Kosa i lé lo sign k’i amont ké nou viv bann « dèrnié jour », ou « lépok la fin » ?
Sak la Bib i di
La Bib i èsplik kèl zévènman é kèl situasion va montré ké nou lé antrinn viv lo « pèryod la fin monn-la », oubien « la fin monn-la » (Matié 24:3, La Bible. Parole de Vie [PDV]). Dan la Bib, pèryod-la i apèl « bann dèrnié jour » é lo « tan [...] la fin », oubien « lépok la fin » (2 Timoté 3:1 ; Danièl 8:19, Bible annotée).
Kèl profési i trouv dan la Bib i koz su « bann dèrnié jour » ?
La Bib i amont a nou kèl zafèr va fé parti lo « sign » bann dèrnié jour (Luk 21:7). Ala détroi :
Bann gèr dann tout kalité péi. Jézu lavé di : « Nasion va drès kont nasion é roiyom kont roiyom » (Matié 24:7). Dan Révélasion 6:4 lavé di osi k’in kavalié k’i roprézant la gèr té sar « tir la pé su la tèr ».
Domoun i souf la fin. Jézu la anonsé : « nora bann famine » (Matié 24:7). Lo liv la Révélasion lavé anonsé k’in not kavalié va vni é li roprézant la famine dan in bonpé péi (Révélasion 6:5, 6).
Bann gran tranbléman d’tèr. Jézu la di nora « gran tranbléman d’tèr dan in landroi apré lot » (Matié 24:7 ; Luk 21:11). Bann gran tranbléman d’tèr-la va tué in bonpé d’moun é va amèn bonpé malèr partou su la tèr in fason nou la jamé vu.
Bann zépidémi. Dapré Jézu, noré bann zépidémi oubien bann « maladi grav » (Luk 21:11, La Bible. Parole de Vie).
Bann malfézan. Mèm si dépi lontan néna domoun i rèspèk pa la loi, Jézu lavé di, dan bann dèrnié jour, ‘bann pratik kont la loi va ogmanté’ (Matié 24:12).
Bann domoun i sakaj la tèr. Révélasion 11:18 lavé di ké domoun ‘té sar détrui la tèr’. É pousa banna sré pa rienk malonèt é violan, mé osi zot va abim la natur.
Domoun va vni pli mové. Dann 2 Timoté 3:1-4, la Bib lavé anonsé k’in bonpé d’moun sré « pa rokonésan, pa fidèl, […] nora poin lantant, va koz an mal dési lé zot, va pa kontrol azot, sra kruèl, va pa èm fé lo bien, va aji an trèt, nora la tèt dur, nora in ta lorgèy ». Bann fason domoun i fé sra si tèlman mové, ala poukosa nou pouré di lépok-la lé kom « bann pèryod difisil pou suporté ».
Na pu okin rèspé pou la famiy. Dann 2 Timoté 3:2, 3, la Bib lavé di k’in bonpé « nora poin lafèksion » dan zot famiy é ké bann marmay va « dézobéi zot papa momon ».
Domoun i fé pu in kont èk Bondié. Jézu la anonsé k’in ta domoun i èmré pu Bondié (Matié 24:12). 2 Timoté 3:4 i di osi, ké dan bann dèrnié jour, bann moun-la « sra kamarad èk lamuzman olèrk kamarad Bondié ».
Domoun i fé lipokrit dan la rolijion. Dann 2 Timoté 3:5, la Bib lavé di ké désèrtin va fé komsi zot i èm Bondié, mé an vré zot i suiv pa son bann komannman.
Bann profési la Bib i sra plu klèr. Liv Danièl lavé anonsé ké dann « tan la fin » nora in bonpé té sar mié konpran bann vérité la Bib é surtou lo bann profési i sré pli klèr pou zot (Danièl 12:4).
La prédikasion su tout la tèr. Jézu lavé di : « Lo gayar nouvèl Roiyom-la i sra préché dési tout la tèr » (Matié 24:14).
Bann domoun va kritiké é zot sra pu la èk sa. Jézu la di bann domoun i va pa fé in kont èk bann sign k’i amont ké la fin i tard pa pou arivé (Matié 24:37-39). Ankor plipir, 2 Pièr 3:3,4 la di, néna in pé va pa aksèp dutou bann prèv-la é zot va kritiké.
Tout bann profési-la va réalizé. Jézu la di nou va rokonèt bann dèrnié jour kan bann profési-la, pa rienk inndé, mé tout va ariv an mèm tan (Matié 24:33).
Èské nou lé antrinn viv dan bann« dèrnié jour » ?
Oui. Kan nou gard tout sak i èspas dési la tèr, bann dat é bann zévènman dan la Bib, nou konpran ké bann dèrnié jour la komansé an 1914. Sé lané-la mèm, lo promié gèr mondial la pété. Gard vidéo-la pou oir koman sak i èspas dési la tèr i mont ké nou viv dan bann dèrnié jour :
Lo roiyom Bondié la komans gouvèrné dann sièl an 1914. Lo 1é zafèr li la fé, sé tir Satan é son bann démon dann sièl. Lèr-la, banna té gingn fé bann zafèr rienk su la tèr (Révélasion 12:7-12). Satan i pous bann domoun pou fé désèrtin zafèr é i oi sa dan sak zot i fé é zot fason pansé ké lé mové. Tousa-la i rann bann dèrnié jour « difisil pou suporté » (2 Timoté 3:1).
Néna in bonpé domoun i souf akoz bann tan difisil-la. Zot lé trakasé parské lo monn la pou gaté. Désèrtin la pèr k’in jour na pu dutou d’moun su la tèr.
Parkont an parmi bann moun k’i souf, désèrtin i kroi ké l’avnir sra pliméyèr parské zot i mèt zot konfians dann roiyom Bondié. Zot lé sur roiyom-la va anlèv tout bann problèm néna jordi (Danièl 2:44 ; Révélasion 21:3, 4). Zot i atann èk pasians ké Bondié i réaliz son bann promès. Jézu la di : « Sak va tienbo juska la fin i sra sové », bann ti parol-la i réchof zot kèr (Matié 24:13 ; Miché 7:7).