Kèl formasion bann Témoin Jéova i gingn ?
Chak Témoin Jéova i arèt pa èt formé. Lo formasion ké chakèn i gingn, i touch tout bann domèn son vi krétien, surtou la prédikasion. Jézu la ordone son bann disip pou alé fé laktivité prédikasion-la : prèché é amont lo gayar nouvèl dési lo Roiyom Bondié (Matié 24:14 ; 28:19, 20). Nou lé formé dan nout bann rénion chak somèn é dan nout bann lasanblé chak lané. Bann Témoin Jéova ké néna bann rèsponsabilité dan lasanblé é dan lorganizasion, i gingn dot formasion dan bann zékol èspésial bazé su la Bib.
Dan lartik-la
Kèl formasion bann Témoin Jéova i gingn ?
Bann rénion lasanblé. Chak somèn, nou ador Bondié dan bann zandroi k’i apèl sal lo Roiyom, é nou fé sa 2 foi la somèn. Dabitud, néna in rénion la somèn é in not lo ouikèn. Toulmoun i pé vni é i fé jamé la kèt.
Rénion la somèn. Nou gingn bann konsèy pou aprann bien lir, pou bien koz èk domoun, pou gingn koz dovan domoun, pou prèché é pou amont la Bib lé zot. Pou done formasion-la, i ansèrv bann diskour, bann diskusion, bann ti miz an sèn é bann vidéo. Sa i èd anou ni pli gabié dan nout fason koz dési la Bib é dan nout fason fé bann zétud la Bib. Tout sak i vien bann rénion-la, lé formé é zot i aprann in bonpé zafèr osi. An plis ké sa, bann rénion-la i ranfors nout foi, nout lamour pou Bondié é pou tout sak i sèrv Jéova.
Rénion lo ouikèn. La rénion an ouikèn lé an 2 parti. Dabor néna in diskour pou bann domoun k’i vé konèt plis dési la Bib. Lo dézièm parti lé in diskusion bazé dési in lartik La Tour d’Garda, avèk bann kèstion ké lé pozé é sak lé la, i done bann répons. Bann zartik-la, i analiz bann tèm é bann prinsip la Bib ké lé util dan nout prédikasion é osi dan nout vi tou lé jour.
Bann zasanblé réjional é sirkonskripsion. Chak lané, i fé 3 gran lasanblé k’i rogroup plizièr lasanblé lokal ansanm. Sé bann zévènman gadianm ousa i koz dési in tèm tiré dan la Bib, é néna osi bann diskour, bann miz an sèn, bann témoignaj é bann vidéo. Kom bann rénion dan lasanblé lokal, bann zasanblé réjional é sirkonskripsion i èd anou mié konèt la Bib é i èd anou osi pou vni bann méyèr lamontrèr lo gayar nouvèl. La ankor, toulmoun lé bienvnu é i fé pa la kèt.
Bann zékol biblik pou bann Témoin Jéova
Désèrtin Témoin Jéova lé invité pou aoir in formasion an plis, é sa gras diféran zékol biblik. Kosa i lé lo bann zékol ? Poukosa i fé bann zékol-la ? Konbien d’tan i dur ? Kisa i pé fé bann zékol-la ?
Lékol pou lo sèrvis pionié
Kosa i sèrv : Laddan i form bann sèrvitèr a plin tan, i apèl banna osi bann pioniéb, pou ké zot lé pli gabié dann prédikasion é pou amont la Bib domoun. Dan lékol-la, néna bann diskusion dan la klas, bann miz an sèn, bann diskour é bann zaktivité an group.
Konbien d’tan i dur : 6 jour.
Lé pou kisa : Bann pionié ké la pas in lané dann sèrvis lé invité pou fé lékol-la. Sak lé pionié dépi lontan, é la pa gingn fé lo lékol, dan lé 5 zané i viend pasé, zot i pé èt ankor invité pou fé lékol-la.
Lékol zévanjélizatèr lo Roiyom
Kosa i sèrv : I done in formasion èspésial bann sèrvitèr plin tan ké na lèspèryans. I èd bann zélèv pou ni pli gabié dan zot tèknik prédikasion é dan zot lamontraj, é zot i étudié désèrtin tèm la Bib plis an profondèr. Apré zot diplom, in bonpé lé invité pou alé sèrv dan bann zandroi ousa néna plis bézoin kou d’min dann prédikasion.
Konbien d’tan i dur : Dé moi.
Lé pou kisa : Bann pionié k’i ranpli désèrtin kondision i pé fé in domand pou fé lékol-la. I fo osi zot lé paré pou déplas azot ousa néna bézoin d’zot.
Lékol bann zansien bann zasanblé
Kosa i sèrv : I èd bann zansienc okip zot bann rèsponsabilité dan lasanblé, i èd azot dan zot lamontraj é pou pran soin bann frèr é sèr krétien. Lékol-la, i èd azot osi ranfors zot lamour pou Bondié é pou bann frèr é sèr (1 Pièr 5:2, 3).
Konbien d’tan i dur : Sink jour.
Lé pou kisa : Bann nouvo zansien é bann zansien ké néna lèspèryans, ké la pa fé lékol-la, dan lé 5 zané i viend pasé, lé invité pou fé lékol-la.
Lékol bann rèsponsab sirkonskripsion é zot madam
Kosa i sèrv : I form bann zitinéran, k’i apèl osi bann rèsponsab sirkonskripsiond, pou ké zot i okip kom k’i fo zot bann rèsponsabilité (1 Timoté 5:17). Lékol-la, i èd osi bann zansien-la é zot madam mié konpran la Bib.
Konbien d’tan i dur : In moi.
Lé pou kisa : Bann nouvo rèsponsab sirkonskripsion é zot madam lé invité pou fé lékol-la, kan zot la fine pas 1 lané landroi zot i sèrv. Aprésa, zot lé invité pou fé lo lékol tou lé 5 an apépré.
Lékol lo ministèr lo Roiyom
Kosa i sèrv : I èd bann zansien é bann zasistane pou ké zot i okip zot bann rèsponsabilité dan lasanblé, é pousa zot i doi pran an kont la situasion, sak i éspas é bann bézoin ké néna (2 Timoté 3:1). I atand 2 ou 3 zan pou fé lékol-la.
Konbien d’tan i dur : I dépan, souvan défoi i fé su in journé.
Lé pou kisa : Bann rèsponsab sirkonskripsion, bann zansien é bann zasistan lé invité pou lékol-la.
Lékol pou lo sèrvis dann Bétèl
Kosa i sèrv : I èd sak i travay dann Bétèlf pou ké zot i okip bien zot travay é ké zot i èm ankor plis Bondié é zot bann fèr é sèr.
Konbien d’tan i dur : Sink jour é d’mi.
Lé pou kisa : Sak i viend ariv dann Bétèl lé invité pou fé lékol-la. Sak i travay Bétèl dépi lontan, mé ké i fé 5 an zot la pa fé lékol, i pé èt ankor invité pou fé lékol-la.
Lékol biblik Galaad
Kosa i sèrv : I amont bann zélèv èm ankor plis la Parol Bondié é osi èd azot mèt an pratik sak zot i aprann (1 Tésalonisien 2:13). Bann bonom é bann madam k’i fé lékol Galaad lé bann krétien ké na lèspèryans, komsa zot i dévien ankor plis util dan lorganizasion Jéova é dan laktivité lamontraj la Bib, ké néna partou dan lo monn. Apré zot diplom, désèrtin i pé èt anvoiyé dan in Bétèl oubien kom misionèr, dan zot prop péi oubien dan in not péi.
Konbien d’tan i dur : Sink moi.
Lé pou kisa : Bann filial i invit désèrtin sèrvitèr plin tan, pou fé in domand. Lékol-la i fé sa Zéta zuni dann Patèrsone laba, dan lo sèrvis lamontraj bann Témoin Jéova.
Lékol bann komité la filial é zot madam
Kosa i sèrv : I form sak i fé parti bann komité la filialg pou ké zot i jèr lo travay ké lé fé dan zot filial é bann zaktivité bann Témoin Jéova dan lo péi oubien bann péi ké la filial i okip.
Konbien d’tan i dur : Dé moi.
Lé pou kisa : Lo buro mondial bann Témoin Jéova i invit désèrtin moun dan lo komité filial é zot madam pou fé lékol-la. Lékol-la lé fé dann Patèrsone, dan lo sèrvis lamontraj bann Témoin Jéova.
Pou zot formasion, su kosa bann Témoin Jéova i baz azot ?
Lo formasion ké bann Témoin Jéova i gingn, lé bazé dési la Bib. Nou kroi vréman ké la Bib lé inspiré par Bondié é ké laddan néna bann méyèr konsèy, é sa pou tout zafèr k’i touch nout vi (2 Timoté 3:16, 17).
Èské bann Témoin Jéova i pèy pou fé formasion-la ?
Non. Lo formasion lé gratuit. Bann zaktivité bann Témoin Jéova lé bazé dési bann zofrann volontèr (2 Korintien 9:7).
a La Bib é nout bann liv létud bazé dési la Bib, é osi nout bann vidéo, i pé trouv sa su nout sit lintèrnèt, jw.org.
b In pionié lé in Témoin batizé, k’i done légzanp, li pé èt in bonom ou in madam, é chak moi, li désid pas in sèrtin kantité d’zèr pou koz dési la Bib èk lé zot.
c Bann zansien lé bann bonom ké lé bann krétien mur, zot i amont bien mèm bann Zékritur é zot i gid lo pèp Jéova kan zot i èd é ankouraj lé zot. Banna lé pa péyé pou fé sa.
d In rèsponsab sirkonskripsion lé in sèrvitèr a plin tan. Chak somèn, li sa va dan in lasanblé diféran dan son sirkonskripsion. Li fé bann diskour bazé dési la Bib pou ankouraj bann frèr é sèr dan bann zasanblé é li sa va prèché avèk zot.
e Bann zasistan i done kou d’min pou rand sèrvis bann frèr é sèr. Sa i fé ké bann zansien néna plis lo tan pou zot lamontraj é pou pran soin lasanblé.
f Bétèl, sé komsa k’i apèl bann filial bann Témoin Jéova. Bann sèrvitèr a plin tan, k’i travay laba i soutien bann zaktivité ké lé fé par bann Témoin, k’i abit dan bann téritoir ké la filial i okip.
g Dan in komité la filial néna o moin 3 bonom ké néna bann kapasité spirituèl.