I tard pa, gras son Roiyom, Jéova va règ tout nout bann problèm. Se nouvèl la lé tèlman gayar, ke nou pe pa gard sa pou nou ! Jézu la demann son bann disip fé konèt se mésaj la tout domoun (Matieu 28:19, 20). Koman bann Témoin Jéova i obéi komannman la ?

1. Koman Matieu 24:14 i réaliz zordi ?

Jézu la anonsé : « Bonn nouvèl se Roiyom la i sra préché su tout la tèr » (Matieu 24:14). Bann Témoin Jéova lé kontan fé se laktivité inportan. Nou prèch se gayar nouvèl su tout la tèr an plus 1 000 lang ! Se gran laktivité i demann in bonpe zéfor é in bon lorganizasion. Lé pa posib fé sa san lèd Jéova.

2. Kèl zéfor nou fé pou préché ?

Nou prèch partou ousa na domoun. Kom bann krétien 1^é sièk, nou prèch « de kaz an kaz » (Akt 5:42). Nou na labitud prèch komsa. Sa i pèrmèt anou rankont domoun par milion, tou lé zan. Kom domoun lé pa toultan zot kaz, nou prèch osi dan bann zandroi ousa néna domoun. Nou profit tout bann zokazion pou koz su Jéova é su sak li sar fé.

3. Kisa i doi prèch le gayar nouvèl ?

Tout bann vré krétien i doi fé konèt la bonn nouvèl. Nou fé sa avèk sèryeu. Nou prèch tank nou pe, parske nou koné ki fo sov bann vi (lir 1 Timoté 4:16). Nou lé pa péyé pou préché, parske la Bib i di : « Zot la gingn gratuitman, donn gratuitman » (Matieu 10:7, 8). Domoun i ékout pa nou toultan, mé nou kontinué préché, parske nou koné ke laktivité la i fé parti nout ladorasion pou Jéova, é i kontant son keur.

ALON APRANN PLUS

4. Nou fé tout nout posib pou prèch èk tout domoun

VIDÉO : Zot i prèch dan « le téritoir dann dèrnié bout la tèr » (7:33)

• Kosa i mark aou kan ou voi tout bann zéfor, ke bann Témoin Jéova i fé pou préché ?

Lir Matieu 22:39 é Romin 10:13-15 é koz su bann késtion la :

• Koman nout prédikasion i mont ke nou ièm nout prochin ?

• Kosa Jéova i resan pou sak i prèch la bonn nouvèl ? (gard le vèrsé 15).

5. Nou travay min dan la min avèk Bondieu

In bonpe témoiniaj i mont ke Jéova i dirij nout laktivité. Alon pran in légzanp. An Nouvèl-Zélann, kan li té prèch port a port in laprémidi, in frèr ki apèl Paul la rankont in madam. Le matin mèm, madam la, lavé pri Bondieu é lavé apèl ali par son non, Jéova. Èl lavé demann Bondieu ke in moun té vien voir aèl. Paul i rakont : « 3 zeur apré, ma la kongn su son port. »

Lir 1 Korintien 3:9 é koz su késtion la :

• Koman bann témoiniaj kom sak le frèr Nouvèl-Zélann, i mont ke Jéova i dirij nout laktivité prédikasion ?

Lir Akt 1:8 é koz su késtion la :

• Poukosa nou la bezoin lèd Jéova pou fé se laktivité ?

Ou té koné sa ou ?

Dan chak rénion la semèn, nou gingn in formasion pou préché. Si ou la finn asis in rénion komsa, kosa ou pans formasion la ?

6. Nou obéi komannman Bondieu

Dann tan 1^é sièk, bann zènmi té ve anpèch bann disip Jézu préché. Dukou, bann krétien la défann zot droi pou préché, zot la ‘fé rekonèt la bonn nouvèl devan la justis’ (Filipien 1:7). Bann Témoin Jéova i fé parèy zordia.

VIDÉO : Zot i défann le gayar nouvèl devan la justis (2:28)

Lir Akt 5:27-42 é koz su késtion la :

• Poukosa nou va jamé arèt préché ? (gard bann vèrsé 29, 38 é 39).

SAK NOU LA APRANN

Jézu la demann son bann disip prèch le gayar nouvèl su tout la tèr. Jéova i èd son bann zadorateur fé laktivité la.

Alon révizé

• Koman la bonn nouvèl lé préché su tout la tèr ?

• Koman nout prédikasion i mont ke nou ièm nout prochin ?

• Dapré ou, èske préché i rann ereu ? Poukosa ?

GARD SA OSI

Koman bann Témoin Jéova i prèch dan bann gran vil ?

Pari : Prézantoir dan bann gran vil (5:11)

Kèl zéfor bann Témoin Jéova i fé pou prèch èk bann réfujié ?

Zot i prèch èk bann réfujié (5:59)

In seur ki prèch a plin tan i ésplik poukosa son vi lé gayar.

Mi lé kontan ma la choizi in vi komsa (6:29)

Bann viktoir devan la justis ke la mark listoir la prédikasion la bonn nouvèl.

« Les prédicateurs se défendent devant les tribunaux » (Le Royaume de Dieu en action !, chapitre 13)

Jézu la ansègn ke son bann disip i doi fé batiz azot (lir Matieu 28:19, 20). Mé kosa i lé le batèm ? É kosa i fo fé pou ariv juskala ?

1. Kosa i lé le batèm ?

Le vèrb « batizé » i vien in mo grèk ki ve dir « plonjé ». Kan Jézu lété batizé, li lété plonjé an antié dan le Jourdin, aprésa « li la sort desou d’lo » (Mark 1:9, 10). Kom Jézu, bann vré krétien lé batizé kan i plonj azot an antié dann lo.

2. Kosa le batèm i mont ?

Sak i fé batiz ali i mont ke li of son vi Jéova. Koman in moun i fé pou of son vi Bondieu ? Avan le batèm, dann in priyèr ke nou fé nout touseul, nou di Jéova ke nou ve sèrv ali pou toultan. Nou promèt ali ke nou va ador rienk li touseul, é ke fé son volonté i sra le zafèr le plus inportan dan nout vi. Nou désid ‘arèt viv pou nou mèm é kontinué suiv’ bann zansègnman é légzanp Jézu (Matieu 16:24). Kan in moun i of son vi Bondieu é li fé batiz ali, son lamitié èk Jéova i devien plu for, é li devien kamarad ansanm bann zadorateur Bondieu.

3. Kosa i fo fé avan le batèm ?

Avan ou fé batiz aou, i fo ou aprann konèt Jéova é gingn in foi solid an li (lir Ébreu 11:6). Plus out konésans é out foi va grandi, plus out lamour pou Jéova va grandi osi. Aprésa, ou nora anvi préché é dan out fason d’viv ou va réspèk bann rekomandasion Bondieu (2 Timoté 4:2 ; 1 Jan 5:3). É le plu souvan, in moun ki kondui ali « in fason Jéova i demann pou fé plézir ali vréman » la anvi of son vi Jéova é fé batiz alia (Kolosien 1:9, 10).

ALON APRANN PLUS

4. Sak le batèm Jézu i aprann anou

Lir Matieu 3:13-17 pou voir koman le batèm Jézu la éspasé. Aprésa, koz su bann késtion la :

• Èske Jézu lété batizé kan li lété inn ti bébé ?

• Koman Jézu lété batizé ? Èske la vèrs seulman inn ti pe d’lo su son tèt ?

Kan li té finn batizé, Jézu la komans fé le travay ke Bondieu lavé donn ali pou fé. Lir Luk 3:21-23 é Jan 6:38 é koz su késtion la :

• Apré son batèm, kèl travay Jézu la mèt an premié dan son vi ?

5. Fé batiz aou : lé posib pou ou fé sa

Majinn of out vi Bondieu é fé batiz aou, i pe fé peur aou premié débu. Mé furmezur, ou va fé bann progré, é in jour ou va santi ke ou lé pré. Pou dékouv koman désèrtin la gingn pran se gran désizion, gard le VIDÉO.

VIDÉO : Koman konstrui in relasion ansanm Jéova (1:11)

Lir Jan 17:3 é Jak 1:5 é koz su késtion la :

• Koman nou pe prépar anou pou le batèm ?

1. Of nout vi Jéova, sé di ali ke nou ve sèrv ali pou toultan.

2. Le batèm sé mont ke nou la of nout vi Bondieu devan domoun.

6. Le batèm i fé rant anou dan la fami Jéova

Kan nou fé batiz anou, nou fé parti in fami uni su tout la tèr. Kinport ousa nou sort, nout tout na mèm kroiyans é nou réspèk bann zansègnman biblik su le bien é le mal ke Jéova i donn. Lir Psom 25:14 é 1 Pièr 2:17 é koz su késtion la :

• Kosa le batèm i aport su bann relasion ke in moun néna avèk Jéova é avèk sak i ador Jéova ?

SAK NOU LA APRANN

Jézu la di ke bann krétien i doi fé batiz azot. Pou fé batiz aou, i fo ke ou néna in foi solid pou Jéova, ke ou viv dapré son bann rekomandasion, é ke ou of ali out vi.

Alon révizé

• Kosa i lé le batèm, é poukosa lé inportan fé batiz aou ?

• Kèl rapor néna ant of out vi Bondieu é fé batiz aou ?

• Kosa in moun i doi fé pou of son vi Bondieu é pou fé batiz ali ?

GARD SA OSI

Dot vérité su le batèm.

« Qu’est-ce que le baptême ? » (lartik jw.org)

Bann konsèy pratik pou ariv jusko batèm.

« L’amour et la reconnaissance pour Jéhovah mènent au baptême » (La Tour de Garde, mars 2020)

In mesieu la konpri ke li té doi pa fé batiz ali su in kou d’tèt.

« Ils voulaient que je découvre la vérité par moi-même » (La Tour de Garde, 1^er février 2013)

Poukosa le batèm lé in bon lobjéktif ? Koman ou pe prépar aou pou le batèm ?

« Devrais-je me faire baptiser ? » (Les jeunes s’interrogent. Réponses pratiques [volume 2], chapitre 37)