Li la rant dann Jéruzalèm kom in roi asiz su in bourik

Èské bann profési k’i koz su lo Mési i fé mont ké sété bien Jézu lo Mési ?

Kosa la Bib i di ladsi

Oui. Kan Jézu té su la tèr, in bonpé profési su « Mési lo Gid », sak i sré anvoyé « pou sov lo monn », la réaliz su li (Danièl 9:25 ; 1 Jan 4:14). Néna mèm détroi ké la réalizé kan li té fine mor (Psom 110:1 ; Akt 2:34-36).

Kosa lo mo « Mési »i vé dir ?

Lo mo ébrè Mashiaḥ (Mési) é lo mèm mo an grèk Khristos (Kris) lé dé i vé dir « choizi par Bondié ». Sé pousa, « Jézu Kris » i vé dir « Jézu choizi par Bondié » ou bien « Jézu lo Mési ».

Dan lépok la Bib, kan in moun té choizi par Bondié, té i vèrs in pé luil su son tèt pou fé mont ké li lavé gingn in pouvoir èspésial (Lévitik 8:12 ; 1 Samuèl 16:13). Bondié la done Jézu in gran pouvoir kan la choizi ali kom Mési (Akt 2:36). Sèlman, Bondié la pa vèrs doluil su son tèt mé la béni ali avèk lèspri sin (Matié 3:16).

Èsk’i sré posib ké détroi moun i réaliz bann profési su lo Mési ?

Non. Parèy kom in mark lo doi i apartien rienk in sèl moun, bann profési la Bib i réaliz su in sèl Mési, ou Kris . Mé la Bib i prévien anou « nora bann fo Kris ék bann fo profèt ké va fé bann gran mirak é bann zafèr vréman inkroiyab pou ké, si posib, mèm sak Bondié la choizi i pèrd chemin » (Matié 24:24).

Èské sé pou plitar ké nou doi atand lo Mési ?

Non. La Bib la anonsé ké lo Mési sré inn ti zanfan David, lo roi Israèl (Psom 89:3, 4). Parkont, tout bann zansèt juif k’i romont juska David, i trouv pu jordi. Lé posib sa té détrui kan bann Romin la atak Jéruzalèm, an 70 dé nout tana. Dépi sa, pèrsone i gingn pu done la prèv ké zot i sort koté famiy lo roi David. Parkont, dann tan Jézu, bann papié la té égzis ankor. Sé pou sa, mèm son bann zènmi, té gingn pa di li té sort pa koté famiy David (Matié 22:41-46).

Konbien profési su lo Mési néna dan la Bib ?

Lé pa posib di konbien profési su lo Mési néna dan la Bib. Parské domoun i kont pa toultan lo mèm fason so bann profési la. Par égzanp, dann Izai 53:2-7 i trouv bonpé détay su lo Mési. Pou désèrtin bann vèrsé la i kont kom in sèl profési, pou dot chak détay sé in profési.

Détroi profési su lo Mési ké la réaliz su Jézu

Bann profési	Ousa i trouv sa dan la Bib	Koman é kansa la réalizé
Ti zanfan Abraam	Jénèz 22:17, 18	Matié 1:1
Ti zanfan Izaak, garson Abraam	Jénèz 17:19	Matié 1:2
Li sort dann tribu Juda	Jénèz 49:10	Matié 1:1, 3
Li sort koté famiy lo roi David	Izai 9:7	Matié 1:1
Son momon té vièrj	Izai 7:14	Matié 1:18, 22, 23
Li lé né Bètléèm	Miché 5:2	Matié 2:1, 5, 6
La apèl ali Émanuèlb	Izai 7:14	Matié 1:21-23
Li lé né dan in famiy pov	Izai 53:2	Luk 2:7
Kan li té fine nèt, la tué bann ti marmay	Jérémi 31:15	Matié 2:16-18
La kri ali pou sort dan pèi Léjip	Ozé 11:1	Matié 2:13-15
La apèl ali « Nazaréin »c	Izai 11:1	Matié 2:23
In lanvoyé lé vnu avan li	Malaki 3:1	Matié 11:7-10
Choizi par Bondié pou èt lo Mési lané 29 dé nout tand	Danièl 9:25	Matié 3:13-17
Bondié la rokonèt ali kom son Garson	Psom 2:7	Akt 13:33, 34
Li done ali afon pou la kaz Bondié	Psom 69:9	Jan 2:13-17
Li prèch bann gayar nouvèl	Izai 61:1	Luk 4:16-21
Son prédikasion la amèn in gran lumièr dann Galilé	Izai 9:1, 2	Matié 4:13-16
Li fé bann mirak parèy kom Moiz	Détéronom 18:15	Akt 2:22
Parèy kom Moiz, li fé konèt sak Bondié i pans	Détéronom 18:18, 19	Jan 12:49
Li géri bonpé domoun	Izai 53:4	Matié 8:16, 17
Li fé pa romark ali	Izai 42:2	Matié 12:17, 19
Li fé mont son pitié pou sak lé dann malizé	Izai 42:3	Matié 12:9-20 ; Mark 6:34
Li fé konèt la justis Bondié	Izai 42:1, 4	Matié 12:17-20
In konsèyèr romarkab	Izai 9:6, 7	Jan 6:68
Li fé konèt lo non Jéova	Psom 22:22	Jan 17:6
Li ansèrv bann zégzanp pou amontré	Psom 78:2	Matié 13:34, 35
In Gid	Danièl 9:25	Matié 23:10
Bonpé domoun na poin la foi an li	Izai 53:1	Jan 12:37, 38
In gro galé k’ i fé tonb domoun	Izai 8:14, 15	Matié 21:42-44
Bonpé domoun la rojèt ali	Psom 118:22, 23	Akt 4:10, 11
Domoun navé la èn pou li, san okin rézon	Psom 69:4	Jan 15:24, 25
Li la rant dann Jéruzalèm kom in roi asiz su in bourik	Zakari 9:9	Matié 21:4-9
Bann marmay la mèt ali anlèr	Psom 8:2	Matié 21:15, 16
Li vien o non Jéova	Psom 118:26	Jan 12:12, 13
In bon dalon la aji an trèt èk li	Psom 41:9	Jan 13:18
La vand ali pou 30 piès larjane	Zakari 11:12, 13	Matié 26:14-16; 27:3-10
Son bann dalon la lès ali tonbé	Zakari 13:7	Matié 26:31, 56
Bann fo témoin la akuz ali	Psom 35:11	Matié 26:59-61
Dovan sak té akuz ali, li la pa rouv son bouch	Izai 53:7	Matié 27:12-14
La krach su li	Izai 50:6	Matié 26:67 ; 27:27, 30
La tap ali dan son figur	Miché 5:1	Mark 15:19
La fouèt ali	Izai 50:6	Jan 19:1
Li lès banna tap ali	Izai 50:6	Jan 18:22, 23
Bann chèf la politik la mont in bob kont li	Psom 2:2	Luk 23:10-12
La klout son min èk son pié su in poto	Psom 22:16	Matié 27:35 ; Jan 20:25
La fé tiraj o sor pou oir kisa i gingn son linj	Psom 22:18	Jan 19:23, 24
La konsidèr ali kom in moun lavé péché	Izai 53:12	Matié 27:38
La rabès ali é la jur ali	Psom 22:7, 8	Matié 27:39-43
Li souf pou bann domoun péchèr	Izai 53:5, 6	1 Pièr 2:23-25
Ondiré Bondié la lès ali tonbé	Psom 22:1	Mark 15:34
La done ali vinèg èk lo fièl pou boir	Psom 69:21	Matié 27:34
Jus avan li mor li néna in bonpé soif	Psom 22:15	Jan 19:28, 29
Li romèt Bondié son lèspri	Psom 31:5	Luk 23:46
Li done son vi	Izai 53:12	Mark 15:37
Li pèy la ranson pou k’ lo péché i égzis pu	Izai 53:12	Matié 20:28
La pa briz in sèl son bann zo	Psom 34:20	Jan 19:31-33, 36
La pik ali	Zakari 12:10	Jan 19:33-35, 37
La antèr ali an parmi domoun rich	Izai 53:9	Matié 27:57-60
La rodone ali la vi	Psom 16:10	Akt 2:29-31
La ranplas lo moun la vand ali	Psom 109:8	Akt 1:15-20
Li lé asiz koté droit Bondié	Psom 110:1	Akt 2:34-36

a In liv i di komsa : « Lé sur, tout bann zarchiv su bann tribu é bann famiy juif la disparèt, pa avan, mé pandan la dèstruksion Jérusalèm » (Cyclopedia McClintock é Strong).

b Lo non ébré Émanuèl, k’i vé dir « Bondié lé èk nou », i amont bien sé koué lo rol Jézu an tank Mési. Son prézans su la tèr é sak li la fé, sé la prèv Bondié lé avèk sak i ador ali (Luk 2:27-32 ; 7:12-16).

c Lèsprésion « Nazaréin » i sortiré èk lo mo nétsèr, in mo ébré k’i vé dir « bourjon ».

d Pou konèt koman la kalkul lané 29 dé nout tan sé lané lo Mési la arivé, agard lo lartik « La prophétie de Daniel prédit l’arrivée du Messie ».

e I trouv profési la dann liv Zakari. Pourtan, dan son lévanjil, Matié i di k’sé lo profèt Jérémi ké la ékri sa (Matié 27:9). Nadfoi liv Jérémi té plasé an promié dann in parti la Bib ké té apèl « bann Profèt »(Luk 24:44). Tanzantan, Matié té ansèrv lo non Jérémi pou koz su bann liv k’i trouv dann parti la, é an parmi banna navé osi Zakari.