Kosa mi doi fé si domoun i koz dési mon do ?

Akoz i fé mal lo kèr

Parfoi, désèrtin i koz dési lo do in moun pou fé mal ali. Par égzanp, zot i rakont zafèr mantèr su lo moun parské zot i vé kas son réputasion. Mèm si, lo ladilafé lé pa tro grav, sa i pé fé mal lo kèr, surtou kan sak lé dèrièr sa, sé in moun nou pans lété in bon kamarad ! (Psom 55:12-14).

« Ma la aprann k’in kopine lavé koz dési moin ; èl la parti di, ké mi té pa la èk lé zot. Sa la vréman fé mal amoin ! Mi té konpran pa akoz li la parti di in zafèr komsa » (Ashley).

I gingn pa chanj sa : Ké lo moun la koz dési ou, lé in bon kamarad ou pa, lé pa gayar dutou aprann ké dot i koz an mal dési out do.

Lo mové nouvèl : ou gingn pa toultan arèt sa

Néna plin d‘rézon i pous domoun koz dési inn é lot. Surtou :

Parské zot i sousi azot pou lé zot. Bann domoun lé toultan an kontak avèk inn é lot. Sé pou sa, lé normal ké zot i koz ansanm inn é lot, é zot i koz dési inn é lot. Dayèr, la Bib i ankouraj anou pou ké nou mèm, d’in fason rézonab, nou fé in kont èk lé zot (Filipien 2:4).

« Koz dési lé zot, na poin in zafèr pli gadianm ! » (Bianca).

« Mi rokoné ké mi èm konèt sak i èspas dan la vi domoun é koz dési. Mi koné pa akoz, mé sé jus in lamizman pou moin » (Katie).

Parské i trouv pa rien pou fé. Dann 1^é sièk, bann domoun té ansèrv zot tan lib rienk « pou rakont ou ékout bann nouvo zafèr » (Akt 17:21). Jordi, lé parèy !

« Défoi, pa bézoin i ariv in zafèr èspésial, domoun i invant ninport kèl zistoir rienk pou trouv in zafèr pou koz dési » (Joanna).

Parské zot na poin konfians an zot. Lé pa pou rien ké la Bib i mèt anou an gard kont labitud konpar anou ansanm inn é lot (Galat 6:4). Lé bien maléré, désèrtin i ésèy rasur azot, é pou sa zot i malparl lé zot.

« Kan inn i malparl in not moun, dabitud, sa i révèl in zafèr : an vré, sa i vé dir ké, li lé jalou lo moun li la pou kritiké. Li fane bann ladilafé pou ké li san ali mié, pou rasur ali ké li lé pliméyèr lot moun » (Phil).

I gingn pa chanj sa : K’i plé aou ou pa, domoun i koz dési lé zot, é i okip aou osi.

Lo bon nouvèl : sa i doi pa anpèch aou viv

Lé pa posib toultan défand domoun koz dési out do. Parkont, ou pé désid kèl fason ou va réaji. Si ou aprann ké néna bann ladilafé dési ou, néna o moin dé zafèr pou ou fé.

1^é RÉAKSION : Lès koulé. Souvandéfoi, sré mié ké nou fé pa in kont avèk lo ladilafé, surtou si lé pa tro grav. Suiv lo konsèy ké néna dan la Bib : « Fach pa ou pou inn ti rien ditou » (Éklézias 7:9).

« Navé in son kom koi mi té sort èk in gar, alork moin té koné pa li ni an noir ni an blan ! Lété tèlman bèt, ké lo zafèr la fé ri amoin » (Elise).

« Lo méyèr répons pou konbat in ladilafé, sé aoir in bon réputasion. Mèm si domoun i fé la lang dési ou, kan ou néna in bon réputasion, na poin bonpé va kroir. Souvandéfoi, la vérité i rosort toujour » (Allison).

In konsèy : Ékri 1) sak domoun la di dési ou é 2) sak ou la rosanti. Kan ou sra fine koz « dan [out] kèr », pétèt sra pli fasil pou lès koulé (Psom 4:4).

2^èm RÉAKSION : Alé oir lo moun la koz dési out do. Dan désèrtin situasion, ou pé rosan ké lo ladilafé lé vréman grav é k’i fo atoupri ou koz ansanm lo moun ké lé dèrièr tousa.

« Si ou sar oir sak i koz dési ou, saspé banna va rand azot kont, ké kan i koz dési in moun, i fini toujour par ariv dan son zorèy. An plis ké sa, ou va gingn tir tousa o klèr é somanké ou poura osi règ lo problèm » (Elise).

Avan alé oir sak la koz dési ou, réfléchi dési bann konsèy la Bib i done andsou-la é poz aou bann kèstion i vien apré.

• « Kan kèlkin i répond su in zafèr avan ékouté, li lé bien bèt » (Provèrb 18:13). « Èské mi lé vréman o kouran tout sak la èspasé ? Èské lo moun la raport amoin lo ladilafé, la pétèt mal konpri sak li la antand ? »

• « Chakèn i doi èt toultan paré pou ékouté, pran zot tan avan kozé é pa pran la kolèr vitman » (Jak 1:19). « Èské sé lo bon moman pou alé oir lo moun k’i koz an mal dési moin ? Èské mi lé sur, mi sar pa lès mon bann santiman domine amoin ? Oubien èské i sré pa mié ké mi atand in pé, pou ké mi kalm amoin ? »

• « Trèt toultan lé zot lo fason zot i vé ké lé zot i trèt azot » (Matié 7:12). « Si mi lété la plas lot moun, koman mi voudré k’i trèt amoin ? Kèl landroi mi voudré nou sava, pou gingn koz ladsi ? Kèl parol ou kèl fason aji, noré plis léfé dési moin ? »

In konsèy : Avan alé oir sak la koz dési out do, ékri sak ou kont di ali. Aprésa, atand inndé somèn, é rolir sak ou la ékri é oi si ou la anvi chanj in zafèr dédan. Di out papa oubien out momon, ou alor in bon kamarad sèrié sak ou voudré di lo moun, é domand konsèy.

I gingn pa chanj sa : Néna bonpé zafèr dan la vi nou na poin kontrol dési. Par égzanp, ou gingn pa toultan défand domoun koz dési ou. Mé sa, i doi pa défand aou viv out vi !