Èské la vérité néna ankor la valèr jordi ?

Èské ou néna linprésion lé plizanpli difisil konèt sak lé vré é sak lé fo ? Jordi, in bonpé domoun i fié plis su sak zot i rosan, olèr k’su sak lé vré, sak i èspas vréman. Par ègzanp, i fé pa lontan, la mèt lo mo « post-vérité », dann diksionèr.a La invant mo-la pou koz su fason pansé-la. Sa i korèspon bien lo monn koméla, ousa bonpé domoun i pans ké la vérité i ègzis pa.

Néna lontan domoun i pans komsa. Néna 2 000 zané an arièr, lo gouvèrnèr romin Pons Pilat la lans Jézu kèstion-la : « Sé koué la vérité ? » (Jan 18:38). An vré, Pilat té pa la èk lo répons, mé son kèstion lété pli inportan ké sak li té pans. La fason la Bib i répond kèstion-la lé vréman intérèsan, i pé èd anou démay lo vré èk lo fo dan so lanbians post-vérité nou viv jordi.

Èské la vérité i ègzis vréman ?

Oui. La Bib i ansèrv lo mo « vérité » pa sèlman pou koz su sak i èspas vréman, mé osi pou sak lé jus é droit. La Bib i amont ké la vré vérité i sort koté Jéovab, é i apèl ali « Bondié la vérité » (Psom 31:5). Dan la Bib néna la vérité k’i sort koté Bondié, i konpar ali èk in fanal k’i amont domoun kèl chemin i fo pran dan so monn k’i koné pu ousa li sava (Psom 43:3 ; Jan 17:17).

Koman trouv la vérité ?

Bondié i domand pa nou, kroir tout sak la Bib i di san réfléchi. Olèr k’sa, li di anou, fié pa dési nout bann santiman mé ansèrv nout rézon (Romin 12:1). Li vé nou fé march ‘tout nout pansé,’ pou aprann konèt ali é èm ali, é li di anou, ézit pa tès sak la Bib i amont pou oir si lé vré (Matié 22:37, 38; Akt 17:11).

Kisa la invant la mansonjri ?

La Bib i di, sé lo Diab, lènmi Bondié, la invant la mansonjri. Dayèr i apèl ali « papa la mansonjri » (Jan 8:44). Li la komans ramas mantèr èk Adan è Èv (Jènèz 3:1-6, 13, 17-19 ; 5:5). É dépi sa, li la kontinié fane la mansonjri dési Bondié é trafik la vérité (Révélasion 12:9).

Poukosa jordi la mansonjri lé partou ?

Dann lépok nou viv, ké la Bib i apèl « bann dèrnié jour », Satan i manigans pli k’jamé pou tronp domoun. Souvandéfoi, domoun i ramas mantèr pou chap la may, oubien pou anprofit su lé zot (2 Timoté 3:1, 13). I trouv osi bonpé la mansonjri dan bann rolijion. Kom la Bib lavé anonsé, in bonpé domoun « va rod bann lamontrèr pou pas la pomad », é zot va préfèr « arèt ékout la vérité é [...] ékout bann zistoir mantèr » (2 Timoté 4:3, 4).

Poukosa la vérité lé inportan ?

Pou fé konfians domoun nou la bézoin la vérité. Si na poin la konfians, lé pa posib viv nout tout ansanm é i gingn pi fé kamarad èk pèrsone. Bondié i vé ké nou baz nout ladorasion su la vérité. La Bib i di : « sak i ador ali, i doi ador ali èk lèspri é la vérité » (Jan 4:24). Pou konèt koman la vérité k’lé dan la Bib i èd pou détèk bann mansonjri bann rolijion é chap la may, lir bann zartik « Des mensonges qui empêchent d’aimer Dieu ».

Poukosa Bondié i vé atoupri mi koné la vérité ?

Bondié i vé ou viv pou toultan, é pousa i fo ou aprann la vérité su li (1 Timoté 2:4). Si ou aprann konèt sak Bondié i èm é sak li détès, é ké ou mèt sa an pratik dan out vi, ou va vni son kamarad (Psom 15:1, 2). Pou èd tout domoun konèt la vérité, Bondié la anvoy son Garson dési la tèr. Li vé nou ékout é nou suiv bann lamontraj Jézu (Matié 17:5 ; Jan 18:37).

Kan va fini èk la mansonjri in bon foi pou tout...

Bondié i détès sak i ramas mantèr èk lé zot pou roul azot. Li la promèt tir la mansonjri é tout sak i ramas mantèr dési la tèr (Psom 5:6). Lèr-la nou va oir vréman sak Provèrb 12:19 i di : « La bouch k’i di la vérité va dur pou toultan. »