Èske Mari sé le momon Bondieu ?

Sak la Bib i di

Non, la Bib i di pa ke Mari sé le momon Bondieu. La Bib i lès pa antann non plu ke bann krétien i doi ador Mari oubien akord ali in loneur spésiala. Ala poukosa nou di sa :

Mari la jamé prétann ke li lété le momon Bondieu. La Bib i ésplik ke Mari la donn nésans le « Garson le Tré O », oubien le « Garson Bondieu », mé li la pa donn nésans Bondieu (Luk 1:32, 35).
Jézu Kris la jamé di ke Mari lété le momon Bondieu oubien ke domoun té doi of aèl in ladorasion spésial. In jour, in madam la donn tro loneur Mari parske li lé le momon Jézu. Alor, Jézu la korij sak le madam la di par se parol la : « Non, pluto ereu sèk i ékout la parol Bondieu é i obéi ! » (Luk 11:27, 28).
Dan la Bib, na poin okin landroi lé ékri « Momon Bondieu » é « Téotokos » (ki donn nésans Bondieu).
Kan dan la Bib i koz su la « Rèn le sièl », lé pa dutou pou Mari, mé lé pou in fo Bondieu, ke bann Zisraélit, ke la rejèt Jéova, té ador (Jérémi 44:15-19). Petèt la « Rèn le sièl » lété le Bondieu babilonn Ichtar (Astarté).
Bann premié krétien té ador pa Mari é té of pa li in loneur spésial. Dapré in spésialis listoir, bann premié krétien « té rejèt ladorasion bann zidol é lé posib ke zot lavé peur ke si zot té donn tro loneur Mari, sa noré lès antann ke zot té ador in fo bondieu » (In Quest of the Jewish Mary).
La Bib i di ke Bondieu la toujour égzisté (Psom 90:1, 2 ; Izai 40:28). Kom Bondieu na poin d’komansman, alor li na poin d’momon non plu. An plus ke sa, Mari té pe pa port Bondieu dan son vant, parske la Bib i fé bien konprann ke mèm le sièl na poin asé la plas pou konténir ali (1 Roi 8:27).

Mari lé le momon Jézu é lé pa le « Momon Bondieu »

Mari lété Juif é èl lété in désandan dirèk le roi David (Luk 3:23-31). Bondieu lavé akord aèl in gran faveur parske èl lavé la foi é in ladorasion fidèl pou li (Luk 1:28). Bondieu la choizi aèl pou devnir le momon Jézu (Luk 1:31, 35). Èl la gingn dot marmay avèk son mari, Jozèf (Mark 6:3).

La Bib i mont ke Mari lé devnu disip Jézu, mé i di pa plus ke sa su èl (Akt 1:14).

Akoz désèrtin i kroi ke Mari lé le momon Bondieu ?

Sé vèr la fin 4^èm sièk dan nout tan, ke domoun la komans ador Mari. Sé dann lépok la, ke Légliz katolik lé devnu le relijion rekonu par le Gouvèrnman romin é partou su son gran téritoir. Lé pousa, in bonpe anparmi sak lavé bann kroiyans payin, lé devnu bann soi dizan krétien. Légliz la aksèp osi lansègnman la Trinité, in nafèr ki sort pa dan la Bib.

La kroiyans la Trinité la amèn bann prèt légliz pou kroir ke si Jézu lété Bondieu, alor Mari té devé èt momon Bondieu. Dan lané 431 dan nout tan, bann chèf Légliz la vil Éfèz la réuni azot, é la fé konèt tout domoun ke Mari lé le « Momon Bondieu ». Sé aprésa, ke domoun la kontinué donn Mari plus loneur ankor. Tipe tipe, bann domoun ke lavé bann kroiyans payin lé devnu katolik. Avèk le tan, domoun la komans ansèrv bann zimaj é bann léstatu la Vièrj Mari pou ranplas bann bondieu fékondité, kom Artémis (ou Diane pou bann Romin) é Izis.

Dan lané 432 dan nout tan, le pap Sixte 3 la donn lord pou konstrui in légliz dan la vil Rom, pou donn loneur le « Momon Bondieu ». Le Légliz la été konstrui a koté in tanp, ke té égzis depui lontan, é ke la été fé pou onor Lusinn, le bondieu romin ke té invoké pou bann nésans. In lékrivin la di ke légliz la, «té reprézant klèrman le mayaj ant le Gran Momon, ke bann payin té ador, avèk ladorasion Mari, apré ke le relijion krétien la étann partou a Rom» (Mary — The Complete Resource).

a In bonpe relijion i ansègn ke Mari lé le momon Bondieu. Nadfoi, banna i apèl ali la « Rèn le sièl » ou Téotokos, sa lé in mo grèk ki ve dir « ki donn nésans Bondieu ».