Èské bann zanimo i sava dann sièl ?
Sak la Bib i di
La Bib i amont ké an parmi bann domoun é bann zanimo k’i viv su la tèr, sé rienk inn ti kantité domoun ké va alé viv dann sièl (Révélasion 14:1, 3). Banna va alé dann sièl pou èt roi é prèt koté Jézu (Luk 22:28-30 ; Révélasion 5:9, 10). In bon paké domoun va èt résusité pou viv dann paradi su la tèr (Psom 37:11, 29).
Dan okin landroi dan la Bib lé ékri ké néna in paradi dann sièl pou bann chien ou pou bann zanimo domèstik. An vré bann zanimo la pa été « choizi pou viv dann sièl » (Ébré 3:1). Pou alé viv dann sièl néna bann kondision, i fo aoir la foi, aprann konèt Bondié é obéi son bann komandman (Matié 19:17 ; Jan 3:16 ; 17:3). Sé rienk domoun ké lété kréé pou viv pou toultan (Jénèz 2:16, 17 ; 3:22, 23).
Pou alé viv dann sièl, i fo èt résusité (1 Korintien 15:42). La Bib i koz su in bonpé rézurèksion (1 Roi 17:17-24 ; 2 Roi 4:32-37 ; 13:20, 21 ; Luk 7:11-15 ; 8:41, 42, 49-56 ; Jan 11:38-44 ; Akt 9:36-42 ; 20:7-12). Chak rézurèksion dan la Bib, i konsèrn bann domoun é pa bann zanimo.
Èské bann zanimo néna in lam vivan ?
Non. La Bib i di ké bann zanimo é bann domoun lé bann zam (Nonm 31:28). Kan la kré lo promié bonom Adan, la pa mèt in lam vivan dan son kor, li lé « vnu in moun vivan » (Jénèz 2:7). Lam lé fé èk dé zafèr-la : « la pousièr k’i sort atèr » é « lo souf la vi ».
Èské lam i pé mor ?
Oui. La Bib i di ké lam i mor (Lévitik 21:11, lo ti not ; Ézékièl 18:20). Kan bann zanimo é bann domoun i mor, zot i rotourn an pousièr (Éklézias 3:19, 20). Sa i vé dir, zot i égzis pu.
Èské bann zanimo i fé bann péché ?
Non. Lo péché sé kan ou fé in zafèr, oubien kan ou néna bann santiman, ou bann pansé k’i sava kont la loi Bondié. Komèt in pèché, i vé dir èt kapab pran in désizion su sak lé bien ou mal. É bann zanimo lé pa kapab fé sa. Juska la fin zot vi, zot néna labitud suiv zot linstin (2 Pièr 2:12). Zot i mor, mèm si zot i pèch pa.
Èské lé bien kan domoun i maltrèt bann zanimo ?
Non. Bondié la done bann domoun lotorité su bann zanimo mé zot na poin lo droi maltrèt banna (Jénèz 1:28 ; Psom 8:6-8). Bondié i sousi ali pou ké chak zanimo lé bienéré, mèm lo pli pti zoizo (Jonas 4:11 ; Matié 10:29). Li la done lord son bann sèrvitèr, pou ké banna i trèt bien bann zanimo (Égzod 23:12 ; Détéronom 25:4 ; Provèrb 12:10).