Èské larjan sé lo diab ?

Sak la Bib i di

Non. La Bib i di pa ké larjan sé lo diab. Èl i di pa non pli ké tout bann mové zafèr i ariv sé akoz larjan .Nadfoi domoun i di « larjan sé lo diab » oubien « larjan i pouri tout zafèr ». An fransé i di « l’argent est la racine de tous les mauxa » mé sa lé pa vré parské kan ou rogard vèrsé la an antié, la Bib i di ké « lamour larjan sé la rasine tout bann mové zafèr » (1 Timoté 6:10).

Kosa la Bib i di su larjan ?

La Bib i rokoné ké si nou utiliz larjan kom k’i fo li pé èt util, é mèm ké li pé èt in « protèksion » (Éklézias 7:12). An plis ké sa, la Bib i koz an bien su sak néna gran kèr, par égzanp kan zot i done in ti moné (Provèrb 11:25).

Mé èl i di anou osi, tansion nou mèt larjan an promié dan nout vi. Èl i di : « Ké zot fason d’viv lé pa gidé par lamour larjan ; kontant azot sak zot néna » (Ébré 13:5). Donk, èl i ankouraj anou lès larjan son plas é kour pa dèrièr. I vo mié kontant anou sak nou la bézoin vréman : manjé, linj é in toi su nout tèt (1 Timoté 6:8).

Akoz la Bib i di anou fé atansion lamour pou larjan ?

Sak lé krévèr larjan va pa gingn la vi pou toultan (Éfézien 5:5). É lé vré, kan out zié lé pli gro k’out vant, sé komsi ou ador bann fo bondié (Kolosien 3:5). An plis ké sa, pou gingn sak li vé, in moun krévèr i bord su koté son bann valèr. Dann Provèrb 28:20 i di « Sak i vé gingn larjan vitman, i va pa rès inosan lontan ». Désèrtin i sré kapab alé juska fé bann zafèr la loi i puni, kom chantaj, vol larjan, zanlèvman ou tué domoun.

Mèm si ou sa pa juska la, lamour larjan i pé antrèn dot mové zafèr. La Bib i di « sak lé bien désidé pou ni rich i tonb dann tantasion, dan in gob, é dan in ta dézir k’lé bèt é danjéré, k’i fé ké bann zom la tonb dirèk dan la dèstruksion é dann malèr » (1 Timoté 6:9).

Kosa va aport anou suiv bann konsèy la Bib su larjan ?

In moun k’i mèt pa son bann valèr su koté pou gingn plis larjan, néna plis lèstim pou li mèm, é Bondié i béni ali é i soutien ali. Pou sak i fé vréman bonpé zéfor pou fé plézir ali, Bondié i promèt : « Jamé mi va kit aou é jamé mi va lès aou tonbé » (Ébré 13:5, 6). Li asir anou osi : « In moun fidèl nora in takon bénédiksion » (Provèrb 28:20).

Bann vèrsé la Bib su larjan

Éklézias 7:12 : « Larjan lé in protèksion. »

Sak i vé dir : Kan ou utiliz ali bien, larjan lé util parsk’i mèt aou in pé a labri.

Luk 12:15 : « Mèm kan in moun néna in bonpé d’zafèr, sak li néna i done pa li la vi. »

Sak i vé dir : Larjan i sov pa d’moun é sé pa li lo plis inportan dan la vi.

1 Timoté 6:10 : « Lamour larjan sé la rasine tout bann mové zafèr, é, parské détroi la fé tout pou so lamour la, zot la pèrd chemin la foi é zot la gingn bonpé doulèr. »

Sak i vé dir : Larjan li mèm li lé pa mové li. Mé sak i èm larjan é k’i mèt sa an promié dan zot vi, riskab zot va konèt malizé, parèy kom détrui zot famiy é tonb malad aforstan travay.

Ébré 13:5 : « Ké zot fason d’viv lé pa gidé par lamour larjan ; kontant azot sak zot néna. »

Sak i vé dir : Olèrk sakrifié tout zafèr pou kour dèrièr larjan, vo mié kontant aou sak ou la vréman bézoin.

Matié 19:24 : « Lé pli fasil pou in chamo pas par l’trou in zégui ké pou in rich rant dann roiyom Bondié. »

Sak i vé dir : Jézu té viend invit in marmay rich pou suiv ali. Marmay la té èm si tèlman son larjan, li la rofiz son linvitasion. Tèrla Jézu té done in lavèrtisman : in moun k’i mèt larjan avan Bondié riskab li va pèrd la vi pou toultan.

a I pé lir vérsé la komsa osi : « Lamour pou larjan sé la rasine tout bann mové zafèr. »