Kosa Bondieu i ve pou bann zumin ?

Viv ereu pou toultan ! (Diskusion biblik vivan)
- LESON 25
  
  Kosa Bondieu i ve pou bann zumin ?
  Kom la Bib i di, ‘bann zumin i viv pa lontan é na plin problèm’ (Job 14:1). Èske sé vréman sak Bondieu i ve pou nou ? Kosa i lé son projé pou nou ? Èske li va réaliz sa in jour ? Alon voir bann répons ankourajan ke néna dan la Bib.
  
  1. Koman Jéova i ve nou viv ?
  
  Jéova i ve ke nou néna le méyeur vi. Kan li la kré bann premié zumin, Adan èk Èv, li la mèt banna dann in joli paradi, le jardin Lédèn. Li la béni azot é li la di azot : « Fé zanfan é multipli azot ; ranpli la tèr é kultiv ali » (Jenèz 1:28). Jéova té ve ke zot lavé zanfan, ke zot i travay tout la tèr pou ke li devien in paradi, é ke zot i okup bann zanimo. Dan son projé, tout bann zumin té doi avoir in santé parfé é viv pou toultan.
  
  Nou viv pa komsa zordia, mé le projé Bondieu la pa chanjé (Izai 46:10, 11). Jéova i ve toujour ke bann zumin obéisan i viv pou toultan é i viv bien (lir Révélasion 21:3, 4).
  
  2. Koman nou pe avoir in vi ereu depui koméla mèm ?
  
  Jéova la kré anou avèk bann bezoin spirituèl. Sa i ve dir ke nou la bezoin konèt ali é ador ali (lir Matieu 5:3-6). Jéova i ve ke nou lé son bann proch kamarad, ke nou « suiv tout son bann chemin », ke nou ièm ali é ke nou sèrv ali ‘èk tout nout keur’ (Detéronom 10:12 ; Psom 25:14). Tousala i rann anou vréman ereu, mèm si nou néna problèm. Ador Jéova i donn in vré sans nout vi, parske sé viv kom Bondieu té ve ke nou viv.
  ALON APRANN PLUS
  
  Alon voir koman avèk in bonpe lamour, Jéova la prépar la tèr pou nou, é poukosa nou lé la, dapré son Parol.
  
  3. Jéova i ve ke bann zumin i viv ereu
  
  Gard le VIDÉO é koz su le késtion ki vien apré.
  
  VIDÉO : Poukosa Bondieu la kréé la tèr ? (inn ti morso) (1:41)
  
  Poukosa Bondieu la fé nout planèt joli komsa ?
  
  Lir Éklézias 3:11 é koz su késtion la :
  
  Kosa vèrsé la i aprann aou su Jéova ?
  
  4. Le projé Jéova la pa chanjé
  
  Lir Psom 37:11, 29 é Izai 55:11 é koz su késtion la :
  
  Koman nou koné ke le projé Jéova pou nou la pa chanjé ?
  
  In kaz ke lé dan in mové léta i pe èt réparé. Lé parèy, mèm si bann zumin an jénéral la pa pran soin la tèr, Bondieu va répar la tèr é li va donn la tèr bann domoun ki ièm ali.
  
  5. Ador Jéova i donn in vré sans nout vi
  
  Konèt poukosa nou lé la, i pe èd anou pou èt ereu. Gard le VIDÉO é koz su le késtion ki vien apré.
  
  VIDÉO : Ma la konpri poukosa nou viv (5:03)
  
  Kan Terumi la konpri poukosa nou viv, kosa la chanjé pou li ?
  
  Lir Éklézias 12:13 é koz su késtion la :
  
  Kan nou réfléchi su tout sak Jéova la fé pou nou, kosa nou la anvi d’fé pou li ?
  
  DOMOUN I POURÉ DEMANN AOU : « Poukosa nou lé su la tèr ? »
  
  Kosa ou noré réponn ?
  SAK NOU LA APRANN
  
  Jéova i ve ke nou viv pou toultan desu la tèr, é li ve ke nou viv bien. Ador Bondieu èk tout nout keur i rann anou vréman ereu, mèm depui koméla.
  
  Alon révizé
  
  Kosa Jéova té ve pou Adan èk Èv ?
  
  Koman nou koné ke le projé Bondieu pou bann zumin la pa chanjé ?
  
  Koman ou pe donn in vré sans out vi ?
  
  Ma la fini le leson le :
  
  Sak mi doi fé
  Koz èk in moun su le gayar projé ke Jéova néna pou nou.
  
  Sak mi ve fé an plus :
  Ékri ali tèrla
  
  GARD SA OSI
  
  Èske le jardin Lédèn la vréman égzisté ?
  
  « Le jardin d’Éden—Un mythe ? » (La Tour de Garde, 1^er janvier 2011)
  
  Poukosa nou pe èt sur ke la tèr i sra jamé détrui ?
  
  « Èske la tèr i sra détrui ? » (lartik jw.org)
  
  Dapré la Bib, poukosa nou lé su la tèr ?
  
  « Poukosa nou viv ? » (lartik jw.org)
  
  Le zistoir in mesieu ke la konpri, ke té mank ali in nafèr dan son vi.
  
  Asteur, mi néna in vi ke na in sans (3:55)
  a Le leson ki vien apré i ésplik poukosa bann zafèr, la pa éspas kom prévu.

Kosa i lé le roiyom Bondieu ?

Viv ereu pou toultan ! (Diskusion biblik vivan)
- 2. Kisa i gouvèrn avèk Jézu ?
  
  Jézu lé pa touseul pou gouvèrn le Roiyom. La Bib i di ke « domoun tout tribu, é lang, é peup, é nasion […] i doi èt roi é gouvèrn la tèr » (Révélasion 5:9, 10). Konbien zot i lé ? Depui ke Jézu la vni su la tèr, domoun par milion la vni son bann disip. Mé lé pa tout, i sar gouvèrn èk li dann sièl. Rienk 144 000 va gouvèrn èk Jézu dann sièl (lir Révélasion 14:1-4). Lé zot krétien va viv su la tèr, sou la diréksion le Roiyom (Psom 37:29).

Sak le Roiyom va fé

Viv ereu pou toultan ! (Diskusion biblik vivan)

Sak le Roiyom va fé

Le roiyom Bondieu lé déja an plas. I tard pa, li va chanj in bonpe zafèr su la tèr. Alon voir sak li sar fé.

1. Koman le roiyom Bondieu va remèt an plas la pé é la justis su la tèr ?

Jézu, le Roi le roiyom Bondieu, va suprim bann domoun é bann gouvèrnman mové, pandan la gèr Armagédon (Révélasion 16:14, 16). Kan sa va arivé, se promès la Bib va bien réalizé : « Ankor in pe d’tan, é bann moun ke lé mové va disparèt » (Psom 37:10). Gras le Roiyom, Jézu va ranpli la tèr èk la pé é la justis (lir Izai 11:4).

2. Koman i sra la vi kan la volonté Bondieu i sra fé su la tèr ?

Kan le roiyom Bondieu va gouvèrné, « sak i obéi Bondieu nora la tèr pou zot, é zot va viv desu pou toultan » (Psom 37:29). Zot i majinn ! Tout domoun i sra jus é droit ; tout domoun va èm Jéova é son prochin. Nora pu pèrsonn va tonm malad, é nou va viv pou toultan.

3. Kosa le roiyom Bondieu va réalizé apré la déstruksion bann méchan ?

Apré la déstruksion bann méchan, Jézu va gouvèrn ankor pandan 1 000 an. Pandan pèryod la, avèk lé 144 000 ke va dirij èk li, li va èd bann zumin ni parfé. Kan lé 1 000 an i sra fini, la tèr va vni in joli ti paradi, avèk bann zumin ke lé ereu, parske zot i obéi bann loi Jéova. Jézu va remèt le Roiyom son Papa. Le ‘non Jéova i sra rekonu kom sin’, in fason kom la jamé fé avan (Matieu 6:9, 10). Nou nora la preuv ke Jéova lé in bon dirijan, ki pran soin son bann sitoiyin. Aprésa, Jéova va suprim Satan, bann démon é tout sak i fé le choi rebèl azot kont son dominasion (Révélasion 20:7-10). La vi parfé ke nora gras le roiyom Bondieu va dur pou toultan.

ALON APRANN PLUS

Alon voir poukosa nou pe kroir ke Bondieu va utiliz son Roiyom, pou réaliz sak la Bib i promèt pou lavnir.

4. Le roiyom Bondieu va détrui bann gouvèrnman umin

« Lom i dominn lom pou son maleur » (Éklézias 8:9). Gras son Roiyom, Jéova va règ tout bann problèm, ke néna akoz se situasion ke lé pa jus.

Lir Danièl 2:44 é 2 Tésalonisien 1:6-8 é koz su bann késtion la :

Kosa Jéova é Jézu va fé èk tout bann gouvèrnman umin é tout sak i soutien bann gouvèrnman la ?
Dapré sak ou la aprann su Jéova é Jézu, poukosa ou lé sur ke sak banna i fé lé jus ?

Jézu lé Roi dann sièl ; li gouvèrn la tèr ke la fini èt in paradi.

5. Jézu lé le méyeur Roi

Jézu va fé in bonpe d’bien bann sitoiyin le roiyom Bondieu. Gard le VIDÉO pou voir ke Jézu la finn montré ke li la anvi èd domoun, mé osi ke gras Bondieu, li na le pouvoir fé sa.

VIDÉO : Jézu la montré kosa le Roiyom va fé (1:13)

Kan li lété su la tèr, Jézu la donn inn ti lidé su sak le Roiyom va fé. Dan la lis an d’sou la, kèl promès ou ièmré surtou voir réalizé ? Lir bann vèrsé ke néna apré chak promès.

SU LA TÈR, JÉZU…	DANN SIÈL, JÉZU…
la kontrol bann fors la natur (Mark 4:36-41).	va règ tout bann problèm la natur (Izai 35:1, 2).
la donn manjé in gran kantité d’moun (Matieu 14:17-21).	va anlèv la fin dan le monn (Psom 72:16).
la géri in bonpe d’moun malad (Luk 18:35-43).	va donn tout domoun in santé parfé (Izai 33:24).
la résusit bann mor (Luk 8:49-55).	va répar tout bann déga ke néna akoz la mor (Révélasion 21:3, 4).

6. In gayar lavnir gras le roiyom Bondieu

Le Roiyom va réaliz sak Jéova té ve fé depui le débu pou bann zumin. Zot va viv pou toultan dann in paradi. Gard le VIDÉO pou voir koman Jéova i utiliz son Garson, Jézu, pou réaliz son projé.