Koman bann Témoin Jéova i trèt sak i fé pu parti zot rolijion ?
Nou fé nout méyèr posib pou fé mont lamour, nou fé lo bien é nou néna rèspé anvèr chak moun. Si in Témoin Jéova i prèch pu é li arèt vni la sal, nou aport ali in soutien, nou rasur ali ké nou èm ali, nou èd ali ranfors son foi é kos koté Bondié (Luk 15:4-7).
Nadfoi, in moun i fé in zafèr, é sa i pé amèn ali juska èt ranvoiyé d’lasanblé (1 Korintien 5:13). É kom nou èm for mèm nout bann dalon dan la foi, nou fé tout pou èd ali, pou ké li lé pa ranvoiyé. É mèm si li lé ranvoiyé, nou fé mont ali nout lamour é nout rèspé, kom la Bib i ankouraj anou pou fé (Mark 12:31 ; 1 Pièr 2:17).
Pou kèl rézon in moun lé ranvoiyé d’lasanblé ?
La Bib lé klèr, li di ké si in krétien i fé in péché grav, é ké li vé pa ditou chanjé, li doi èt ranvoiyéa d’lasanblé (1 Korintien 5:11-13). La Bib i di klèrman kèl kalité péché grav i pouré amèn in moun èt ranvoiyé. Bann péché grav-la, sé kan inn la tronp son mari ou son madam, kan i boi lalkol pou èt sou, kan i tué in moun, kan néna la violans ou la maltrétans dan la kaz é kan i vol (1 Korintien 6:9, 10 ; Galat 5:19-21 ; 1 Timoté 1:9, 10).
Lé pa parsk’in moun la fé in péché grav, ké toutsuit pou toutsuit li lé ranvoiyé d’lasanblé. Bann zansienb lasanblé i ésèy dabor èd ali chanj son konportman (Romin 2:4). Zot i fé tout zot posib pou touch son kèr é done ali lanvi chanjé, é pou sa zot i aji èk dousèr, jantiyès é zot lé bon anvèr li (Galat 6:1). Zot fason aji èk lo moun ké la fé lo péché, i pé èd ali rouv son zié su son bann fot é pous ali pou ropanti (2 Timoté 2:24-26). É si malgré tout bann zéfor pou èd ali, li chanj pa ? Si li kontinié fé lo mal par rapor sak la Bib i di é li ropan pa ? Alor li doi èt ranvoiyé d’lasanblé. Bann zansien va inform lasanblé ké pèrsone-la, lé pu Témoin Jéova.
Bann zansien i fé tout zot posib pou touch lo kèr sak la fé in péché, é pou sa zot i aji èk dousèr, zot lé janti é zot lé bon anvèr li.
Kan in moun i kontinié pratik lo péché é ké li lé ranvoiyé d’lasanblé, kosa sa i aport ? Daborinn, lasanblé i rèspèk bann rokomandasion Bondié pou aoir in vi ké lé prop, é li lé protèjé kont lo mové linfluans ké so moun-la i pé aoir dési zot (1 Korintien 5:6 ; 15:33 ; 1 Pièr 1:16). An plis, sa i pé pous lo moun pou arèt fé sak lé mové, é fé tout pou chanjé (Ébré 12:11).
Koman bann Témoin Jéova i trèt sak lé ranvoiyé d’lasanblé ?
La Bib i di ké bann krétien i doi « arèt frékant » kèlkin ké lété ranvoiyé d’lasanblé, ‘é mèm, pa manj ansanm in moun komsala’ (1 Korintien 5:11). Donk, nou frékant pa in moun ké lété ranvoiyé d’lasanblé. Mé, nou fé pa komsi li té égzis pi. Nou trèt ali èk rèspé. Nou lé kontan akèy ali bann rénion é bann gran zasanblé, é bann Témoin Jéova i pé di ali bonjourc. Li pé osi domand bann zansien pou èd ali artourn dan lasanblé.
Nou lé kontan akèy sak lé ranvoiyé d’lasanblé, nout bann rénion é nout bann gran zasanblé.
Kosa i èspas kan in bonom lé ranvoiyé d’lasanblé, mé ké son madam é son bann marmay i rès Témoin Jéova ? Li poura pu ador Jéova avèk son famiy kom li té fé avan, mé son rolasion èk son famiy i rès parèy. Kom zot i viv dan lo mèm kaz, zot rolasion dan lo mariaj i chanj pa é zot i kontinié aoir in vi d’famiy normal, é zot i amont lafèksion pou inn é lot.
In moun ké lété ranvoiyé i pé domand bann zansien pou vnir oir ali. Avèk plin lamour, banna va done ali bann konsèy bazé dési la Bib, é banna va ankouraj ali èk tout zot kèr, pou ropanti ali é artourn vèr Bondié (Zakari 1:3). Si li arèt pratik lo péché é li fé mont ké li la vréman anvi mèt an pratik bann prinsip la Bib dési lo bien é lo mal, li va gingn rofé parti lasanblé. Lasanblé ‘va pardone ali èk gran kèr é konsol ali’, parèy kom bann krétien Korint la fé, kan in moun dan lasanblé lavé arèt fé lo péché (2 Korintien 2:6-8).
Pou sak lété ranvoiyé dan lo pasé, kosa banna i pans ladsi ?
Ala kosa désèrtin Témoin Jéova ké lété ranvoiyé d’lasanblé, é ké la artourn vèr Bondié plitar, i di :
« Kan moin la désid artourn dan lasanblé, mi té kroi ké bann zansien té i vé konèt tout sak moin lavé fé, pandan bann dizèn lané mi té ranvoiyé. Olèrk sa, zot la jus di amoin : “Nou vé ké ou rès bien kalé su sak ou doi fé astèr.” Sa la tèlman soulaj mon kèr » (Maria, Zéta zuni).
« Lasanblé té présé oir amoin artourné. Moin la santi amoin èmé. Mon bann frèr é sèr èspirituèl la fé tout pou fé mont amoin ké Jéova é lasanblé lavé pardone amoin, é zot la èd amoin kontinié avansé. Bann zansien, la toujour été koté moin, pou èd amoin roni kamarad ansanm Jéova. Zot la konsol amoin é la èd amoin oir ké mi té in zarlor pou Jéova, é ké li té èm amoin » (Malcom, Siéra Léone).
« Moin lé tro kontan ké Jéova i èm si tan tèlman son pèp, pou vèy ké son lorganizasion i rès pur. Lé vré, désizion-la i pé èt dur é in bonpé i konpran pa, mé lé inportan fé sa pou èd in moun ké la péché, é sé osi in fason fé mont ali ké i èm ali vréman. Moin lé rokonésan ké nout Papa dann sièl, lé in Bondié plin lamour é k’i pardone » (Sandi, Zéta zuni).
a Dan lo pasé, nou té di ké sak la fé in péché é té ropanti pa li, lété èskomunié lasanblé. Mé astèr, parské nou ansèrv in mo ké néna dan la Bib, nou di li lé ranvoiyé d’lasanblé.
b Bann zansien lé bann bonom krétien néna lèspèryans. Zot i amont sak la Bib i di é zot néna la rèsponsabilité dirij lo pèp Jéova, é pou sa, zot i èd é zot i ankouraj banna. Zot lé pa péyé pou lo travay zot i fé (1 Pièr 5:1-3).
c Défoi néna bann situasion pli grav, parské i ariv k’in moun i kit lasanblé, mé toultan li ésèy fé lo mal sak i fé parti lasanblé oubien dékouraj azot é li pous sak lé dan lasanblé pou fé bann mové zafèr. Kan i èspas bann zafèr komsa, nou suiv lo komandman la Bib, nou ‘di pa li bonjour’ (2 Jan 9-11).