Jézu i sov : koman li fé sa ?
Sak la Bib i di
Jézu la sov bann domoun fidèl kan li la done son vi an ranson (Matié 20:28). Sé pousa la Bib i di, li la vni « pou sov lo monn » (1 Jan 4:14). Èl i di osi : « Nou pé pa èt sové par pèrsone dot, parské na poin sou lo sièl okin not non ké la été doné an parmi bann domoun par k’i nou doi èt sové » (Akt 4:12).
Jézu la ‘gout la mor’ pou tout sak i mèt zot foi an li (Ébré 2:9 ; Jan 3:16). Aprésa, « Bondié la résusit ali », é Jézu la rotourn dann sièl kom in lanj (Akt 3:15).La ousa li lé astèr, Jézu i gingn « sov totalman sak i vien dovan Bondié par son moiyen, parské li lé toujour vivan pou aji an zot favèr » (Ébré 7:25).
Akoz nou la bézoin Jézu i aji an nout favèr ?
Nou tout nou néna d’péché (Romin 3:23). Lo péché i mont in mur ant Bondié é nou, é li kondane anou a mor (Romin 6:23). Mé sé komsi Jézu té in « lavoka » pou tout sak néna la foi dan son sakrifis k’i sov (1 Jan 2:1, Bible en français courant). Li pran zintéré banna, li domand Bondié ékout zot priyèr é pardone zot péché parské li la done son vi pou sa (Matié 1:21 ; Romin 8:34). Bondié i aksèp fé sak Jézu i domand ali parské sé osi sak li vé. Li la anvoy Jézu su la tèr « pou ké lo monn lé sové gras ali » (Jan 3:17).
Kroir Jézu : èské sa i sufi pou èt sové ?
Non. Lé vré, i fo kroir Jézu pou èt sové, mé sa i sufi pa (Akt 16:30, 31). La Bib i di : « Kom lo kor san lèspri lé mor, lé parèy osi la foi san bann zaksion lé mor » (Jak 2:26). Pou èt sové, nou doi :
Aprann konèt Jézu é son Papa, Jéova (Jan 17:3).
Mèt nout foi an zot (Jan 12:44 ; 14:1).
Fé mont nout foi par nout lobéisans zot bann loi (Luk 6:46 ; 1 Jan 2:17). Jézu la di komsa lé pa tout sak i apèl ali « Ségnèr » k’i sré sové, mé rienk sak i ‘fé la volonté son Papa dann sièl’ (Matié 7:21).
Kontinié fé mont nout foi mèm kan nou pas dann malizé. Jézu la bien fé konpran sa, kan li la di : « Sak va tienbo juska la fin i sra sové » (Matié 24:13).