banna in lamontraj (Mat. 9:35). É osi, pou èd ankor plis domoun, li la form son bann zapot pou prèché é li la done azot lo pouvoir géri sak lé malad (Mat. 10:5-8).
4. Kosa nou aprann su la fason Jézu té trèt sak té rabèsé par lé zot ?
4 Jézu té janti é té rèspèk sak té ékout ali. Sa i fé mont bien ké sak lé rabèsé par lé zot na la valèr pou li é pou son Papa. Si ou sèrv Jéova mé k’ou na linprésion ou vo pa rien, réfléchi su la manièr Jézu la aji èk so bann ti moun ké té vé aprann plis èk li. Sa va èd aou oir ké ou na la valèr pou Jéova.
5. Rakont sak la ariv inn ti madam ké la vni oir Jézu kan li té Galilé.
5 Jézu la pa prèch sèlman èk bann foul, mé li té fé osi in kont èk chak moun. Par égzanp, kan li la prèch Galilé, Jézu la rankont in ti madam ké té arèt pa pèrd lo san pandan 12 zané, é sa té fé souf aèl (Mark 5:25). Dapré la Loi, èl té pa pur akoz maladi-la, é si in moun té touch aèl li osi li té pa pur. Donk lé posib ké souvan èl té rès tousèl. An plis ké sa, èl té gingn pa alé dan la sinagog oubien dan bann fèt pou ador Jéova èk lé zot (Lév. 15:19, 25). Lé sur, son maladi té fatig aèl, mé an plis pétèt èl té san aèl inutil (Mark 5:26).
6. Kosa lo madam la fé pou èt géri ?
6 Madam-la té vé Jézu té géri aèl parsk’èl té souf in ta. Mé èl la pa parti oir ali pou domand ali. Akoz sa ? Pétèt èl té jéné é èl lavé ont akoz son situasion. Oubien pétèt èl lavé pèr Jézu té rant su èl, parsk’èl la vni dan la foul alor k’èl té pa pur. Donk èl la touch sèlman in ti bout lo linj Jézu parsk’èl té sur ké rienk sa noré géri aèl (Mark 5:27, 28). É èl lavé rézon aoir in gran foi komsa ! Èl la géri ! Kan Jézu la domandé kisa lavé touch ali, èl la di sak èl la fé. Koman Jézu la trèt aèl ?
7. Koman Jézu la trèt so madam ké té souf in ta ? (Mark 5:34).
7 Jézu la trèt lo ti madam èk jantiyès é rèspé. Li la vu ké kap kap lavé mont su èl (Mark 5:33). Sé pou sa li la koz èk èl in fason janti é li la ankouraj aèl. Kan li la ansèrv bann mo « mon ti fi », li té vé pa fé mont sèlman son rèspé mé osi son jantiyès èk son lamour (lir Mark 5:34). Lo ti not pou létud i èsplik ké sé lo sèl landroi ousa Jézu i apèl in madam « mon ti fi », pétèt parské lo situasion té in pé délika é ké lo ti madam té pou tranblé. Majine koman sa la soulaj aèl ! Si Jézu lavé pa rasur aèl, èl noré été géri lé vré, mé dan son kèr èl noré santi aèl koupab. Olèrk sa Jézu la èd aèl oir aèl kom èl té vréman, in ti fi présié pou son Papa dann sièl.
8. Kèl difikulté in sèr Brézil la pas dédan ?
8 Jordi osi, néna détroi sèrvitèr Bondié ké néna bann problèm santé k’i dépit azot é k’i fé santi azot inutil. Mariaa, in pionié pèrmanan laba Brézil, lé né san janb é san min goch. Èl i rakont : « Kan mi té lékol, toultan mi té fé arsèl amoin parské mi lé andikapé. Bann marmay lékol té done amoin bann ti non ké té blès amoin. Mèm mon prop famiy té fé konpran amoin mi té inutil. »
9. Kosa la èd Maria konpran kèl na la valèr pou Jéova ?
9 Kosa la èd Maria ? Kan èl la vni Témoin Jéova, bann frèr é sèr la konsol aèl é zot la èd Maria oir aèl kom Jéova i oi aèl. Èl i di : « Na poin asé la plas dan mon karné pou not lo non tout sak la èd amoin ! Mi di gran mèrsi Jéova èk tout mon kèr pou so gayar ti famiy frèr é sèr li la done amoin. » Bann frèr é sèr la vréman èd Maria konpran k’èl na la valèr pou Jéova.
10. Kèl problèm té pou fatig Mari Magdala ? (agard osi bann zimaj).
10 Réfléchi in ninstan su la fason Jézu la èd in not moun : Mari Magdala. Èl té posédé par sèt démon ! (Luk 8:2). Surman akoz bann démon-la, èl té fé bann zafèr bizar, é domoun té évit aèl. Èl té souf vréman in bonpé, pétèt èl lavé pèr, é èl té pans ké pèrsone noré jamé èm aèl oubien èd in moun kom èl. Pourtan in moun la bien fé sort bann démon ké té pou fé souf aèl, é surman té Jézu. Aprésa èl la suiv ali. Kosa Jézu la fé ankor pou èd Mari konpran kèl navé la valèr pou Bondié ?
Koman Jézu la fé konpran Mari Magdala kèl navé la valèr pou Jéova ? (agard bann paragraf 10-11).
11. Koman Jézu la fé konpran Mari Magdala kèl navé la valèr pou Jéova ? (agard osi bann zimaj).
11 Jézu la done lonèr Mari Magdala pou voyaj ansanm li é son bann disip kan zot té sa prèchéb. Dukou, kan Jézu té done lamontraj lé zot, aèl osi té anprofit. É lo jour Jézu la résusité, èl té an parmi bann promié moun li la koz avèk. Jézu la done aèl lo mision alé di bann zapot ké li té fine résusité. Èské tousa i amont pa kèl navé vréman la valèr pou Jéova ? (Jan 20:11-18).
12. Èsplik poukosa Lidia té san aèl rojèté akoz son pasé.
12 Kom pou Mari Magdala, na in paké domoun jordi i san azot rojèté. Lidia, inn sèr Lèspagn, i di k’avan son nésans son momon té vé avorté. Èl i rapèl ké kan èl té ankor ti marmay, son momon té fé pa in kont sanm èl é té di aèl bann kozman sovaj. Èl i di : « Kom momon la jamé fé mont son lamour pou moin, sak mi té vé, sété èt èmé é aksèpté. Mavé pèr ké, kinport sak mi té fé, domoun noré jamé èm amoin parské momon lavé fé kroir amoin ké mi té in mové moun. »
13. Kosa la èd Lidia konpran kèl na la valèr pou Jéova ?
13 Kan Lidia la komans étudié la Bib, son vi la chanjé. La priyèr, la lèktur la Bib èk tout la jantiyès bann frèr é sèr lavé pou èl, tousa la la èd aèl konpran k’èl navé la valèr pou Jéova. Èl i rakont : « Toultan mon mari la pou di amoin koman li èm amoin. Chak instan li rapèl amoin mon bann kalité. É mon bann bon kamarad i fé parèy. » Èské ou pouré èd in moun dan out lantouraj, konpran ké li na la valèr pou Jéova ?
KOMAN OIR ANOU KOM JÉOVA I OI ANOU
14. Koman 1 Samuèl 16:7 i èd anou konpran koman Jéova i oi anou ? (agard osi lankadré « Akoz bann sèrvitèr Jéova néna la valèr pou li ? »).
14 Rapèl aou ké Jéova i oi pa ou kom lo monn i oi aou (lir 1 Samuèl 16:7). Li mézir pa out valèr dapré out laparans, out kont an bank oubien si ou la parti loin lékol (Izai 55:8, 9). Sé pou sa, olèrk baz aou su sak domoun i pans, ésèy oir aou kom Jéova i oi aou. Dan la Bib néna bann zistoir k’i koz dési domoun ké té san azot inutil, kom Éli, Naomi èk Ane. Kan ou lir zot zistoir, agard bien koman Jéova té èm azot vréman. Ou pé osi ékri sak la ariv aou dan out vi, k’i fé mont aou ké ou lé présié pou Jéova é ké li èm aou vréman. Akoté, ou pé osi fé détroi ti rochèrch dan nout bann publikasion su koman nou doi oir anouc.
15. Akoz Danièl navé in bonpé la valèr pou Jéova ? (Danièl 9:23).
15 Ou pé èt sur ké ou na la valèr pou Jéova parské ou lé fidèl. Na in moman doné, kan li navé dan lé 90 zan, lo profèt Danièl té san ali vréman fatigé é dékourajé (Dan. 9:20, 21). Koman Jéova la ankouraj ali ? Bondié la anvoy lanj Gabrièl pou èd Danièl rapèl ali ké li té « in moun ké néna in bonpé la valèr » é ké li la antand son priyèr (lir Danièl 9:23). Akoz Danièl navé in bonpé la valèr pou Bondié ? Parské li té fidèl é li té èm sak lé jus (Ézék. 14:14). Jéova la lès sa dan la Bib pou konsol anou (Rom. 15:4). Lé parèy, Jéova i ékout osi out bann priyèr é ou na la valèr pou li parské ou èm sak lé droit é ou rès ali fidèl (Miché 6:8 ; Ébré 6:10).
16. Kosa i pé èd aou oir Jéova kom in Papa k’i èm aou ?
16 Oi Jéova kom in Papa k’i èm aou. Sak li vé sé èd aou, pa tir défo su ou (Ps. 130:3 ; Mat. 7:11 ; Luk 12:6, 7). Réfléchi ladsi la èd in bonpé frèr é sèr ké té san azot inutil. Par égzanp, Michelle, inn sèr Lèspagn, té san aèl inutil é rojèté parské son mari la done aèl bann kozman sovaj pandan in bonpé zané. Èl i di : « Chak foi mi san amoin inutil mi ésèy majine Jéova antrinn angarot amoin dan son dé bra pou protèj amoin é fé mont amoin ké li èm amoin » (Ps. 28:9). Lauren, inn sèr Lafrik du Sud i rapèl aèl : « Si Jéova la ral amoin koté li, si pandan tousa d’zané li la èd amoin rès kosté sanm li, é ké li la mèm ansèrv amoin pou amont la Bib lé zot, sé ké mi na la valèr é mi lé util pou li » (Ozé 11:4).
17. Kosa i pé èd aou èt sur ké ou kontant lo kèr Jéova ? (Psom 5:12 ; agard osi lo zimaj).
17 Inkièt pa, ou kontant lo kèr Jéova (lir Psom 5:12). David la konpar lo kontantman Jéova néna pou nou, èk « in gran boukliyé » k’i protèj domoun jus. Kan ou koné ké Jéova lé kontan dé ou é ké li soutien aou, sa i pé protèj aou é donk anpèch aou pansé ké ou vo pa rien. Koman ou pé konèt ké ou kontant lo kèr Jéova ? Kom nou la vu, Jéova la done aou la Bib pou fé konèt aou kosa li rosan pou ou. É li ansèrv osi bann zansien, bann bon kamarad é dot moun ankor pou rapèl aou ké ou na la valèr pou li. Kosa ou dévré fé kan ou rosoi bann zankourajman komsa ?
Konèt ké nou kontant lo kèr Jéova i pé èd anou arèt pansé ké nou vo pa rien (agard paragraf 17).
18. Akoz ou dévré aksèp bann ti konpliman ?
18 Aksèp kan sak i koné aou é i èm aou, i fé aou bann ti konpliman. Gard bien sa dan out tèt, pétèt Jéova i ansèrv banna pou fé konpran aou ké ou kontant son kèr. Michelle, lo ti sèr ké nou la koz dési in pé avan, i di : « Ti pa ti pa, mi aprann aksèp bann ti konpliman ké lé zot i fé amoin. Lé dur, mé mi koné sé sak Jéova i vé mi fé. » An plis, bann zansien plin lamour la èd Michelle konpran ké Jéova i èm aèl. Astèr èl lé pionié é èl i travay pou Bétèl dépi son kaz.
19. Akoz ou pé èt sur ké ou na la valèr pou Jéova ?
19 Èk jantiyès, Jézu i rapèl anou ké nou kont vréman pou nout Papa dann sièl (Luk 12:24). Donk nou pé èt sur ké nou lé présié pou Jéova. Oubli pa sa ! É alon fé nout méyèr posib pou èd lé zot konpran ké zot na la valèr pou Bondié !
TI CHANTÉ No 139 Majine aou dann monn nouvo
a La chanj détroi non dann sujé-la.
b Aparaman, Mari Magdala lété an parmi bann madam ké la voyaj ansanm Jézu. Bann madam-la la ansèrv zot prop larjan pou pran soin Jézu èk bann zapot (Mat. 27:55, 56 ; Luk 8:1-3).